ஞானேஷ் குமாருக்கு வலுக்கும் எதிர்ப்பு... சட்ட நடவடிக்கைக்கு தொடர் வலியுறுத்தல்... உச்ச நீதிமன்றத்தை நாடிய விவகாரம்..!!

தலைமைத் தேர்தல் ஆணையர் ஞானேஷ் குமார் மீது உச்ச நீதிமன்றத்தில் ஒரு முக்கிய மனு தாக்கல் செய்யப்பட்டுள்ளது. மற்ற இரு தேர்தல் ஆணையர்களின் ஒப்புதல் இல்லாமல் தன்னிச்சையாக செயல்பட்டதாகக் குற்றம் சாட்டப்பட்டுள்ள அவர் மீது சட்ட நடவடிக்கை எடுக்க வேண்டும் என்று மனுவில் கோரப்பட்டுள்ளது. மக்கள் பிரதிநிதித்துவச் சட்டத்தின் 32-வது பிரிவின் கீழ் நடவடிக்கை எடுக்க வேண்டும் என்பதே மனுதாரரின் முக்கிய கோரிக்கை.இந்த மனு, வாக்காளர் பட்டியலின் சிறப்பு தீவிர திருத்த நடவடிக்கை (SIR) தொடர்பான பல்வேறு முடிவுகளைச் சுற்றி எழுந்துள்ள சர்ச்சையை அடிப்படையாகக் கொண்டது.

தேர்தல் ஆணையத்தின் உள்ளே கடந்த பத்து மாதங்களில் பல முக்கிய முடிவுகள் மற்ற இரு ஆணையர்களான சுக்பீர் சிங் சந்து மற்றும் விவேக் ஜோஷி ஆகியோரின் அறிவுக்கோ அல்லது ஒப்புதலுக்கோ இன்றி எடுக்கப்பட்டதாகக் குற்றம் சாட்டப்பட்டுள்ளது. அவர்கள் குறைந்தது பதினான்கு முறை அதிகாரப்பூர்வமாக ஆட்சேபனை தெரிவித்திருப்பதாகத் தகவல்கள் வெளியாகியுள்ளன. இந்த ஆட்சேபனைகள் வாக்காளர் பதிவு படிவம் 6-இல் செய்யப்பட்ட மாற்றங்கள், வாக்காளர் தரவுத்தளங்களை மையப்படுத்தியது,

வாக்காளர் பெயர்களை நீக்குதல் மற்றும் மீண்டும் சேர்த்தல் தொடர்பான நடைமுறைகள் உள்ளிட்டவற்றைச் சுற்றியே அமைந்திருந்தன.மனுவில் குறிப்பிடப்பட்டுள்ளபடி, படிவம் 6 என்பது சட்டப்பூர்வமான படிவம். அதை விதிகளில் திருத்தம் செய்யாமல் மாற்றுவது சட்டவிரோதமானது என்று மற்ற ஆணையர்கள் எழுத்துப்பூர்வமாகக் கருத்து தெரிவித்திருந்தனர். இருப்பினும் அந்த மாற்றம் அமல்படுத்தப்பட்டதாகக் குற்றம் சாட்டப்படுகிறது. அதேபோல், வாக்காளர் பட்டியல் தொடர்பான மென்பொருள் மற்றும் தரவுத்தள அணுகல் தொடர்பான முடிவுகளும் முழு ஆணையத்தின் ஒப்புதல் இன்றி எடுக்கப்பட்டதாகக் கூறப்படுகிறது. மேற்கு வங்கத்தில் ஏராளமான மேல்முறையீடுகள் தேர்தல் ஆணையத்தின் பெயரில் தாக்கல் செய்யப்பட்டது தொடர்பாகவும் மற்ற ஆணையர்களுக்குத் தகவல் தெரிவிக்கப்படவில்லை என்ற குற்றச்சாட்டும் உள்ளது.

இதையும் படிங்க: ஞானேஷ் குமாருக்கு எதிர்ப்பு... அக்டோபர் 2 முதல் நாடு தழுவிய போராட்டம்..! CJP தலைவர் அபிஜித் தீப்கே அறிவிப்பு.!!

இந்தச் சூழலில் தாக்கல் செய்யப்பட்ட மனுவில், தலைமைத் தேர்தல் ஆணையர் ஞானேஷ் குமார், மூத்த துணைத் தேர்தல் ஆணையர் மற்றும் தகவல் தொழில்நுட்பப் பிரிவு தலைமை இயக்குநர் உள்ளிட்டோர் மீது மக்கள் பிரதிநிதித்துவச் சட்டத்தின் 32-வது பிரிவின் கீழ் புகார் பதிவு செய்து வழக்கு தொடர உத்தரவிட வேண்டும் எனக் கோரப்பட்டுள்ளது. இந்தப் பிரிவு வாக்காளர் பட்டியலைத் தயாரித்தல், திருத்துதல் அல்லது திருத்தம் செய்தல் தொடர்பான அதிகாரப்பூர்வ கடமையை மீறினால் தண்டனை வழங்குவதற்கானது. மேலும், மற்ற இரு ஆணையர்களின் முழுமையான ஒப்புதல் இன்றி அல்லது பெரும்பான்மை கருத்துக்கு மாறாக எடுக்கப்பட்ட அனைத்து முடிவுகள், வழிகாட்டுதல்கள், உத்தரவுகள் மற்றும் மென்பொருள் மாற்றங்களையும் அரசியலமைப்புக்கு எதிரானவை என்றும் செல்லாதவை என்றும் அறிவிக்க வேண்டும் என மனுவில் வலியுறுத்தப்பட்டுள்ளது.

இதையும் படிங்க: தலைமை தேர்தல் ஆணையர் ஞானேஷ்குமாரை உடனே கைது செய்! தொல்.திருமாவளவன் ஆவேச முழக்கம்!