ஹார்முஸை கடந்து இந்தியா வரும் எண்ணெய் கப்பல்கள்!! குட்நியூஸ் சொன்னது மத்திய அரசு!
ஈரான் மீண்டும் ஹார்முஸ் ஜலசந்தியை மூடிய நிலையிலும், கச்சா எண்ணெயை ஏற்றிய 3 சரக்கு கப்பல்கள் இந்தியா நோக்கி வந்து கொண்டிருப்பதாக மத்திய அரசு தெரிவித்துள்ளது.
by
ஹார்முஸ் ஜலசந்தியை ஈரான் மீண்டும் மூடியதாக தகவல்கள் வெளியாகியுள்ள நிலையில், கச்சா எண்ணெயை ஏற்றிய மூன்று முக்கிய சரக்கு கப்பல்கள் இந்தியாவை நோக்கி பாதுகாப்பாக வந்து கொண்டிருப்பதாக மத்திய அரசு தெரிவித்துள்ளது. மத்திய கப்பல் போக்குவரத்து துறை இதை உறுதிப்படுத்தியுள்ளதால், உலக எண்ணெய் சந்தையில் ஏற்பட்ட பதற்றம் இந்தியாவை நேரடியாக பாதிக்காத வகையில் தற்காலிக நிம்மதி ஏற்பட்டுள்ளது.
அமெரிக்கா மற்றும் இஸ்ரேல் இடையிலான போர் ஒப்பந்த மீறல் காரணமாக ஈரான் மீண்டும் ஹார்முஸ் ஜலசந்தியை மூடியதாக தகவல்கள் தெரிவிக்கின்றன. இதனால் உலகின் முக்கிய எண்ணெய் போக்குவரத்து வழித்தடங்களில் ஒன்று முடங்கும் அபாயம் ஏற்பட்டது. குறிப்பாக மத்திய கிழக்கு நாடுகளிலிருந்து வரும் கச்சா எண்ணெய் விநியோகத்தில் தாமதம் மற்றும் விலை உயர்வு ஏற்படலாம் என்ற அச்சம் சர்வதேச சந்தையில் உருவாகியுள்ளது.
இந்த சூழலில், இந்தியாவுக்கு வரும் எண்ணெய் கப்பல்கள் குறித்து மத்திய துறைமுகங்கள், கப்பல் போக்குவரத்து மற்றும் நீர்வழிப்பாதைகள் துறை அமைச்சர் Sarbananda Sonowal முக்கிய தகவலை வெளியிட்டுள்ளார். அவர் தனது எக்ஸ் தள பதிவில் கூறியதாவது, 94 இந்திய பணியாளர்களுடன் 8.6 லட்சம் மெட்ரிக் டன்னுக்கும் அதிகமான கச்சா எண்ணெயை ஏற்றிய மூன்று இந்திய கொடி ஏந்திய டாங்கர் கப்பல்கள் ஹார்முஸ் ஜலசந்தியை வெற்றிகரமாக கடந்து விட்டன என தெரிவித்துள்ளார்.
இதையும் படிங்க: இன்னும் 60 நாள்!! ஹார்முஸை கடக்க கப்பல்களுக்கு எந்த கட்டணம் கிடையாது! அதிபர் ட்ரம்ப் அறிவிப்பு!
இந்த கப்பல்கள் “தேஷ் வைபவ்”, “தேஷ் விபோர்” மற்றும் “சன்மார் ஹெரால்டு” என பெயரிடப்பட்டுள்ளன. இவை தற்போது இந்திய துறைமுகங்களை நோக்கி பயணித்து வருகின்றன. விரைவில் இவை இந்தியாவில் இறங்கும் என எதிர்பார்க்கப்படுகிறது. இதன் மூலம் குறுகிய காலத்துக்கு ஏற்படக்கூடிய எரிபொருள் பற்றாக்குறை அபாயம் குறையும் என அரசு தரப்பில் தெரிவிக்கப்பட்டுள்ளது.
ஹார்முஸ் ஜலசந்தி உலக எண்ணெய் வர்த்தகத்தில் முக்கிய நுழைவாயிலாக இருப்பதால், அங்கு ஏற்படும் எந்த தடையும் சர்வதேச எண்ணெய் விலை மற்றும் விநியோக சங்கிலியில் நேரடி தாக்கத்தை ஏற்படுத்தும். இருப்பினும் இந்தியாவுக்கான முக்கிய கப்பல்கள் பாதுகாப்பாக கடந்துள்ளதால், உடனடி நெருக்கடி தவிர்க்கப்பட்டுள்ளதாக அதிகாரிகள் நம்பிக்கை தெரிவித்துள்ளனர்.
இந்நிலையில், நிலைமை தொடர்ந்து கண்காணிக்கப்பட்டு வருவதாகவும், எரிபொருள் விநியோகத்தில் தடையில்லா இயக்கத்தை உறுதி செய்ய அனைத்து நடவடிக்கைகளும் எடுக்கப்பட்டு வருவதாகவும் மத்திய அரசு தெரிவித்துள்ளது.
இதையும் படிங்க: இயல்பு நிலைக்கு திரும்பும் ஹார்முஸ் ஜலசந்தி! தடையின்றி பயணிக்கும் கச்சா எண்ணெய், எரிவாயு கப்பல்கள்!!
