கான்ஸ்டபிள் மீது மோதிய வாகனம்.. ராகுல் காந்தியின் டிரைவர் மீது பாய்ந்த FIR..!!
கான்ஸ்டபிள் மீது வாகனம் மோதிய விவகாரத்தில் ராகுல் காந்தியின் வாகன ஓட்டுநருக்கு எதிராக எப்.ஐ.ஆர் பதிவு செய்யப்பட்டுள்ளது.
by
பீகாரின் நவாதா மாவட்டத்தில், காங்கிரஸ் மூத்த தலைவர் ராகுல் காந்தி மற்றும் ஆர்ஜேடி தலைவர் தேஜஸ்வி யாதவ் ஆகியோர் பயணித்த வாகனம், ‘வாக்காளர் உரிமை யாத்திரை’யின்போது (Voter Adhikar Yatra) ஒரு காவலரை மோதிய சம்பவம் பரபரப்பை ஏற்படுத்தியுள்ளது. கடந்த ஆகஸ்ட் 19ம் தேதி நவாதாவில் உள்ள பகத் சிங் சவுக்கில் நடந்த இந்த விபத்தில், காவலர் ஒருவர் காலில் காயமடைந்தார்.
கூட்ட நெரிசலால் மெதுவாகச் சென்ற வாகனத்தின் முன் காவலர் தடுமாறி விழுந்ததாகவும், வாகனம் அவரது காலை "லேசாக உரசியதாகவும்" நவாதா எஸ்பி அபினவ் திமான் தெரிவித்தார். காயமடைந்த காவலருக்கு உடனடியாக மருத்துவ பரிசோதனைக்கு அனுப்பப்பட்டு, எக்ஸ்-ரே மூலம் காயத்தின் தன்மை உறுதி செய்யப்பட்டது.
இதையும் படிங்க: ஜெகதீப் ராஜினாமாவுக்கு பின்னால் மறைந்திருக்கும் கதை! ராகுல்காந்தி முன்வைக்கும் குற்றச்சாட்டு!!
ராகுல் காந்தி, திறந்தவெளி ஜீப்பில் நின்றிருந்தபோது, காயமடைந்த காவலருக்கு தண்ணீர் வழங்கி, அவரை வாகனத்தில் அமரவைத்து நலம் விசாரித்தார். இருப்பினும், இந்தச் சம்பவத்தை பாஜக கடுமையாக விமர்சித்து, “வாக்காளர் உரிமை யாத்திரை, மக்கள் மீது மோதும் யாத்திரையாக மாறியது” எனக் குற்றம்சாட்டியது.
பாஜக செய்தித் தொடர்பாளர் ஷெஹ்சாத் பூனவல்லா, “ராகுலின் வாகனம் காவலரை ‘நசுக்கியது’, அவர் வெளியே இறங்கி நலம் விசாரிக்கவில்லை” என சமூக வலைதளத்தில் வீடியோவுடன் பதிவிட்டார். இதற்கு பதிலளித்த காங்கிரஸ் செய்தித் தொடர்பாளர் ஆசித் நாத் திவாரி, பாஜக பொய் பரப்புவதாக குற்றம்சாட்டினார்.
இந்நிலையில், ராகுல் காந்தியின் வாகன ஓட்டுநருக்கு எதிராக எப்.ஐ.ஆர். பதிவு செய்யப்பட்டு உள்ளது. இதனை நவாடா போலீஸ் சூப்பிரெண்டு அபினவ் திமான் செய்தியாளர்களிடம் இன்று கூறியதுடன், பிற விவரங்கள் தேவைப்படும் நேரத்தில் வெளியிடப்படும் என்று கூறினார்.
ராகுல் காந்தியின் யாத்திரை, வாக்காளர் உரிமைகளை வலியுறுத்துவதற்காக மேற்கொள்ளப்பட்டது. ஆனால், இந்த நிகழ்வு பொதுமக்கள் மற்றும் அரசியல் கட்சிகளிடையே விவாதத்தை தூண்டியுள்ளது. சிலர் இதை தற்செயலான சம்பவமாக கருதினாலும், பாஜகவைச் சேர்ந்தவர்கள் இதை அரசியல் களத்தில் விமர்சனமாக பயன்படுத்தி வருகின்றனர். காவல்துறையினர், இந்த விவகாரத்தில் மேலதிக விசாரணை மேற்கொண்டு வருவதாகவும், ஓட்டுநரை விசாரணைக்கு அழைக்க வாய்ப்புள்ளதாகவும் தெரிவித்துள்ளனர்.
இந்த யாத்திரை, பீகாரில் வாக்காளர் பட்டியல் முறைகேடுகளுக்கு எதிராக காங்கிரஸ் மற்றும் இந்தியா கூட்டணி நடத்தும் 16 நாள் பயணமாகும், இது செப்டம்பர் 1 அன்று பாட்னாவில் முடிவடையும். இந்தச் சம்பவத்தால் யாத்திரையின் மீதான அரசியல் விவாதங்கள் மேலும் தீவிரமடைந்துள்ளன.
இதையும் படிங்க: வாக்கு திருட்டு விவகாரம்!! வசமாய் சிக்கிய ராகுல்!! ஆதாரத்துடன் முகத்தில் கரி பூசிய தேர்தல் ஆணையம்!!
