இயற்கை எழுதிய உங்கள் பெயர்!! நாசாவின் புதிய வசதி! 'Your Name in Landsat'.! புது ட்ரெண்ட்!

நாசா அறிமுகப்படுத்திய புதிய வசதி இணையத்தில் பெரும் வரவேற்பைப் பெற்று டிரெண்டாக மாறியுள்ளது. 'Your Name in Landsat' என்ற இந்த இன்டராக்டிவ் கருவியின் மூலம், எவரும் தங்கள் பெயரை பூமியின் இயற்கை அமைப்புகளால் உருவாக்கப்பட்ட அற்புதமான படமாகக் காணலாம்.

நாசா மற்றும் அமெரிக்க புவியியல் ஆய்வு மையம் (USGS) இணைந்து நடத்தும் லேண்ட்சேட் (Landsat) செயற்கைக்கோள் திட்டம் 50 ஆண்டுகளுக்கும் மேலாக பூமியை தொடர்ந்து கண்காணித்து வருகிறது. இந்தத் திட்டத்தின் கீழ் எடுக்கப்பட்ட ஆயிரக்கணக்கான விண்வெளிப் புகைப்படங்களைப் பயன்படுத்தி, நாசா இந்தப் புதிய வசதியை உருவாக்கியுள்ளது. 

இணையத்தில் 'Your Name in Landsat' என்று தேடி அல்லது நேரடியாக https://science.nasa.gov/specials/your-name-in-landsat/ என்ற பக்கத்துக்குச் சென்று, தங்கள் பெயரை ஆங்கில எழுத்துகளில் டைப் செய்தால் போதும்.

இதையும் படிங்க: விடிந்ததும் வரலாற்று சாதனை... பூமியைத் தொட்டது ஓரியன்... ஆர்டெமிஸ் 2 குழுவினர் பத்திரமாக மீட்பு...!

உள்ளிடப்பட்ட ஒவ்வொரு எழுத்துக்கும், பூமியின் இயற்கை அமைப்புகளான ஆறுகள், ஏரிகள், மலைகள், சமவெளிகள், கடற்கரைகள், பனிப்பாறைகள் போன்றவற்றின் உண்மையான செயற்கைக்கோள் புகைப்படங்கள் தானாக வரிசைப்படுத்தப்படும். இவை ஒன்றிணைந்து அழகிய வடிவில் பெயரை உருவாக்கும். 

ஒரே பெயருக்கு கூட பல்வேறு விதமான படக் கலவைகளை இந்தக் கருவி உருவாக்கித் தருகிறது. ஒவ்வொரு எழுத்தின் படத்தின் மீது கர்சரை நகர்த்தினால், அந்தப் புகைப்படம் பூமியின் எந்தப் பகுதியில் எடுக்கப்பட்டது, அதன் அட்சரேகை, தீர்க்கரேகை உள்ளிட்ட விவரங்களும் தெரியவரும்.

இந்த வசதி வெறும் விளையாட்டாக மட்டும் இல்லாமல், பூமியின் புவியியல் அமைப்புகளை சுவாரசியமாக அறிந்துகொள்ளவும், விண்வெளியில் இருந்து நமது கிரகம் எவ்வளவு அழகாகத் தெரிகிறது என்பதை உணரவும் உதவுகிறது. 

உருவாக்கப்பட்ட படத்தை தரவிறக்கம் செய்து கொள்ளலாம் அல்லது சமூக வலைத்தளங்களில் பகிரலாம். பலரும் தங்கள் பெயர், குடும்ப உறுப்பினர்கள் பெயர், நண்பர்கள் பெயர் என பலவற்றை உருவாக்கி பகிர்ந்து வருகின்றனர். இது இளைஞர்கள் மற்றும் மாணவர்கள் மத்தியில் பெரும் உற்சாகத்தை ஏற்படுத்தியுள்ளது.

நாசாவின் இந்தப் புதிய முயற்சி, பூமியைப் பற்றிய அறிவியல் ஆர்வத்தை மக்களிடம் அதிகரிக்கும் வகையில் அமைந்துள்ளது. வீட்டில் இருந்தபடியே விண்வெளிப் பார்வையில் பூமியின் அற்புதங்களை ரசிக்க இது ஒரு சிறந்த வாய்ப்பு. இப்போது இணையம் முழுவதும் இந்த டிரெண்ட் நிறைந்துள்ளது.

இதையும் படிங்க: 50 ஆண்டுகளுக்குப் பின் மீண்டும் சாதனை... மனிதர்களை நிலவுக்கு அனுப்பியது நாசா... விண்ணில் பாய்ந்தது ஓரியன் விண்கலம்...!