இவர்களின் தனியுரிமையை கட்டாயம் பாதுகாக்கணும்..!! டெல்லி ஐகோர்ட் அதிரடி உத்தரவு..!!

ஆந்திரப் பிரதேச துணை முதல்வரும், நடிகருமான பவன் கல்யாண் மற்றும் முன்னாள் கிரிக்கெட் ஜாம்பவான் சுனில் கவாஸ்கர் ஆகியோரின் புகைப்படங்கள், பெயர் மற்றும் உருவங்களை முன் அனுமதியின்றி சமூக ஊடக நிறுவனங்கள் பயன்படுத்துவதற்கு தடை விதித்து டெல்லி உயர்நீதிமன்றம் உத்தரவிட்டுள்ளது. இது பிரபலங்களின் ஆளுமை உரிமைகளை (Personality Rights) பாதுகாப்பதில் முக்கியமான தீர்ப்பாகக் கருதப்படுகிறது.

பவன் கல்யாணின் வழக்கில், சமூக ஊடக தளங்களில் அவரது பெயர், புகைப்படங்கள் மற்றும் உருவங்களை அனுமதியின்றி பயன்படுத்தியதாகவும், AI தொழில்நுட்பத்தைப் பயன்படுத்தி போலி வீடியோக்கள் உருவாக்கப்பட்டதாகவும் புகார் அளிக்கப்பட்டது. கூகுள் மற்றும் மெட்டா போன்ற நிறுவனங்களில் அவரைப் போலியாக சித்தரிக்கும் உள்ளடக்கங்கள் பரவியதாக குற்றச்சாட்டு.

இதையும் படிங்க: ராமதாஸ் Vs அன்புமணி: யாருக்கு பாமக? வழக்கை முடித்து வைத்த டெல்லி உயர்நீதிமன்றம்!

இதனைத் தொடர்ந்து, டெல்லி உயர்நீதிமன்ற நீதிபதி மன்மீத் பிரீதம் சிங் அரோரா, சமூக ஊடக நிறுவனங்களுக்கு 7 நாட்களுக்குள் நடவடிக்கை எடுக்க உத்தரவிட்டார். தகவல் தொழில்நுட்ப (இடைநிலை வழிகாட்டுதல்கள் மற்றும் டிஜிட்டல் ஊடக நெறிமுறைகள்) விதிகள், 2021-ஐப் பயன்படுத்தி புகாரை கையாள வேண்டும் என்றும், பவன் கல்யாண் 48 மணி நேரத்திற்குள் சம்பந்தப்பட்ட URL-களை வழங்க வேண்டும் என்றும் நீதிமன்றம் கூறியது. இதுதொடர்பான அடுத்த விசாரணை டிசம்பர் 22-ஆம் தேதி நடைபெறும்.

இதேபோல், சுனில் கவாஸ்கர் தனது ஆளுமை உரிமைகளைப் பாதுகாக்க டெல்லி உயர்நீதிமன்றத்தை அணுகியுள்ளார். இந்திய கிரிக்கெட் வீரர்களில் முதன்முறையாக இத்தகைய வழக்கைத் தொடர்ந்தவர் இவரே. அவரது பெயர், உருவம், புகைப்படங்கள் மற்றும் பிற அம்சங்களை அனுமதியின்றி வணிக ரீதியாக பயன்படுத்துவதைத் தடுக்கக் கோரி மனு தாக்கல் செய்தார். நீதிமன்றம், சமூக ஊடக நிறுவனங்களுக்கு புகாரை விரைவாக கையாள உத்தரவிட்டது. AI உருவாக்கிய போலி உள்ளடக்கங்கள், டீப்ஃபேக் வீடியோக்கள், குரல் க்ளோனிங் போன்ற தொழில்நுட்ப தவறுபாடுகளை நீதிமன்றம் சுட்டிக்காட்டியது. 

இந்த தீர்ப்புகள், பிரபலங்களின் தனியுரிமை மற்றும் வணிக உரிமைகளைப் பாதுகாப்பதில் முக்கிய படியாகக் கருதப்படுகின்றன. ஏற்கனவே அமிதாப் பச்சன், ஐஸ்வர்யா ராய், அபிஷேக் பச்சன், ஹிருத்திக் ரோஷன், கரண் ஜோஹர், சல்மான் கான், என்.டி.ஆர். ஜூனியர் உள்ளிட்ட பலருக்கு இதேபோன்ற இடைக்கால நிவாரணம் வழங்கப்பட்டுள்ளது.

AI தொழில்நுட்பத்தின் வளர்ச்சியால் ஏற்படும் தவறுபாடுகளைத் தடுக்க, நீதிமன்றம் தொடர்ந்து நடவடிக்கைகள் எடுத்து வருகிறது. இது சமூக ஊடக நிறுவனங்களுக்கு பொறுப்புணர்வை ஏற்படுத்தும் என்று சட்ட வல்லுநர்கள் கருத்து தெரிவித்துள்ளனர். இருப்பினும், நகைச்சுவை, கலை வெளிப்பாடு, செய்தி அறிக்கை மற்றும் விமர்சனம் போன்றவற்றுக்கு இந்த தடை பொருந்தாது என்று நீதிமன்றம் தெளிவுபடுத்தியுள்ளது.

இந்த வழக்குகள், டிஜிட்டல் யுகத்தில் பிரபலங்களின் உரிமைகளைப் பாதுகாப்பதற்கான சட்ட கட்டமைப்பை வலுப்படுத்தும் என எதிர்பார்க்கப்படுகிறது. பவன் கல்யாண் மற்றும் கவாஸ்கரின் வழக்குகள், இதுபோன்ற பிரச்னைகளுக்கு முன்னுதாரணமாக அமையும்.

இதையும் படிங்க: மடப்புரம் அஜித் கொலை வழக்கு... சிக்கிய DSP... சிபிஐ குற்றப்பத்திரிகை தாக்கல்...!