வாக்குப்பதிவு தினத்தன்று ஊழியர்களுக்கு சம்பளத்துடன் லீவு..!! அதிரடி காட்டிய எலக்ஷன் கமிஷன்..!!

இந்தியத் தேர்தல் ஆணையம் அறிவித்துள்ள முக்கிய செய்தி ஒன்று பல மாநிலங்களில் வாக்காளர்களுக்கு பெரும் நன்மையை வழங்குகிறது. அசாம், கேரளா, புதுச்சேரி, தமிழ்நாடு மற்றும் மேற்கு வங்காளம் ஆகிய ஐந்து மாநிலங்களில் சட்டப்பேரவைப் பொதுத் தேர்தல்கள் நடைபெற உள்ளன. மேலும், கோவா, குஜராத், கர்நாடகா, மகாராஷ்டிரா, நாகாலாந்து மற்றும் திரிபுரா ஆகிய மாநிலங்களில் 8 சட்டப்பேரவைத் தொகுதிகளுக்கு இடைத்தேர்தல்களும் அறிவிக்கப்பட்டுள்ளன.

இந்தத் தேர்தல்களை முன்னிட்டு, மக்கள் பிரதிநிதித்துவச் சட்டம் 1951-ன் பிரிவு 135B-ஐ முழுமையாக அமல்படுத்துமாறு தேர்தல் ஆணையம் அனைத்து மாநில அரசுகளுக்கும் உத்தரவு பிறப்பித்துள்ளது. இந்தப் பிரிவின்படி, வாக்களிக்கத் தகுதியுள்ள ஒவ்வொரு ஊழியருக்கும் வாக்குப்பதிவு நாளன்று ஊதியத்துடன் கூடிய விடுமுறை வழங்க வேண்டும்.

இந்த விடுமுறை வணிக நிறுவனங்கள், தொழிற்சாலைகள், வர்த்தக அமைப்புகள், அரசு மற்றும் தனியார் துறை நிறுவனங்கள் உள்ளிட்ட அனைத்து வேலைத்தளங்களிலும் பணிபுரியும் ஊழியர்களுக்குப் பொருந்தும். வாக்காளராகப் பதிவு செய்யப்பட்டிருந்தால், அவர் தனது தொகுதிக்கு வெளியே வேலை செய்தாலும் இந்த உரிமை அவருக்கு உண்டு.

இதையும் படிங்க: தேர்தல் ஆணையம் அதிரடி! தமிழக புதிய டிஜிபியாக சந்தீ ராய் ரத்தோர் நியமனம்!

தினக்கூலித் தொழிலாளர்கள் மற்றும் தற்காலிக ஊழியர்களும் இந்தப் பலனை முழுமையாகப் பெறத் தகுதியுடையவர்கள் ஆவர். முக்கியமாக, இந்த விடுமுறைக்காக ஊழியர்களின் சம்பளத்தில் எந்தவிதமான பிடித்தமும் செய்யக்கூடாது. வாக்குப்பதிவு நாளில் வேலை செய்ய வைப்பதன் மூலம் ஊழியர்களின் வாக்குரிமையை பாதிக்கும் எந்த முதலாளியும் சட்டப்படி அபராதத்திற்கு உள்ளாக நேரிடும்.

தேர்தல் ஆணையம் இந்த விதிமுறைகளை கண்டிப்புடன் பின்பற்றுமாறு அனைத்து மாநிலங்கள் மற்றும் யூனியன் பிரதேச அரசுகளுக்கு வலியுறுத்தியுள்ளது. வாக்காளர்கள் அனைவரும் எந்த அழுத்தமும் இன்றி, சுதந்திரமாகவும் வசதியாகவும் தங்கள் வாக்குரிமையைப் பயன்படுத்துவதை உறுதி செய்ய வேண்டும் என்பதே இதன் நோக்கமாகும்.

இந்த நடவடிக்கை மூலம் லட்சக்கணக்கான ஊழியர்கள், குறிப்பாக தொழிற்சாலைகள், கடைகள், அலுவலகங்கள், ஹோட்டல்கள், போக்குவரத்துத் துறை உள்ளிட்ட பல்வேறு துறைகளில் பணிபுரிபவர்கள் தங்கள் ஓட்டுப் பதிவு உரிமையை முழுமையாகப் பயன்படுத்த முடியும். தேர்தல் ஆணையத்தின் இந்த உத்தரவு ஜனநாயகத்தை வலுப்படுத்தும் முக்கிய அம்சமாகக் கருதப்படுகிறது.
 

இதையும் படிங்க: ஒருவழியாக கிடைத்த அனுமதி! மார்ச் 30-ல் பெரம்பூரில் விஜய் பிரசாரம்!