டெல்லியை புரட்டிப்போட்ட கனமழை! சாலைகளில் வெள்ளம்! 18 விமானங்கள் ரத்து, 166 விமானங்கள் தாமதம்!
டெல்லியின் பல்வேறு பகுதிகளில் மிதமான மழை தொடரும் என்றும், சில இடங்களில் கன முதல் மிகக் கனமழை பெய்யக்கூடும் என்றும் இந்திய வானிலை ஆய்வு மையம் எச்சரித்துள்ளது.
by
டெல்லியில் பெய்து வரும் கனமழையால் தலைநகர் பல பகுதிகளில் இயல்பு வாழ்க்கை கடுமையாக பாதிக்கப்பட்டுள்ளது. தொடர் மழையால் முக்கிய சாலைகள் உள்ளிட்ட பல இடங்களில் மழைநீர் தேங்கி வெள்ளப்பெருக்கு போல் காட்சியளித்தது. இதனால் வாகனப் போக்குவரத்து பாதிக்கப்பட்டதுடன், இந்திரா காந்தி சர்வதேச விமான நிலையத்திலும் விமான சேவைகள் பாதிக்கப்பட்டன.
கனமழையை தொடர்ந்து டெல்லிக்கு ரெட் அலர்ட் எச்சரிக்கை விடுக்கப்பட்டுள்ளது. நகரின் பல பகுதிகளில் மழைநீர் தேங்கியதால் வாகனங்கள் மெதுவாக நகர்ந்தன. குறிப்பாக தாழ்வான பகுதிகளில் சாலைகளில் தேங்கிய தண்ணீரால் பொதுமக்கள் மற்றும் வாகன ஓட்டிகள் சிரமத்தை சந்தித்தனர்.
டெல்லி இந்திரா காந்தி சர்வதேச விமான நிலையத்தில் மழையின் தாக்கம் காரணமாக 18 விமானங்கள் ரத்து செய்யப்பட்டுள்ளன. மேலும், 166 விமானங்கள் தாமதமாக இயக்கப்பட்டதாக தெரிவிக்கப்பட்டுள்ளது. இதனால் விமானப் பயணிகள் விமான நிலையங்களில் நீண்ட நேரம் காத்திருக்க வேண்டிய நிலை ஏற்பட்டது.
இதையும் படிங்க: குடையை தயாரா வச்சுக்கோங்க!! கொட்டித் தீர்க்கப்போகுது கனமழை!! 5 மாவட்டங்களுக்கு வந்தாச்சு அலர்ட்!
ராம் மனோகர் லோஹியா மருத்துவமனை, எய்ம்ஸ், அசோகா சாலை உள்ளிட்ட முக்கிய பகுதிகளிலும் மழைநீர் தேங்கியது. பார்லிமென்ட் தெரு, கன்னாட் பிளேஸ், ஐடிஓ, ஆர்.கே.புரம் மற்றும் பெரோஸ்ஷா சாலை உள்ளிட்ட பகுதிகளிலும் கனமழை பெய்ததால் சாலைகளில் வாகனங்கள் ஊர்ந்து செல்லும் நிலை ஏற்பட்டது.
டெல்லியின் பல்வேறு பகுதிகளில் மிதமான மழை தொடரும் என்றும், சில இடங்களில் கன முதல் மிகக் கனமழை பெய்யக்கூடும் என்றும் இந்திய வானிலை ஆய்வு மையம் எச்சரித்துள்ளது. இதனுடன் மின்னல் மற்றும் பலத்த காற்று வீசும் வாய்ப்பும் உள்ளதாக தெரிவிக்கப்பட்டுள்ளது.
தொடர்ந்து பெய்து வரும் மழையால் நகரின் சாலைப் போக்குவரத்து மட்டுமின்றி விமான சேவையும் பாதிக்கப்பட்டுள்ளதால், பயணிகள் தங்களது பயணத் திட்டங்களை கவனமாக மேற்கொள்ள வேண்டிய சூழல் ஏற்பட்டுள்ளது. குறிப்பாக விமானப் பயணிகள் விமான நிறுவனங்களிடம் இருந்து தங்களது விமானத்தின் தற்போதைய நிலையை முன்கூட்டியே உறுதி செய்து கொள்ள வேண்டியது அவசியமாகியுள்ளது.
நேற்றும் கனமழை காரணமாக டெல்லியில் விமான சேவைகள் பாதிக்கப்பட்டிருந்த நிலையில், இன்றும் ரத்து மற்றும் தாமதம் தொடர்ந்துள்ளது. இதனால் தலைநகரில் கனமழையின் தாக்கம் மேலும் நீடிக்குமா என்ற எதிர்பார்ப்பு ஏற்பட்டுள்ளது.
இதையும் படிங்க: மு.க.ஸ்டாலினுக்கு நோ சொன்னது ஐகோர்ட்! கொளத்தூர் தேர்தல் வழக்கை அவசர வழக்காக விசாரிக்க மறுப்பு!
