இந்தியாவுக்கான பிரத்யேக Free Fire ரிலீஸ்..!! அசத்தல் அம்சங்கள் முதல் டவுன்லோடு செய்வது வரை முழு விவரங்கள் இதோ!!
மேக்ஸ் பதிப்பு உயர் நிலை ஸ்மார்ட்போன்களுக்காகத் தொடர்ந்து கிடைக்கும் என்றும் நிறுவனம் தெரிவித்துள்ளது.
- Wed, 28 Oct 2026 14:27:26 IST
by
Shanthi M.
- #
இந்திய கேம் பிரியர்களிடையே பெரும் வரவேற்பைப் பெற்று வரும் பேட்டில் ராயல் கேம் ஃப்ரீ ஃபயரின் (Free Fire) இந்தியாவுக்கான பிரத்யேக பதிப்பை கரீனா நிறுவனம் இன்று (அக்டோபர் 28) அதிகாரப்பூர்வமாக வெளியிட்டுள்ளது. இது கூகுள் ப்ளே ஸ்டோர் மற்றும் ஆப்பிள் ஆப் ஸ்டோரில் இலவசமாகப் பதிவிறக்கம் செய்யக் கிடைக்கிறது.
2021ஆம் ஆண்டு கரீனா நிறுவனம் ஃப்ரீ ஃபயர் மேக்ஸ் என்ற மேம்பட்ட பதிப்பை அறிமுகப்படுத்தியது. அதைத் தொடர்ந்து 2022இல் சீன செயலிகளுடன் சேர்த்து அசல் ஃப்ரீ ஃபயர் இந்தியாவில் தடை செய்யப்பட்டது. அதனால் இந்திய வீரர்கள் மேக்ஸ் பதிப்பை மட்டுமே பயன்படுத்தி வந்தனர். இப்போது இந்தியச் சந்தையை முழுமையாகக் கருத்தில் கொண்டு தனித்துவமான ஃப்ரீ ஃபயர் இந்தியா (Free Fire India) என்ற ஸ்டாண்டலோன் ஆப் வெளியிடப்பட்டுள்ளது. மேக்ஸ் பதிப்பு உயர் நிலை ஸ்மார்ட்போன்களுக்காகத் தொடர்ந்து கிடைக்கும் என்றும் நிறுவனம் தெரிவித்துள்ளது.
புதிய பதிப்பில் மேம்படுத்தப்பட்ட கிராபிக்ஸ், இந்தியப் பண்பாட்டைப் பிரதிபலிக்கும் உள்ளடக்கங்கள் மற்றும் பலதரப்பட்ட ஸ்மார்ட்போன்களுக்கான ஆதரவு ஆகியவை இடம்பெற்றுள்ளன. குறைந்த விவரக்குறிப்புள்ள போன்களிலும் மென்மையாக இயங்கும் வகையில் வடிவமைக்கப்பட்டுள்ளது. வெளியீட்டை முன்னிட்டு டிவாலி சிறப்பு நிகழ்வு நவம்பர் 15 வரை நடைபெறும். இந்தியாவின் பல்வேறு கலாசாரங்களைக் கொண்டாடும் உள்ளூர் பண்டல்கள் மற்றும் தீம்டு உள்ளடக்கங்கள் இதில் இடம்பெறும்.
இதையும் படிங்க: SCO மாநாடு: ‘ஆபரேஷன் சிந்தூர்’க்குப் பின்.. இந்தியாவின் அழைப்பால் மீண்டும் கவனம் பெறும் இந்தியா - பாக். உறவு!
பொறுப்பான கேமிங்கை ஊக்குவிக்கும் ‘ப்ளே இட் ரைட்’ முன்முயற்சியின் கீழ் பல பாதுகாப்பு அம்சங்கள் சேர்க்கப்பட்டுள்ளன. 18 வயதுக்குட்பட்டோருக்கு பெற்றோர் அல்லது பாதுகாவலரின் ஒப்புதல் (மொபைல் எண் மூலம் OTP சரிபார்ப்பு) அவசியம். விளையாடும்போது இடைவேளை நினைவூட்டல்கள் வழங்கப்படும். தினசரி விளையாட்டு நேர உச்சவரம்பு பெரியவர்களுக்கு ஆறு மணி நேரமும், 18 வயதுக்குட்பட்டோருக்கு மூன்று மணி நேரமுமாக நிர்ணயிக்கப்பட்டுள்ளது.
செலவுக் கட்டுப்பாடுகளும் உள்ளன. மேலும், விளையாட்டு சர்வர்கள் இந்தியாவிலேயே ஹோஸ்ட் செய்யப்பட்டுள்ளன. பயனர் தரவுகள் உள்ளூரிலேயே பாதுகாக்கப்படும் என்றும், அரசு தொடர்பான கருத்துக்களைக் கருத்தில் கொண்டு இந்தப் பதிப்பு தயாரிக்கப்பட்டதாகவும் கரீனா தெரிவித்துள்ளது.
இந்திய கேமிங் சமூகத்துடன் நீண்டகால உறவை வலுப்படுத்தும் நோக்கில் இந்த முயற்சி மேற்கொள்ளப்பட்டுள்ளது என நிறுவனத்தின் இந்தியா செயல்பாட்டுத் தலைவர் வைபவ் தாஸ் முந்த்ரா கூறியுள்ளார். கூடுதல் தகவல்களுக்கு https://ffindia.garenaind.com/ என்ற அதிகாரப்பூர்வ இணையதளத்தைப் பார்வையிடலாம்.
இந்த வெளியீடு இந்திய கேமர்களுக்கு நீண்டகால எதிர்பார்ப்புக்கு முடிவுகட்டியுள்ளதுடன், பாதுகாப்பான மற்றும் உள்ளூர்மயமாக்கப்பட்ட கேமிங் அனுபவத்தையும் வழங்குகிறது.
இதையும் படிங்க: பெண்கள் பாதுகாப்புக்கு அவசர நடவடிக்கை: மாநில அரசுகளுக்கு மனித உரிமைகள் ஆணையம் ஆணை!
