ஹார்முஸ் நீரிணை நெருக்கடி: பிரிட்டன் நடத்தும் 35 நாடுகளின் ஆலோசனை கூட்டத்தில் இந்தியா பங்கேற்பு!

உலகப் பொருளாதாரத்தின் மிக முக்கியமான கடல்வழிப் பாதையான ஹார்முஸ் நீரிணையில் (Strait of Hormuz) ஏற்பட்டுள்ள கடும் நெருக்கடி குறித்து ஆலோசிக்கப் பிரிட்டன் அரசு இன்று ஏற்பாடு செய்துள்ள உயர்மட்டக் கூட்டத்தில் இந்தியா பங்கேற்கிறது.

உலகின் கச்சா எண்ணெய் மற்றும் இயற்கை எரிவாயு (LNG) போக்குவரத்தில் சுமார் 20% இந்தப் பாதை வழியாகவே நடைபெறுகிறது. கடந்த பிப்ரவரி 28 முதல், ஈரான் மீது அமெரிக்கா மற்றும் இஸ்ரேல் நடத்திய தாக்குதல்களைத் தொடர்ந்து, இந்தப் பாதையில் ஈரான் கடும் கட்டுப்பாடுகளை விதித்துள்ளது. இதனால் சர்வதேசக் கப்பல் போக்குவரத்து 90% க்கும் மேல் முடங்கியுள்ளது.

பிரிட்டன் வெளியுறவுச் செயலாளர் யவெட் கூப்பர் (Yvette Cooper) இந்தக் கூட்டத்தைத் தலைமை தாங்கி நடத்துகிறார். இந்தியா, பிரான்ஸ், ஜெர்மனி, இத்தாலி, கனடா, ஜப்பான் மற்றும் ஐக்கிய அரபு அமீரகம் உள்ளிட்ட சுமார் 35 முதல் 40 நாடுகளின் பிரதிநிதிகள் இந்தக் காணொளி வாயிலாக நடைபெறும் ஆலோசனையில் கலந்து கொள்கின்றனர். இந்திய வெளியுறவு அமைச்சகத்தின் செயலாளர் விக்ரம் மிஸ்ரி, இந்தியாவின் சார்பில் இந்தக் கூட்டத்தில் பங்கேற்று நாட்டின் நிலைப்பாட்டை முன்வைப்பார்.

இதையும் படிங்க: இனி அனைத்து நாடுகளின் கப்பல்களுக்கும் கட்டணம்..!! புதிய மசோதாவுக்கு ஈரான் கிரீன் சிக்னல்..!!

ஈரானின் தடையால் முடங்கியுள்ள சர்வதேசக் கப்பல் போக்குவரத்தை மீண்டும் தொடங்குவதற்கான ராஜதந்திர மற்றும் பொருளாதார நடவடிக்கைகளை ஆராய்தல். நீரிணையில் நிலவும் கண்ணிவெடி அச்சுறுத்தல்கள் மற்றும் கப்பல்கள் மீதான தாக்குதல்களைத் தடுத்து, மாலுமிகளின் பாதுகாப்பை உறுதி செய்வது குறித்து விவாதித்தல். எரிசக்தி விநியோகம் பாதிக்கப்பட்டதால் உலகளவில் உயர்ந்துள்ள கச்சா எண்ணெய் மற்றும் உணவுப் பொருட்களின் விலையைக் குறைக்க ஒருங்கிணைந்த நடவடிக்கைகளை எடுத்தல்.

இந்தக் கூட்டத்தில் அமெரிக்கா பங்கேற்கவில்லை என்பது குறிப்பிடத்தக்கது. ஹார்முஸ் நீரிணையைப் பாதுகாப்பது அந்தப் பாதையைப் பயன்படுத்தும் நாடுகளின் பொறுப்பு என அதிபர் டொனால்ட் ட்ரம்ப் ஏற்கனவே கருத்து தெரிவித்திருந்தார்.

இதையும் படிங்க: ஹார்முஸ் தடையை தாண்டிய 3வது எண்ணெய் கப்பல்..!! குஜராத் வந்து சேர்ந்த 'ஜக் லட்கி'..!!