தேர்தல் ஆணையர் படம் எரிப்பு... சாலை மறியல்! உளுந்தூர்பேட்டையில் காங்கிரஸ் கட்சியினர் கைது!

நாடு முழுவதும் நடைபெற்ற வாக்குத் திருட்டுச் சம்பவங்களைக் கண்டித்தும், இந்தியத் தலைமைத் தேர்தல் ஆணையர் ஞானேஷ் குமார் மற்றும் பிரதமர் நரேந்திர மோடி ஆகியோர் உடனடியாகப் பதவி விலக வேண்டும் என்பதை வலியுறுத்தியும் கள்ளக்குறிச்சி மாவட்ட காங்கிரஸ் கமிட்டி சார்பில் உளுந்தூர்பேட்டை வட்டாட்சியர் அலுவலகம் முன்பாக நடைபெற்ற கண்டன ஆர்ப்பாட்டத்தின் போது, தேர்தல் ஆணையரின் உருவப்படத்தைத் தீயிட்டுக் கொளுத்தி சாலை மறியலில் ஈடுபட்ட காங்கிரஸ் கட்சியினர் 100-க்கும் மேற்பட்டோரைப் போலீசார் கூண்டோடு கைது செய்துள்ளனர்.

கள்ளக்குறிச்சி தெற்கு மாவட்ட காங்கிரஸ் கமிட்டியின் சார்பில், தேர்தல் நடைமுறைகளில் வெளிப்படைத்தன்மை இல்லை எனவும், வாக்குப்பதிவு எந்திரங்கள் மற்றும் வாக்கு எண்ணிக்கையில் முறைகேடுகள் நடந்துள்ளதாகவும் குற்றம்சாட்டி இந்த மாபெரும் கண்டன ஆர்ப்பாட்டம் முன்னெடுக்கப்பட்டது.

உளுந்தூர்பேட்டை வட்டாட்சியர் அலுவலகம் முன்பாக மாவட்டத் தலைவர் இதயத்துல்லா தலைமையில் திரண்ட நூற்றுக்கணக்கான காங்கிரஸ் தொண்டர்கள் மற்றும் நிர்வாகிகள், மத்திய பாஜக அரசையும் தேர்தல் ஆணையத்தையும் கண்டித்து முழக்கங்களை எழுப்பி ஆர்ப்பாட்டத்தில் ஈடுபட்டனர்.

இதையும் படிங்க: அஜித் ரசிகர்கள் புதிய அரசியல் கட்சி துவக்கம்! உளுந்தூர்பேட்டையில் உருவானது தமிழக மக்கள் கழகம்!

அப்போது, ஆர்ப்பாட்டக் களத்தில் இருந்த காங்கிரஸ் கட்சியினர் சிலர், மத்திய அரசுக்கு ஆதரவாகச் செயல்படுவதாகக் குற்றம்சாட்டி, இந்தியத் தலைமைத் தேர்தல் ஆணையர் ஞானேஷ் குமாரின் உருவப்படத்தைத் திடீரென நடுரோட்டில் தீ வைத்து கொளுத்தினர்.

படத்திற்குத் தீ வைத்ததும் கொழுந்துவிட்டு எரிந்ததால், அப்பகுதியில் பாதுகாப்புப் பணியில் ஈடுபட்டிருந்த காவல்துறையினருக்கும் போராட்டக்காரர்களுக்கும் இடையே தள்ளுமுள்ளு ஏற்பட்டு பெரும் பதற்றமும் பரபரப்பும் நிலவியது. இதனைத் தொடர்ந்து, ஆர்ப்பாட்டத்தில் ஈடுபட்ட அனைவரும் அங்கிருந்து ஆவேசமாக ஊர்வலமாகப் புறப்பட்டு, உளுந்தூர்பேட்டையின் முக்கியப் போக்குவரத்து சந்திப்பான விருத்தாசலம் சாலை சந்திப்புப் பகுதிக்குச் சென்றனர்.

அங்குச் சாலையில் அமர்ந்து திடீர் சாலை மறியல் போராட்டத்தில் ஈடுபட்டதால், திருச்சி - சென்னை தேசிய நெடுஞ்சாலை மற்றும் விருத்தாசலம் செல்லும் வழியில் வாகனங்கள் நீண்ட வரிசையில் அணிவகுத்து நின்றன. சுமார் அரை மணி நேரத்திற்கும் மேலாக உளுந்தூர்பேட்டை நகரப் பகுதி முழுவதும் போக்குவரத்து முற்றிலுமாக ஸ்தம்பித்து பொதுமக்கள் கடும் அவதிக்குள்ளாகினர்.

இதையடுத்து விரைந்து வந்த உளுந்தூர்பேட்டை காவல் துணை கண்காணிப்பாளர் தலைமையிலான போலீசார், சாலை மறியலில் ஈடுபட்ட மாவட்டத் தலைவர் இதயத்துல்லா உள்ளிட்ட 100-க்கும் மேற்பட்ட காங்கிரஸ் கட்சியினரை வலுக்கட்டாயமாகக் கைது செய்து தனியார் திருமண மண்டபத்தில் அடைத்தனர்.

இதையும் படிங்க: இப்படியுமா பண்ணுவாங்க? மகள்களை கொன்ற வழக்கில் தாய்க்கு இரட்டை ஆயுள்! உளுந்தூர்பேட்டை நீதிமன்றம் அதிரடி தீர்ப்பு!!