உலகின் மகிழ்ச்சியான நாடுகளில் இந்தியாவுக்கு எத்தனையாவது இடம்? முதல் நாடு எது தெரியுமா?

உலகில் மகிழ்ச்சியான நாடுகளின் பட்டியலில் பின்லாந்து தொடர்ந்து ஆதிக்கம் செலுத்தி வருகிறது. ஆக்ஸ்போர்டு பல்கலைக்கழகத்தின் நல்வாழ்வு ஆராய்ச்சி மையம் வெளியிட்ட உலக மகிழ்ச்சி அறிக்கை 2026-ல் பின்லாந்து 9-வது முறையாக முதலிடத்தைப் பிடித்துள்ளது. 10 புள்ளிகளுக்கு மேல் மதிப்பிடப்படும் அளவீட்டில் பின்லாந்து 7.76 புள்ளிகள் பெற்று உலகின் மகிழ்ச்சியான நாடாக அறிவிக்கப்பட்டுள்ளது.

சர்வதேச மகிழ்ச்சி தினத்தையொட்டி ஒவ்வொரு ஆண்டும் வெளியிடப்படும் இந்த அறிக்கையில் உலகின் 147 நாடுகள் இடம்பெற்றுள்ளன. மக்களின் வாழ்க்கைத் தரம், சமூக ஆதரவு, சுகாதார வசதி, சுதந்திரம், பெருந்தன்மை, ஊழல் பற்றிய எண்ணம் மற்றும் மொத்த உள்நாட்டு உற்பத்தி (GDP) உள்ளிட்ட பல்வேறு அம்சங்கள் ஆய்வுக்கு எடுத்துக்கொள்ளப்பட்டன. மக்களிடம் நேரடியாகக் கருத்து கேட்டு தரவுகள் சேகரிக்கப்பட்டன.

பின்லாந்தைத் தொடர்ந்து ஐஸ்லாந்து 2-வது இடத்திலும், டென்மார்க் 3-வது இடத்திலும், கோஸ்டாரிகா 4-வது இடத்திலும் உள்ளன. முதல் 10 இடங்களில் பெரும்பாலும் ஐரோப்பிய நாடுகளே ஆதிக்கம் செலுத்துகின்றன. சுவிட்சர்லாந்து மீண்டும் முதல் 10-க்குள் 10-வது இடத்தில் நுழைந்துள்ளது. கொசோவோ, ஸ்லோவேனியா, செக் குடியரசு போன்ற நாடுகள் நல்ல முன்னேற்றத்தைக் காட்டியுள்ளன.

இதையும் படிங்க: கத்தார் மீண்டும் மீது கை வச்சீங்க! அவ்வளவு தான்!! ஈரானுக்கு அமெரிக்க அதிபர் ட்ரம்ப் வார்னிங்!

இந்தியா இந்த ஆண்டு 116-வது இடத்தைப் பிடித்துள்ளது. கடந்த 2025-ல் 118-வது இடத்தில் இருந்த நிலையில், இந்த ஆண்டு இரண்டு இடங்கள் முன்னேறியுள்ளது. இது சிறிய முன்னேற்றமாகக் கருதப்பட்டாலும், இந்தியாவின் வாழ்க்கைத் தரம், சமூக ஆதரவு மற்றும் சுகாதாரம் தொடர்பான பிரச்சினைகள் இன்னும் முழுமையாக தீர்க்கப்படவில்லை என்பதை இது காட்டுகிறது.

மகிழ்ச்சியான நாடுகளின் பட்டியலில் ஆப்கானிஸ்தான் கடைசி இடத்தில் உள்ளது. மலாவி, ஜிம்பாப்வே, லெபனான் உள்ளிட்ட நாடுகளும் கடைசி 10 இடங்களில் இடம்பெற்றுள்ளன.

வாழ்க்கையில் மகிழ்ச்சி என்பது பணம் மட்டுமல்ல; சமூக உறவுகள், உடல் நலம், சுதந்திரம் மற்றும் நம்பிக்கை ஆகியவை முக்கியம் என்பதை இந்த அறிக்கை மீண்டும் நினைவூட்டுகிறது. இந்தியா தனது மக்களின் மகிழ்ச்சியை அதிகரிக்க பல்வேறு சமூக மற்றும் பொருளாதார நடவடிக்கைகளை விரைவாக எடுக்க வேண்டிய நேரம் இது.

இதையும் படிங்க: திடீர் திருப்பம்... தூத்துக்குடி மாணவி வழக்கில் கைதான நபர் மருத்துவமனையில் அனுமதி...!