அதிமுக கூட்டணியில் அன்புமணி தரப்பு...! ராமதாசை சந்திக்கும் சி.வி சண்முகம்..!

தமிழ்நாட்டின் அரசியல் களத்தில் 2026 சட்டமன்றத் தேர்தல் நெருங்கிவரும் நிலையில், ஒரு முக்கியமான திருப்பமாக பாட்டாளி மக்கள் கட்சி., அதிமுக தலைமையிலான தேசிய ஜனநாயக கூட்டணியில் (NDA) இணைந்துள்ளது. இந்த கூட்டணி ஒப்பந்தம் இன்று சென்னையில் உறுதிப்படுத்தப்பட்டு கையெழுத்தானது. இது தமிழக அரசியலில் பெரும் எதிரொலியை ஏற்படுத்தியுள்ளது. சென்னை கிரீன்வேஸ் ரோடில் உள்ள அதிமுக பொதுச்செயலாளர் எடப்பாடி கே. பழனிசாமியின் இல்லத்தில் பாமக தலைவர் அன்புமணி ராமதாஸ் நேரில் சந்தித்து பேச்சுவார்த்தை நடத்தினார்.

இந்த சந்திப்பில் அதிமுக மூத்த நிர்வாகிகளான முன்னாள் அமைச்சர்கள் சி.வி. சண்முகம், ஜெயக்குமார் உள்ளிட்டோர் கலந்துகொண்டனர். நீண்ட பேச்சுவார்த்தைக்குப் பிறகு, இரு கட்சித் தலைவர்களும் கூட்டாக செய்தியாளர்களை சந்தித்து கூட்டணி அறிவிப்பை வெளியிட்டனர். எடப்பாடி பழனிசாமி பேசுகையில், "அதிமுக தொண்டர்கள் விரும்பியபடி கூட்டணி அமைக்கப்பட்டுள்ளது. இது வெற்றிகரமான கூட்டணியாக அமையும். திமுக ஆட்சியின் மக்கள் விரோத போக்கை அகற்றுவதே எங்கள் இலக்கு" என்று கூறினார். அன்புமணி ராமதாஸ் தரப்பில், "மக்கள் ஆத்திரத்தில் உள்ள திமுக அரசை வீழ்த்தவே இந்த கூட்டணி. இன்னும் சில கட்சிகள் எங்கள் கூட்டணியில் இணையும்" என்று தெரிவித்தார்.

இந்த கூட்டணி அதிமுக-பாஜக அடிப்படையிலான NDAவின் விரிவாக்கமாகவும் பார்க்கப்படுகிறது. தொகுதிப் பங்கீடு விவரங்கள் குறித்து, பாமகவுக்கு சுமார் 20 முதல் 25 தொகுதிகள் ஒதுக்கீடு செய்யப்பட்டிருக்கலாம் என்று தகவல்கள் தெரிவிக்கின்றன. இருப்பினும், அதிகாரப்பூர்வமாக தொகுதி எண்ணிக்கை முழுமையாக அறிவிக்கப்படவில்லை, ஆனால் ஒப்பந்தத்தில் இடம்பெற்றுள்ளது உறுதி. பாமகவில் கடந்த காலங்களில் நிறுவனர் ராமதாஸ் மற்றும் அன்புமணி ராமதாஸ் இடையே ஏற்பட்ட உள் மோதல்கள் இருந்தபோதிலும், அன்புமணி தரப்பு கட்சியின் தலைமையை உறுதிப்படுத்தி இந்த கூட்டணி முடிவை எடுத்துள்ளது. 

இதையும் படிங்க: மருமகளின் பதவி இனி மகளுக்கு!! ஆட்டத்தை ஆரம்பித்தார் ராமதாஸ்! சவுமியா அன்புமணியின் தலைவர் பதவி காலி!

இந்த நிலையில் பாமக நிறுவனர் ராமதாசை முன்னாள் அமைச்சர் சிவி சண்முகம் சந்தித்து பேச உள்ளதாக தகவல் கிடைத்துள்ளது. பாமகவின் இரு தரப்பையும் ஒரே கூட்டணியில் இணைக்கும் முயற்சியாக ராமதாசை சந்தித்து கூட்டணி பேச்சு வார்த்தை நடத்த இருப்பதாக கூறப்பட்டுள்ளது. பாட்டாளி மக்கள் கட்சி இரண்டாகப் பிளவு பட்டுள்ள நிலையில் அன்புமணிக்கும் ராமதாசுக்கும் இடையில் கடும் மோதல் நிலவி வருகிறது. அன்புமணி அதிமுக கூட்டணியில் ஐக்கியமாகி இருக்கும் சூழ்நிலையில் ராமதாஸ் இந்த கூட்டணியில் இணைவாரா என்ற எதிர்பார்ப்பு எழுந்துள்ளது. 

இதையும் படிங்க: பச்சை துரோகம் செய்த அன்புமணி! ராமதாஸின் ஆட்டம் இனிதான் ஆரம்பம்!! ஸ்ரீகாந்தி கொந்தளிப்பு!