ஹனிட்ராப்!! பாகிஸ்தான் பெண் உளவாளி வலையில் சிக்கிய கடற்படை வீரர்? கடற்படை ரகசியங்கள் கசிவு?

கோவை: பாகிஸ்தான் உளவுத்துறை அமைப்புடன் தொடர்புடைய பெண் உளவாளியிடம் இந்திய கடற்படையின் முக்கிய தகவல்களை பகிர்ந்ததாகக் கூறப்படும் வழக்கில், மேற்கு வங்கத்தைச் சேர்ந்த கடற்படை மாலுமி ஒருவர் கோயம்புத்தூரில் கைது செய்யப்பட்ட சம்பவம் பரபரப்பை ஏற்படுத்தியுள்ளது.

மேற்கு வங்கத்தைச் சேர்ந்த 31 வயதான பிரதீப் முகர்ஜி, கடந்த 2014-ம் ஆண்டு இந்திய கடற்படையில் மாலுமியாக இணைந்ததாகவும், பின்னர் விசாகப்பட்டினத்தில் உள்ள கிழக்கு கடற்படை கட்டளையின் கீழ் பணியாற்றியதாகவும் அதிகாரப்பூர்வ வட்டாரங்களை மேற்கோள் காட்டி செய்திகள் தெரிவிக்கின்றன. சமீபத்தில் அவர் கோயம்புத்தூர் ரெட்ஃபீல்ட்ஸ் பகுதியில் உள்ள ஐ.என்.எஸ். அக்ரானியில் மேலாண்மை மேம்பாட்டு பயிற்சியில் பங்கேற்றிருந்தார்.

இந்த நிலையில், சில மாதங்களுக்கு முன்பு சமூக வலைதளம் மூலம் பிரதீப்பை பெண் ஒருவர் தொடர்பு கொண்டதாக கூறப்படுகிறது. அந்த பெண் தன்னை பாகிஸ்தான் உளவுத்துறை தொடர்புடையவராக அடையாளப்படுத்தாமல், முதலில் நட்பை ஏற்படுத்தியதாக விசாரணை அதிகாரிகள் தெரிவித்துள்ளனர்.

இதையும் படிங்க: தாராபுரம் பிரசாரம்! ரூட் மாறுகிறது முதல்வர் விஜய் செல்லும் பாதை! கோவையில் பாதுகாப்பு ஏற்பாடுகள் தீவிரம்!

பின்னர், விசாகப்பட்டினம் கடற்படை தளத்துடன் தொடர்புடைய முக்கிய தகவல்கள், கடற்படை சொத்துகள், கப்பற்படை நகர்வுகள் மற்றும் செயல்பாட்டு அமைப்புகள் குறித்த விவரங்களை அவர் பெற்றதாக கூறப்படுகிறது.

பிரதீப்பின் டிஜிட்டல் நடவடிக்கைகளில் சந்தேகத்திற்கிடமான தடயங்கள் கண்டறியப்பட்டதைத் தொடர்ந்து, ஆந்திரப் பிரதேச காவல்துறையின் களவுத்துறை அதிகாரிகள் அவரை கண்காணித்ததாக தகவல்கள் தெரிவிக்கின்றன. ரகசிய தகவல்கள் பகிரப்பட்டதாக கூறப்படும் விவரங்கள் உறுதி செய்யப்பட்ட பின்னர், கடற்படை அதிகாரிகளிடம் கைது செய்வதற்கான அனுமதி பெறப்பட்டதாக கூறப்படுகிறது.

இதையடுத்து, களவுத்துறை சிறப்புக் குழுவினர் கோயம்புத்தூரில் உள்ள ஐ.என்.எஸ். அக்ரானிக்கு சென்று பயிற்சியில் இருந்த பிரதீப் முகர்ஜியை கைது செய்தனர். பின்னர் உள்ளூர் அதிகாரிகளுக்கு தகவல் தெரிவிக்கப்பட்டு, அவரை உள்ளூர் நீதிமன்றத்தில் ஆஜர்படுத்தி இடமாற்று பிடியாணை பெறப்பட்டதாக செய்திகள் தெரிவிக்கின்றன. தொடர்ந்து, மேலதிக விசாரணைக்காக அவரை விஜயவாடாவில் உள்ள களவுத்துறை தலைமையகத்துக்கு அழைத்துச் சென்றுள்ளனர்.

பிரதீப் உண்மையில் எந்தெந்த தகவல்களை பகிர்ந்தார், எவ்வளவு அளவு பாதுகாப்பு தகவல்கள் கசிந்தன என்பது குறித்து விசாரணை நடைபெற்று வருகிறது. மேலும், ஹவாலா அல்லது டிஜிட்டல் பணப் பரிவர்த்தனைகள் மூலம் அவருக்கு பணம் அனுப்பப்பட்டதா என்பதையும் அதிகாரிகள் ஆய்வு செய்து வருகின்றனர்.

இந்த சம்பவம் தொடர்பான விசாரணை தொடர்ந்து நடைபெற்று வருவதால், கடற்படை ரகசிய தகவல்கள் கசிந்ததாக முன்வைக்கப்படும் குற்றச்சாட்டுகளின் முழு பின்னணி விசாரணை முடிவிலேயே தெளிவாகும்.

இதையும் படிங்க: தவெக எம்எல்ஏவை சூழ்ந்த மக்கள்.. கூட்டத்தில் திடீர் கல் வீச்சு!! பரபரப்பு சம்பவம்!!