கைதிகள் தப்பியதன் எதிரொலி.! அதிரடி நடவடிக்கைகள்..! சிறைத்துறை டிஜிபி சந்தீப் ராய் ரத்தோர் மாற்றம்.!

தேனி மாவட்டம் ஆண்டிபட்டி அருகே உள்ள தேக்கம்பட்டி மாவட்டச் சிறையில் அக்டோபர் 26 ஆம் தேதி இரவு நடந்த கைதிகள் தப்பிச் சென்ற சம்பவம் தமிழகம் முழுவதும் பெரும் அதிர்ச்சியை ஏற்படுத்தியது. அங்கீகரிக்கப்பட்ட கொள்ளளவு 200 ஆக உள்ள அந்தச் சிறையில் 334 கைதிகள் அடைக்கப்பட்டிருந்தனர். மூன்றாவது பிளாக்கில் ஒரே அறையில் இருந்த 17 விசாரணைக் கைதிகள், ஒருவருக்கு வலிப்பு நோய் ஏற்பட்டதாக நாடகமாடி சிறைக் காவலர்களை உள்ளே அழைத்தனர். உள்ளே வந்த காவலர்களைத் தாக்கி சாவியைப் பறித்துக்கொண்டு, பிரதான நுழைவாயில் வழியாகத் தப்பி ஓடினர்.

அப்போது பாதுகாப்புப் பணியில் இருந்தவர்களின் எண்ணிக்கை குறைவாக இருந்ததும், கண்காணிப்புக் கோபுரங்கள் காலியாக இருந்ததும், வாயில் திறந்தே இருந்ததும் சம்பவத்தை எளிதாக்கியது.தப்பிய 17 கைதிகளையும் பிடிக்க 17 தனிப்படைகள் அமைக்கப்பட்டு, ட்ரோன் கண்காணிப்புடன் தீவிரத் தேடுதல் நடைபெற்றது. அண்டை மாவட்டங்கள் மற்றும் கேரள எல்லைப் பகுதிகளிலும் சோதனைச் சாவடிகள் அமைக்கப்பட்டன. சில மணி நேரங்களிலேயே சிலர் பிடிக்கப்பட்டனர். காடுகளிலும் சாலைகளிலும் மீதமுள்ளவர்கள் கண்டுபிடிக்கப்பட்டு, இரண்டு நாட்களுக்குள் அனைவரும் மீண்டும் கைது செய்யப்பட்டனர்.

சிலர் மக்களாலும் பிடித்துக் கொடுக்கப்பட்டனர்.இந்தச் சம்பவம் சிறைத்துறையின் பாதுகாப்பு முறைகளில் உள்ள குறைபாடுகளை வெளிச்சத்திற்குக் கொண்டு வந்தது. சிறைத்துறை தலைவராக இருந்த சந்தீப் ராய் ரத்தோர் உடனடியாக தேனிக்குச் சென்று ஆய்வு மேற்கொண்டார். பாதுகாப்புப் பணியில் அலட்சியம் காட்டிய ஒன்பது சிறைக் காவலர்களைப் பணியிடை நீக்கம் செய்தார். மனிதத் தவறே இதற்குக் காரணம் என்றும், பாதுகாப்பு நெறிமுறைகள் மீறப்பட்டதாகவும் அவர் கூறினார். மேலும், சிறைகளில் காவலர்களைத் தாக்கித் தப்ப முயலும் கைதிகளைச் சூழ்நிலைக்கு ஏற்ப சுட்டுப்பிடிக்கலாம் என்ற உத்தரவையும் பிறப்பித்தார். கண்காணிப்புக் கோபுரங்களில் ஆயுதம் ஏந்திய காவலர்களை நிறுத்தவும், அலாரம் அமைப்புகளைச் செயல்படுத்தவும் உத்தரவிட்டார். தமிழகம் முழுவதும் உள்ள சிறைகளில் பாதுகாப்புத் தணிக்கை நடத்தவும் அறிவுறுத்தப்பட்டது.

இதையும் படிங்க: கடனில் பொதுத் துறை.! படுகுழியில் தமிழ்நாடு.! பதில் சொல்லுங்க CM.! வேல்முருகன் கேள்வி.!

இந்த நிகழ்வின் எதிரொலியாக அரசு நிர்வாக மாற்றங்களை மேற்கொண்டது. சிறைத்துறை தலைவராக இருந்த சந்தீப் ராய் ரத்தோர் பணியிட மாற்றம் செய்யப்பட்டார். அவர் தமிழ்நாடு மின்சார வாரியத்தின் முதன்மை விழிப்புணர்வு அதிகாரியாக நியமிக்கப்பட்டார். அவரது இடத்தில் கே. ஷங்கர் ஐபிஎஸ் சிறைத்துறையின் புதிய தலைவராக நியமனம் செய்யப்பட்டார். இதனால் சிறைத்துறையின் நிர்வாகம் புதிய கைகளுக்கு மாறியது.இதற்கிடையே காவல்துறையிலும் சில மாற்றங்கள் அறிவிக்கப்பட்டன. தென்காசி மாவட்ட காவல் கண்காணிப்பாளராக ஸ்டாலின் ஐபிஎஸ் நியமிக்கப்பட்டார். கரூர் மற்றும் தென்காசி மாவட்டங்களின் கண்காணிப்பாளர்களும் மாற்றம் செய்யப்பட்டனர்.

இதையும் படிங்க: அடிச்சது ஜாக்பாட்..! அரசு வேலை தேடுவோருக்கு குட் நியூஸ்..! TANGEDCO-வில் காலியிடங்கள் நிரப்ப அனுமதி.!!