பவன் கல்யாணுக்கு ஆப்ரேஷன்! நேரில் நலம் விசாரித்த சந்திரபாபு நாயுடு!! உடல்நிலை குறித்து வெளியான முக்கிய அப்டேட்!
வலது தோள்பட்டையில் உள்ள (rotator cuff) தசைப் பகுதியில் ஏற்பட்ட பாதிப்புக்காக கல்யாண் அந்த மருத்துவமனையில் அறுவை சிகிச்சை செய்துகொண்டார்.
by
ஆந்திரப் பிரதேச துணை முதலமைச்சர் பவன் கல்யாண் அறுவை சிகிச்சைக்குப் பிறகு குணமடைந்து வரும் நிலையில், அவரை முதலமைச்சர் சந்திரபாபு நாயுடு நேரில் சந்தித்து உடல்நலம் விசாரித்தார். மும்பையில் உள்ள கோகிலாபென் திருபாய் அம்பானி மருத்துவமனையில் நடைபெற்ற இந்த சந்திப்பு அரசியல் வட்டாரங்களிலும், பவன் கல்யாணின் ஆதரவாளர்களிடையிலும் கவனம் பெற்றுள்ளது.
வலது தோள்பட்டையில் ஏற்பட்ட கடுமையான காயம் காரணமாக பவன் கல்யாண் சமீபத்தில் மருத்துவமனையில் அனுமதிக்கப்பட்டார். பரிசோதனையில், தோள்பட்டையின் ‘ரோட்டேட்டர் கஃப்’ பகுதியில் பாதிப்பு இருப்பதுடன், சுப்ராஸ்பினேட்டஸ் மற்றும் இன்ஃப்ராஸ்பினேட்டஸ் தசைநார்களில் பெரிய அளவிலான கிழிசலும், அதனுடன் தொடர்புடைய எலும்பு முறிவும் இருப்பது கண்டறியப்பட்டது. இதையடுத்து ஜூலை 11-ஆம் தேதி அவருக்கு ஆர்த்ரோஸ்கோபிக் முறையில் வெற்றிகரமாக அறுவை சிகிச்சை செய்யப்பட்டது.
மருத்துவமனை வெளியிட்ட அறிக்கையில், அறுவை சிகிச்சை எந்த சிக்கலும் இன்றி வெற்றிகரமாக நிறைவடைந்ததாகவும், பவன் கல்யாணின் உடல்நிலை தற்போது சீராக இருப்பதாகவும் தெரிவிக்கப்பட்டுள்ளது. மேலும், ஓய்வு காலத்திற்குப் பிறகு முறையான தோள்பட்டை மறுவாழ்வு பயிற்சிகள் தொடங்கப்படும் என்றும், அடுத்த நான்கு மாதங்களில் அவரது தோள்பட்டை இயல்பு நிலைக்கு திரும்பும் என மருத்துவர்கள் நம்பிக்கை தெரிவித்துள்ளனர்.
இதையும் படிங்க: பவன் கல்யாணுக்கு என்ன ஆச்சு?! தீராத வலி! வேதனை!! உடனே ஆப்ரேஷன் செய்ய டாக்டர்கள் அட்வைஸ்!
முன்னதாக சமூக வலைதளத்தில் பதிவு வெளியிட்டிருந்த சந்திரபாபு நாயுடு, பவன் கல்யாண் விரைவில் முழுமையாக குணமடைய வாழ்த்து தெரிவித்ததுடன், அவரது உடல்நலனுக்காக பிரார்த்தனை செய்வதாகவும் குறிப்பிட்டிருந்தார்.
பின்னர் செய்தியாளர்களிடம் பேசிய சந்திரபாபு நாயுடு, "பவன் கல்யாண் எப்போதும் மக்களுடன் நெருக்கமாக இருப்பவர். பொதுமக்களுக்காக தொடர்ந்து பணியாற்றும் அவரது இயல்பே உடல்நலப் பிரச்சினையை அதிகப்படுத்தியது. இது திடீரென ஏற்பட்ட பாதிப்பு அல்ல; பல நாட்களாகவே அவர் இந்த வலியால் அவதிப்பட்டு வந்தார். தற்போது அவர் நல்ல முன்னேற்றம் அடைந்து வருகிறார். மருத்துவர்கள் மூன்று வாரங்கள் முழு ஓய்வு எடுக்கவும், அதன் பிறகு பிசியோதெரபி சிகிச்சையை தொடங்கவும் அறிவுறுத்தியுள்ளனர். அதன் பின்னர் அவரது உடல்நிலை மீண்டும் மதிப்பீடு செய்யப்படும்," என்று தெரிவித்தார்.
பவன் கல்யாணின் உடல்நிலை தொடர்ந்து முன்னேற்றம் அடைந்து வருவதாக வெளியான இந்த தகவல், அவரது ரசிகர்கள் மற்றும் ஆதரவாளர்களுக்கு நிம்மதியை அளித்துள்ளது.
இதையும் படிங்க: எல்லையை விரிவு செய்த பவன் கல்யாண்! தெலுங்கானா அரசியலில் ஜனசேனா என்ட்ரி!!
