டெல்லி கார்வெடிப்பு!! பிரியாணி தான் கோட்வேர்ட்! அயோத்தி ராமர் கோயிலுக்கு ஸ்கெட்ச்.. விசாரணையில் பகீர்!

தலைநகர் டெல்லியின் செங்கோட்டை (ரெட் ஃபோர்ட்) மெட்ரோ ஸ்டேஷன் முதல் கேட்டில் நவம்பர் 10 அன்று மாலை 6:52 மணிக்கு நடந்த சக்திவாய்ந்த கார்வெடிப்பு, மொத்த நாட்டையும் உலுக்கியுள்ளது. இந்த கொடூர தாக்குதலில் 13 அப்பாவி உயிர்கள் பறிக்கப்பட்டுள்ளன. 20-க்கும் மேற்பட்டோர் காயமடைந்து மருத்துவமனைகளில் சிகிச்சை பெற்று வருகின்றனர். 
பாகிஸ்தான் சார்ந்த ஜெய்ஷ்-இ-மொஹமது (JeM) பயங்கரவாத அமைப்பின் தலைவன் மசூத் அசாரின் (Masood Azhar) முறைகேடான சதியின் பகுதியாக இது இருக்கலாம் என தேசிய விசாரணை அமைப்பு (NIA) விசாரணையில் தெரியவந்துள்ளது. அதிர்ச்சியளிப்பதாக, இந்த சதியில் ஈடுபட்ட அனைவரும் நன்கு படித்த டாக்டர்கள் என்பது உறுதியாகியுள்ளது. 

அவர்கள் 'ஒயிட் காலர்' (white-collar) பயங்கரவாதிகளாக மூளைச்சலவை செய்யப்பட்டு பயன்படுத்தப்பட்டனர். குண்டுவெடிப்பின் போது முன்னின்று நடத்திய உமர் நபி (Umar Nabi) உடல் சிதறி உயிரிழந்தார். அவர் காஷ்மீரின் புல்வாமாவைச் சேர்ந்தவர்.

கைது செய்யப்பட்ட டாக்டர்கள்: புல்வாமாவைச் சேர்ந்த முஸம்மில் கனி (Muzammil Ganaie), உத்தரப் பிரதேசத்தின் லக்னாவைச் சேர்ந்த ஷஹீன் ஷயீத் (Shaheen Sayeed), காஷ்மீரின் குல்காமைச் சேர்ந்த அதீல் அகமது ராதர் (Adeel Ahmad Rather), தெலுங்கானாவின் ஹைதராபாத்தைச் சேர்ந்த அகமது மொஹியுதீன் (Ahmed Mohiyuddin), ஸ்ரீநகரின் மஹாராஜா ஹரிசிங் மருத்துவமனையில் பணியாற்றிய தஜமுல் (Tajmul) ஆகியோர். 

இதையும் படிங்க: கஷ்டப்பட்டு டாக்டருக்கு படிக்க வச்சோம்!! உமரு அப்பிடிபட்டவரு இல்ல!! கண்ணீர் விடும் குடும்பம்!

இவர்கள் அனைவரும் ஃபரிதாபாத்தின் அல்-ஃபலாஹ் பல்கலைக்கழகம் மற்றும் பிற மருத்துவ நிறுவனங்களில் பணியாற்றினர். அவர்களிடமிருந்து 2,900 கிலோ அமோனியம் நைட்ரேட் உள்ளிட்ட வெடிபொருட்கள், துப்பாக்கிகள், டெட்டனேட்டர்கள் பறிமுதல் செய்யப்பட்டுள்ளன. இந்த சதி, டில்லி தாக்குதலுக்கு மட்டுமல்லாமல், பிற பெரிய நகரங்களையும் குறிவைத்திருந்தது.

முக்கிய கைதியான முஸம்மில் கனியின் (Muzammil Ganaie) செல்போனில் இருந்து கிடைத்த தகவல்கள், புலனாய்வு அமைப்புகளுக்கு பெரும் குறியீடாக மாறியுள்ளன. அவரது வாக்குமூலத்தில், தீபாவளிக்கு (அக்டோபர் 2025) தாக்குதல் நடத்த திட்டமிட்டோம். டில்லியில் மக்கள் அதிகம் திரளும் இடங்களை ஆய்வு செய்தோம். ஆனால், கடைசி நேரத்தில் போலீஸ் சோதனைகள் தீவிரமடைந்ததால் திட்டம் ரத்தானது என்று அவர் கூறியுள்ளார். 

