ஆந்திராவில் உற்பத்தியாகும் இந்தியாவின் 5-ம் தலைமுறை 'ஸ்டெல்த்' போர் விமானம்!

இந்தியாவின் பாதுகாப்புத் துறையில் ஒரு மிகப்பெரிய மைல்கல்லாக, உள்நாட்டிலேயே உருவாக்கப்படும் 5-ம் தலைமுறை போர் விமானமான 'AMCA' (Advanced Medium Combat Aircraft) உற்பத்தி ஆலை ஆந்திர மாநிலத்தில் அமையவுள்ளது. பிரதமர் மோடியின் 'ஆத்மநிர்பர் பாரத்' திட்டத்தின் கீழ், சுமார் ₹1 லட்சம் கோடி மதிப்பீட்டில் மேற்கொள்ளப்படவுள்ள இந்த மெகா திட்டம், ஆந்திராவின் தொழில்வளர்ச்சியில் ஒரு புதிய திருப்பத்தை ஏற்படுத்தும் என எதிர்பார்க்கப்படுகிறது.

ஆந்திராவின் ஸ்ரீசத்ய சாய் மாவட்டத்தில் உள்ள புட்டபர்த்தி பகுதியில், இந்த விமான உற்பத்தி ஆலை மற்றும் சோதனை மையத்தை அமைக்க 600 ஏக்கர் நிலத்தை DRDO (பாதுகாப்பு ஆராய்ச்சி மற்றும் மேம்பாட்டு அமைப்பு) அமைப்புக்கு வழங்க அம்மாநில அமைச்சரவை ஒப்புதல் அளித்துள்ளது. பெங்களூருவில் உள்ள ADA (Aeronautical Development Agency) தலைமையகத்திற்கு மிக அருகில் இருப்பதாலும், வான்வெளிப் போக்குவரத்து நெரிசல் குறைவாக இருப்பதாலும் புட்டபர்த்தி தேர்வு செய்யப்பட்டுள்ளது.

AMCA போர் விமானங்கள் உலகின் அதிநவீன 'ஸ்டெல்த்' தொழில்நுட்பத்தைக் கொண்டவை. இவை எதிரி நாடுகளின் ரேடார்களில் சிக்காமல் சென்று தாக்குதல் நடத்தும் திறன் கொண்டவை. ஒட்டுமொத்தமாகச் சுமார் 140 AMCA போர் விமானங்களை இங்கு உற்பத்தி செய்யத் திட்டமிடப்பட்டுள்ளது. முதல் இரண்டு முன்மாதிரி (Prototype) விமானங்கள் 2026-27-க்குள் வெளிவரும் என்றும், 2028-ல் முதல் பறப்புச் சோதனை நடைபெறும் என்றும் எதிர்பார்க்கப்படுகிறது.

இதையும் படிங்க: ஆந்திராவில் சோக சம்பவம்: வெடித்து சிதறிய கேஸ் சிலிண்டர்..!! 4 பேர் பரிதாப பலி..!! தரைமட்டமான 2 வீடுகள்..!!

இந்தத் திட்டத்தில் முதன்முறையாகப் பொதுத்துறை நிறுவனமான HAL-க்குப் பதிலாகத் தனியார் நிறுவனங்களுக்குப் பெரும் வாய்ப்பு வழங்கப்படவுள்ளது. டாடா அட்வான்ஸ்டு சிஸ்டம்ஸ் (TATA),  எல் அண்ட் டி (L&T), பாரத் ஃபோர்ஜ் (Bharat Forge) ஆகிய நிறுவனங்கள் AMCA விமானங்களை உற்பத்தி செய்யத் தேர்வு செய்யப்பட்டுள்ளன. இதற்கான புரிந்துணர்வு ஒப்பந்தங்கள் ஏற்கனவே கையெழுத்தாகியுள்ளன. இந்த நிறுவனங்கள் DRDO உடன் இணைந்து போர் விமானத்தின் பாகங்களை ஒருங்கிணைத்துத் தயாரிக்கும் பணியில் ஈடுபடும்.

இந்தியாவின் முதல் உள்நாட்டு 5-ம் தலைமுறை போர் விமானம் ஆந்திர மண்ணில் உற்பத்தியாவது, சர்வதேச அளவில் இந்தியாவின் பாதுகாப்புத் தொழில்நுட்ப வலிமையை உலகிற்குப் பறைசாற்றுவதாக அமையும்.

இதையும் படிங்க: ஸ்பேஸ்-எக்ஸ் ராக்கெட் மூலம் விண்ணில் பாய்ந்தது உலகின் முதல் OptoSAR செயற்கைக்கோள்! இந்திய நிறுவனத்தின் உலகளாவிய சாதனை!