முன்னாள் மத்திய ரயில்வே அமைச்சர் முகுல் ராய் மறைவு..!! பிரதமர் மோடி இரங்கல்..!!

முன்னாள் மத்திய ரயில்வே அமைச்சரும், மேற்கு வங்காள அரசியலில் முக்கிய பங்காற்றியவருமான முகுல் ராய் இன்று (பிப்ரவரி 23, 2026) அதிகாலை கொல்கத்தாவில் உயிரிழந்தார். அவருக்கு வயது 71. சால்ட் லேக் பகுதியில் உள்ள அப்போலோ மல்டிஸ்பெஷாலிட்டி மருத்துவமனையில் சிகிச்சை பெற்று வந்த முகுல் ராய், அதிகாலை 1.30 மணியளவில் மாரடைப்பால் காலமானதாக அவரது மகன் சுப்ரான்ஷு ராய் உறுதிப்படுத்தினார். 

கடந்த சில ஆண்டுகளாக பல்வேறு உடல்நல பிரச்னைகளால் அவதிப்பட்டு வந்த அவர், கடந்த இரண்டு ஆண்டுகளாக தீவிர சிகிச்சையில் இருந்தார். ஞாபக மறதி நோய் (டிமென்ஷியா) உள்ளிட்ட பிரச்னைகளும் அவருக்கு இருந்ததாக மருத்துவர்கள் தெரிவித்தனர். சமீபத்தில் அவர் கோமா நிலைக்கு சென்றிருந்ததாக குடும்ப வட்டாரங்கள் தெரிவித்தன. 

இதையும் படிங்க: தமிழகத்தின் சட்டம் ஒழுங்கை பாதுகாத்தவர் ஜெயலலிதா - மனதின் குரல் நிகழ்ச்சியில் பிரதமர் நெகிழ்ச்சி!

மேற்கு வங்காள முதலமைச்சர் மம்தா பானர்ஜியின் நெருங்கிய ஆலோசகராகவும், வலது கையாகவும் பல ஆண்டுகள் திகழ்ந்தவர் முகுல் ராய். அனைத்திந்திய திரிணாமுல் காங்கிரஸ் (டிஎம்சி) கட்சியின் நிறுவன உறுப்பினர்களில் ஒருவரான இவர், கட்சியின் முதன்மை உத்தி வகுப்பாளராக (சானக்யா என்று அழைக்கப்பட்டவர்) புகழ் பெற்றார். மம்தா பானர்ஜியுடன் இணைந்து கட்சியை வளர்த்தெடுத்ததில் அவரது பங்கு மிக முக்கியமானது.

அரசியல் பயணத்தில், இவர் இரண்டு முறை மாநிலங்களவை உறுப்பினராகவும், மத்திய ரயில்வே அமைச்சராகவும் (2011-2012) பதவி வகித்தார். பின்னர் கட்சியில் ஏற்பட்ட கருத்து வேறுபாடுகளால் 2017-இல் பாஜகவில் இணைந்து, மேற்கு வங்காளத்தில் பாஜகவின் வளர்ச்சிக்கு உதவியவர். 2021-இல் மீண்டும் திரிணாமுல் காங்கிரஸுக்கு திரும்பினார். கிருஷ்ணநகர் உத்தர தொகுதியில் சட்டமன்ற உறுப்பினராகவும் பணியாற்றியுள்ளார்.

முகுல் ராயின் மறைவு மேற்கு வங்காள அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது. இந்நிலையில் அவரது மறைவுக்கு பிரதமர் நரேந்திர மோடி ஆழ்ந்த இரங்கல் தெரிவித்துள்ளார். தனது எக்ஸ் (ட்விட்டர்) பதிவில், "முன்னாள் மத்திய அமைச்சர் முகுல் ராயின் மறைவால் மிகுந்த வேதனை அடைந்தேன். அவரது விரிவான அரசியல் அனுபவமும், சமூக சேவை முயற்சிகளும் என்றும் நினைவுகூரப்படும். அவரது குடும்பத்தினருக்கும், ஆதரவாளர்களுக்கும் எனது ஆழ்ந்த இரங்கலை தெரிவித்துக் கொள்கிறேன்" என்று குறிப்பிட்டுள்ளார்.

மேற்கு வங்காள முதலமைச்சர் மம்தா பானர்ஜி உள்ளிட்ட பல அரசியல் தலைவர்களும், கட்சி நிர்வாகிகளும் இரங்கல் தெரிவித்து வருகின்றனர். முகுல் ராயின் உடல் மருத்துவமனையிலிருந்து அவரது இல்லத்திற்கு கொண்டு செல்லப்பட்டு, பின்னர் இறுதிச் சடங்குகள் நடைபெறவுள்ளன. மேற்கு வங்க அரசியலில் பல திருப்புமுனைகளை ஏற்படுத்திய மூத்த தலைவரின் மறைவு, அவரது பங்களிப்புகளை மீண்டும் நினைவூட்டியுள்ளது. அவரது ஆலோசனைகளும், உத்திகளும் திரிணாமுல் காங்கிரஸின் வெற்றிகளில் முக்கிய பங்காற்றியவை என்பது குறிப்பிடத்தக்கது.

இதையும் படிங்க: பிரதமர் மோடி-பிரேசில் அதிபர் சந்திப்பு..!! சீரியசாக நடந்த பேச்சுவார்த்தை..!! என்ன டிஸ்கஷன் தெரியுமா..??