மறு அறிவிப்பு வரும் வரை அவசியமற்ற ஈரான் பயணத்தை தவிருங்கள்! இந்தியா எச்சரிக்கை!!

ஈரானில் நிலவும் பாதுகாப்பு சூழ்நிலையை முன்னிட்டு, அந்நாட்டுக்கு தேவையற்ற பயணங்களை தற்காலிகமாக தவிர்க்குமாறு இந்தியக் குடிமக்களுக்கு டெஹ்ரானில் உள்ள இந்தியத் தூதரகம் முக்கிய அறிவுறுத்தல் ஒன்றை வெளியிட்டுள்ளது. இந்த அறிவிப்பு சர்வதேச அளவில் கவனத்தை ஈர்த்துள்ளதுடன், ஈரானுக்கு பயணம் திட்டமிட்டிருந்த இந்தியர்களிடையே பரபரப்பையும் ஏற்படுத்தியுள்ளது.

கடந்த சில மாதங்களாக மத்திய கிழக்கு பிராந்தியத்தில் பதற்றமான சூழ்நிலை நிலவி வந்தது. இந்த நிலையில், நீண்டகால மோதல்களுக்கு முற்றுப்புள்ளி வைக்கும் முயற்சியாக ஈரானும் அமெரிக்காவும் அமைதி ஒப்பந்தத்திற்கு ஒப்புதல் அளித்ததாக தகவல்கள் வெளியாகியிருந்தன. இருப்பினும், பிராந்திய பாதுகாப்பு நிலவரம் முழுமையாக சீராகவில்லை என்பதால் இந்தியத் தூதரகம் புதிய எச்சரிக்கையை வெளியிட்டுள்ளது.

டெஹ்ரானில் செயல்பட்டு வரும் இந்தியத் தூதரகம் வெளியிட்டுள்ள அறிவிப்பில், ஈரானின் தற்போதைய பாதுகாப்பு சூழலை தொடர்ந்து கண்காணித்து வருவதாக தெரிவிக்கப்பட்டுள்ளது. இதன் அடிப்படையில், அத்தியாவசிய தேவைகள் இல்லாதவர்கள் மறு அறிவிப்பு வரும் வரை ஈரானுக்கு பயணம் மேற்கொள்வதை தவிர்க்க வேண்டும் என வலியுறுத்தப்பட்டுள்ளது.

இதையும் படிங்க: ராணுவ ரீதியாக ஈரான் மொத்தமாக தோற்றுவிட்டது! அமெரிக்க அதிபர் ட்ரம்ப் சுயதம்பட்டம்!

மேலும், ஈரானுக்கு செல்ல திட்டமிட்டுள்ள இந்தியர்கள் தங்களது பயண விவரங்கள் மற்றும் தொடர்பு தகவல்களை இந்தியத் தூதரகத்தில் கட்டாயம் பதிவு செய்ய வேண்டும் என்றும் அறிவுறுத்தப்பட்டுள்ளது. இதன் மூலம் அவசர காலங்களில் தேவையான உதவிகளை விரைவாக வழங்க முடியும் என்று அதிகாரிகள் தெரிவித்துள்ளனர்.

தற்போது ஈரானில் வசித்து வரும் இந்தியர்களும், புதிதாக அந்நாட்டிற்கு வர உள்ளவர்களும் தங்களது முழு விவரங்களை தூதரகத்தில் பதிவு செய்ய வேண்டும் என அறிவுறுத்தப்பட்டுள்ளது. அதேபோல், இந்தியத் தூதரகத்தின் அதிகாரப்பூர்வ இணையதளம் மற்றும் சமூக ஊடகப் பக்கங்களை தொடர்ந்து பின்பற்றி, புதிய பாதுகாப்பு அறிவுறுத்தல்களை அறிந்து கொள்ளுமாறும் கேட்டுக்கொள்ளப்பட்டுள்ளது.

மத்திய கிழக்கில் நிலவும் அரசியல் மற்றும் பாதுகாப்பு சூழ்நிலையை கருத்தில் கொண்டு வெளியிடப்பட்டுள்ள இந்த அறிவிப்பு, வெளிநாடுகளில் உள்ள இந்தியர்களின் பாதுகாப்பை உறுதி செய்யும் நோக்கில் முக்கிய நடவடிக்கையாக பார்க்கப்படுகிறது. அடுத்தகட்ட நிலவரத்தைப் பொறுத்து மேலும் புதிய அறிவுறுத்தல்கள் வெளியாகலாம் என எதிர்பார்க்கப்படுகிறது.

இதையும் படிங்க: "எனது அதிகாரத்திற்கு எல்லைகளே இல்லை" - காலரை தூக்கி விட்டு கெத்து காட்டிய டிரம்ப்... என்ன மேட்டர்?