பள்ளி சேர்க்கை படிவங்களில் இருந்து சாதி விவரம் நீக்கம்!! இமாச்சல் அரசு அசத்தல்..!!

இமாச்சலப் பிரதேச அரசு, மாநிலத்தில் உள்ள அனைத்து அரசுப் பள்ளிகளிலும் மாணவர் சேர்க்கை படிவங்களில் இருந்து சாதி விவரங்களைக் கோரும் பகுதியை 2027-28 கல்வியாண்டு முதல் முழுமையாக நீக்க உத்தரவிட்டுள்ளது. இந்த முடிவு, சிம்லாவில் நடைபெற்ற பட்டியல் சாதியினர் நல வாரியக் கூட்டத்தில் முதலமைச்சர் சுக்விந்தர் சிங் சுகு தலைமையில் எடுக்கப்பட்டது. கல்வித் துறைக்கு இந்த உத்தரவை அவர் நேரடியாக வழங்கினார்.

முதலமைச்சர் சுகு தெரிவித்தபடி, சாதி அடிப்படையிலான பாகுபாட்டை அடியோடு அகற்றி, சமூகத்தில் சமத்துவம் மற்றும் சகோதரத்துவ உணர்வை வலுப்படுத்துவதே இந்த முடிவின் முக்கிய நோக்கம். “பள்ளிகளில் எந்தக் குழந்தையும் தனது சாதியின் அடிப்படையில் அடையாளப்படுத்தப்படக் கூடாது. இது சாதியை அடிமட்ட நிலையிலிருந்தே கட்டுப்படுத்தும் முயற்சி” என்று அவர் வலியுறுத்தினார். 

சேர்க்கை படிவங்களில் சாதிப் பகுதியை நீக்குவதன் மூலம், சிறுவர்கள் தங்கள் சாதியைப் பற்றி தாழ்வு மனப்பான்மை கொள்வதைத் தடுக்கவும், வகுப்பறைகளில் சமத்துவச் சூழலை உருவாக்கவும் இது உதவும் என்று அவர் விளக்கினார். இந்த உத்தரவால் மாணவர்களுக்கான அரசு சலுகைகள் எவ்விதத்திலும் பாதிக்கப்படாது என்பதை அரசு தெளிவுபடுத்தியுள்ளது. 

இதையும் படிங்க: கரூர் மாநகராட்சி வரி பாக்கி பட்டியலில் திமுக அலுவலகம் 2வது இடம்! அம்மாடியோவ்! எவ்வளவு தெரியுமா?

கல்வி உதவித்தொகை, இடஒதுக்கீடு, பிற நலத்திட்டங்கள் ஆகியவற்றைப் பெற விரும்பும் தகுதியுடைய மாணவர்கள் (குறிப்பாக பட்டியல் சாதி மற்றும் பிற பின்தங்கிய பிரிவினர்) தங்கள் சாதி சான்றிதழ் விவரங்களைத் தனியாகச் சமர்ப்பித்து சலுகைகளைத் தொடர்ந்து பெறலாம். சேர்க்கை படிவங்களில் இந்தத் தகவல் இல்லாவிட்டாலும், நலத்திட்டங்களுக்கான தனி ஏற்பாடுகள் தொடரும். 

கல்விச் செயலர் ராகேஷ் கன்வார், விரைவில் இதற்கான விரிவான கொள்கை மற்றும் செயல்முறை உருவாக்கப்படும் என்று தெரிவித்தார். தகுதியுள்ள எந்த மாணவரும் அரசுத் திட்டங்களில் இருந்து விலக்கப்பட மாட்டார்கள் என்பதை உறுதிப்படுத்தும் வகையில் கொள்கை வரையப்படும் என்றும் அவர் கூறினார். இந்த முடிவு, இமாச்சலப் பிரதேச அரசு சாதி வேறுபாடுகளை நீக்கி சமூக நல்லிணக்கத்தை மேம்படுத்தும் முயற்சியின் ஒரு பகுதியாகக் கருதப்படுகிறது.

பள்ளிகள் அனைத்து மாணவர்களுக்கும் சம வாய்ப்பு வழங்கும் இடமாக மாற வேண்டும் என்ற அரசின் உறுதிப்பாட்டை இது பிரதிபலிக்கிறது. வரும் கல்வியாண்டில் இருந்து இந்த மாற்றம் நடைமுறைக்கு வரும் என்பதால், பள்ளி நிர்வாகங்கள் மற்றும் பெற்றோர்கள் இதற்குத் தயாராக வேண்டும்.

இதையும் படிங்க: வானிலை அப்டேட்! தமிழகத்தின் பல மாவட்டங்களில் பலத்த காற்றுடன் மிதமான மழைக்கு வாய்ப்பு!