அதன் பிறகு, குடியரசு தினமான ஜனவரி 26, 2026 அன்று தாக்குதல் நடத்த வேண்டும் என்று முடிவு செய்தோம். டில்லியில் சேனா பவன், விமானப்படை அலுவலகம், பாஜக தலைமை அலுவலகம், புது தில்லி நாடாளுமன்ற சாலை போன்ற முக்கிய இடங்களை இலக்காகக் குறிவைத்தோம் என்றும் தெரிவித்தார். 

மேலும், அயோத்தியின் ராமர் கோயில், காசி விஸ்வநாதர் கோயில் போன்றவையும் இலக்கு பட்டியலில் இருந்தன என்று வாக்குமூலத்தில் தெரிவித்துள்ளான். போலீஸ் சோதனைகள் தீவிரமடைந்ததால், திட்டத்தை மாற்றி, டில்லியில் அவசர தாக்குதல் நடத்தினோம் என்று முஸம்மில் தெரிவித்ததாக உளவுத்துறை வட்டாரங்கள் தெரிவிக்கின்றன.

விசாரணையில், பயங்கரவாதிகள் கடந்த இரண்டு ஆண்டுகளில் அதிக அளவு அமோனியம் நைட்ரேட்டை குவித்து வைத்திருந்தனர் என்பது தெரியவந்துள்ளது. டில்லி குண்டுவெடிப்புக்கான வெடிபொருட்கள் கடந்த 30 நாட்களில் தயாரிக்கப்பட்டன. 

கைது செய்யப்பட்ட டாக்டர்களில் ஷஹீன் ஷயீதின் உரையாடல்களில், குண்டுவெடிப்புக்கு 'தாவத்' (Dawat), வெடிபொருளுக்கு 'பிரியாணி' (Biryani) என்ற குறியீடு வார்த்தைகள் பயன்படுத்தப்பட்டதாக கண்டுபிடிக்கப்பட்டுள்ளது. "தாவத் கே லியே பிரியானை தாய்யார் ஹை (வெடிபொருள் வெடிப்பதற்கு தயாராக உள்ளது)" என்ற செய்தி அவரது அரட்டையில் கிடைத்தது. இது, சதி திட்டத்தை அம்பலப்படுத்தி உள்ளது.

இதுவரை விசாரணையில், டெல்லி பயங்கரவாத குண்டுவெடிப்பு தொடர்பாக சுமார் 1,500 பேர் கைது செய்யப்பட்டுள்ளனர். போலீஸ், என்ஐஏ, தேசிய பாதுகாப்பு படை (NSG) ஆகியவை இணைந்து விசாரிக்கின்றன. UAPA (உளவுத்துறை தடுப்புச் சட்டம்) பதிவு செய்யப்பட்டுள்ளது. இந்த சதி, JeM-ன் 'ஜமாத் உல் முமினாத்' என்ற பெண்கள் பிரிவை இந்தியாவில் வலுப்படுத்தும் முயற்சியின் பகுதியாக இருக்கலாம். ஷஹீன் ஷயீத், இந்த பிரிவின் இந்திய தலைவராக இருந்ததாகக் கூறப்படுகிறது. மசூத் அசாரின் சகோதரிகள் சாடியா, சமைரா ஆகியோர் ஆன்லைன் மூலம் மூளைச்சலவை செய்ததாக தெரியவந்துள்ளது.

இந்த சம்பவம், இந்தியாவின் பாதுகாப்பு அமைப்புகளுக்கு பெரும் சவாலாக அமைந்துள்ளது. படித்த தொழில்முறை வாசிகளை 'வெள்ளை காலர்' பயங்கரவாதிகளாக பயன்படுத்தும் JeM-ன் உத்தி, புதிய அச்சுறுத்தலாக உள்ளது. மத்திய உள்துறை அமைச்சர் அமித் ஷா, "இந்த சதியை முழுமையாக முறியடிப்போம்" என்று உறுதியளித்துள்ளார். 

இதையும் படிங்க: டெல்லி கார்வெடிப்பு! சதிகார டாக்டர்களுக்கு மூளையாக செயல்பட்ட மதகுரு கைது!!