பிரதமர் மோடியின் வெளிநாட்டுப் பயண விவரங்களை வெளியிட முடியாது! டெல்லி உயர் நீதிமன்றம் அதிரடி உத்தரவு!

புதுடெல்லி: பிரதமர் நரேந்திர மோடி மற்றும் முன்னாள் பிரதமர் மன்மோகன் சிங் ஆகியோர் இந்திய விமானப்படைக்குச் சொந்தமான விமானங்களில் மேற்கொண்ட வெளிநாட்டுப் பயணங்களின் விரிவான விவரங்களைத் தகவலறியும் உரிமைச் சட்டத்தின் கீழ் வெளியிட வேண்டும் என்ற மத்திய தகவல் ஆணையத்தின் உத்தரவை டெல்லி உயர் நீதிமன்றம் ரத்து செய்துள்ளது. இந்தத் தகவல்கள் பிரதமரின் பாதுகாப்புக்கும் நாட்டின் பாதுகாப்புக்கும் பாதிப்பை ஏற்படுத்தக்கூடும் என நீதிமன்றம் தெரிவித்துள்ளது.

ஓய்வுபெற்ற கடற்படை அதிகாரி லோகேஷ் கே. பத்ரா, 2013 ஏப்ரல் 1 முதல் 2018 ஜூன் 5 வரையிலான காலகட்டத்தில், மன்மோகன் சிங் மற்றும் நரேந்திர மோடி இந்திய விமானப்படை விமானங்களில் மேற்கொண்ட வெளிநாட்டுப் பயணங்கள் தொடர்பான விவரங்களைக் கோரி தகவலறியும் உரிமைச் சட்டத்தின் கீழ் மனு அளித்திருந்தார்.

இந்தத் தகவல்களில் பாதுகாப்புப் பணியாளர்களின் பெயர்கள் மற்றும் அடையாள விவரங்களை நீக்கிவிட்டு, மீதமுள்ள பதிவுகளை வழங்குமாறு மத்திய தகவல் ஆணையம் 2020 ஜூலை மாதம் இந்திய விமானப்படைக்கு உத்தரவிட்டது. ஆனால், பயண விவரங்களில் பாதுகாப்பு தொடர்பான முக்கியத் தகவல்கள் இடம்பெற்றிருப்பதாகக் கூறி, அந்த உத்தரவை எதிர்த்து விமானப்படை டெல்லி உயர் நீதிமன்றத்தை அணுகியது.

இதையும் படிங்க: ‘2 மணி வரை காத்திருக்க முடியாதா?’ டெல்லி நீதிமன்றத்தில் கரப்பான் அமைப்புக்கு நெருக்கடி! நீதிபதி சரமாரி கேள்வி!

இந்த வழக்கை விசாரித்த நீதிபதி அமித் மகாஜன், அக்டோபர் 15ஆம் தேதி பிறப்பித்த உத்தரவில், பிரதமரின் வெளிநாட்டுப் பயணங்களுக்கு பொதுமக்களின் வரிப்பணம் செலவிடப்படுகிறது என்பதற்காக மட்டும், பாதுகாப்பு ஏற்பாடுகளைப் பாதிக்கக்கூடிய தகவல்களை வெளியிட உத்தரவிட முடியாது என்று குறிப்பிட்டார்.

பாதுகாப்புப் பணியாளர்களின் பெயர்களை நீக்கினாலும், விமானம், விமானக் குழுவினர், பயணிகள் மற்றும் உடன் செல்லும் குழுவினர் தொடர்பான பிற விவரங்களை இணைத்துப் பார்ப்பதன் மூலம் பாதுகாப்பு ஏற்பாடுகள் குறித்த தகவல்களை ஊகிக்க முடியும் என்ற விமானப்படையின் வாதத்தையும் நீதிமன்றம் கவனத்தில் கொண்டது.

மேலும், தகவலை வெளியிடுவதால் தேசியப் பாதுகாப்புக்கும் பிரதமரின் உயிருக்கும் ஏற்படக்கூடிய ஆபத்துகளை மதிப்பிடுவது, பாதுகாப்புப் பொறுப்பில் உள்ள அமைப்புகளின் அதிகார வரம்புக்குள் வருவதாக நீதிமன்றம் தெரிவித்தது. தகவல் வெளியிடப்பட வேண்டும் என்பதற்கான போதுமான பொது நலக் காரணமும் நிரூபிக்கப்படவில்லை எனக் குறிப்பிட்டது.

இதையடுத்து, மத்திய தகவல் ஆணையத்தின் முந்தைய உத்தரவை ரத்து செய்து, விமானப்படையின் மனுவை நீதிமன்றம் ஏற்றுக்கொண்டது. இதனால், கோரப்பட்ட விரிவான விமானப் பயணப் பதிவுகளை வெளியிட வேண்டும் என்ற உத்தரவு செல்லாது என அறிவிக்கப்பட்டுள்ளது.

இதையும் படிங்க: மோடியை நண்பர் என அழைப்பதில் பெருமை! இந்தியாவை பாராட்டிய போலந்து பிரதமர் டொனால்ட் டஸ்க்!