டெல்லியில் அரசு ஊழியர்களுக்கு வாரத்தில் 2 நாட்கள் WFH! முதல்வர் ரேகா குப்தா அதிரடி உத்தரவு!

மேற்கு ஆசியாவில் நிலவி வரும் போர்ச் சூழல் காரணமாக ஏற்பட்டுள்ள உலகளாவிய எரிபொருள் நெருக்கடியைச் சமாளிக்க, டெல்லி அரசு ஊழியர்களுக்கு வாரத்தில் இரண்டு நாட்கள் வீட்டிலிருந்தே பணியாற்ற (Work From Home) அம்மாநில முதலமைச்சர் திருமதி. ரேகா குப்தா அவர்கள் இன்று உத்தரவிட்டுள்ளார்.

பிரதமர் நரேந்திர மோடி அவர்கள் எரிபொருளைச் சேமிக்க விடுத்த வேண்டுகோளை ஏற்று, டெல்லி அரசு 'எனது பாரதம், எனது பங்களிப்பு' (Mera Bharat, Mera Yogdan) என்ற பிரச்சாரத்தைத் தொடங்கியுள்ளது. இதன் கீழ் முதல்வர் அறிவித்துள்ள முக்கிய மாற்றங்கள்.

அனைத்து அரசுத் துறை ஊழியர்களும் வாரத்தில் இரண்டு நாட்கள் வீட்டிலிருந்தே பணியாற்றுவார்கள். இது நாளை (மே 15) முதல் அமலுக்கு வருகிறது. ஒவ்வொரு திங்கட்கிழமையும் அமைச்சர்கள், அதிகாரிகள் மற்றும் ஊழியர்கள் அனைவரும் மெட்ரோ ரயிலில் மட்டுமே அலுவலகம் செல்ல வேண்டும். அமைச்சர்கள் மற்றும் அதிகாரிகள் அடுத்த ஒரு ஆண்டிற்கு அரசு ரீதியான வெளிநாட்டுப் பயணங்களை மேற்கொள்ளத் தடை விதிக்கப்பட்டுள்ளது. அடுத்த ஆறு மாதங்களுக்கு பெட்ரோல், டீசல் அல்லது மின்சார வாகனங்கள் எதையும் அரசு கொள்முதல் செய்யாது.

இதையும் படிங்க: இத மட்டும் செஞ்சுட்டீங்கன்னா!! பிரதமர் மோடியை நேர்ல பாக்கலாம்!! அதிரடி ஆஃபரை அறிவித்தது பாஜக!

அரசுத் துறைகளைப் போலவே தனியார் நிறுவனங்களும் தங்களது ஊழியர்களுக்கு வாரத்தில் இரண்டு நாட்கள் வீட்டிலிருந்தே பணியாற்ற அனுமதி அளிக்க வேண்டும் என முதலமைச்சர் ரேகா குப்தா வேண்டுகோள் விடுத்துள்ளார். இது குறித்துத் தொழிலாளர் நலத்துறை கண்காணிக்கும் என்றும் அவர் தெரிவித்துள்ளார்.

மேலும், பொதுமக்கள் வாரத்தில் ஒரு நாளை 'வாகனம் இல்லா நாளாக' (No Vehicle Day) கடைபிடிக்க வேண்டும் என்றும், தேவையற்ற பயணங்களைத் தவிர்த்து எரிபொருள் சிக்கனத்திற்கு ஒத்துழைக்க வேண்டும் என்றும் முதலமைச்சர் கேட்டுக்கொண்டுள்ளார்.

இதையும் படிங்க: "அதிமுக யாருக்கும் அடிமை அல்ல!" - ராகுல் காந்திக்கு எடப்பாடி பழனிசாமி  பதிலடி!