கனவு நனவாகிறது! இந்தியாவின் முதல் புல்லட் ரயில்! மத்திய அமைச்சர் அஸ்வினி வைஷ்ணவ்  அறிவிப்பு!

இந்தியாவின் கனவுத் திட்டமான புல்லட் ரயில் சேவை, வருகின்ற 2027-ஆம் ஆண்டு ஆகஸ்ட் மாதம் 15-ஆம் தேதி முதல் பொதுமக்கள் பயன்பாட்டிற்கு வரும் என மத்திய ரயில்வே அமைச்சர் அஸ்வினி வைஷ்ணவ் அதிகாரப்பூர்வமாக அறிவித்துள்ளார்.

புத்தாண்டு தினமான இன்று டெல்லியில் செய்தியாளர்களைச் சந்தித்த அமைச்சர், மும்பை - அகமதாபாத் இடையேயான 508 கி.மீ நீள அதிவேக ரயில் பாதை திட்டத்தின் தற்போதைய நிலவரம் குறித்துப் பகிர்ந்து கொண்டார். இதன்படி, முதல் கட்டமாகச் சூரத் முதல் பிலிமோரா வரையிலான பாதையில் புல்லட் ரயில் இயக்கப்படும் என்றும், அதனைத் தொடர்ந்து படிப்படியாக மற்ற நகரங்களுக்குச் சேவை விரிவாக்கம் செய்யப்படும் என்றும் அவர் தெரிவித்தார். ஜப்பான் நாட்டின் ஷிங்கன்சென் (Shinkansen) தொழில்நுட்ப உதவியுடன் கட்டப்பட்டு வரும் இத்திட்டம், இந்திய ரயில்வே வரலாற்றில் ஒரு மைல்கல்லாக அமையும் என எதிர்பார்க்கப்படுகிறது.

இந்திய ரயில்வேயை உலகத் தரத்திற்கு உயர்த்தும் நோக்கில் செயல்படுத்தப்பட்டு வரும் புல்லட் ரயில் திட்டம் குறித்து மத்திய அமைச்சர் அஸ்வினி வைஷ்ணவ் இன்று முக்கிய அறிவிப்புகளை வெளியிட்டார். “வருகின்ற 2027-ஆம் ஆண்டு சுதந்திர தினத்தில் இந்தியர்கள் தங்களது முதல் புல்லட் ரயில் பயணத்திற்கான டிக்கெட்டுகளைப் பெறலாம்” என அவர் உற்சாகமாகத் தெரிவித்தார். முதற்கட்டமாக குஜராத் மாநிலத்தின் சூரத் மற்றும் பிலிமோரா நகரங்களுக்கு இடையே இந்தச் சேவை தொடங்கப்பட உள்ளது. இதனைத் தொடர்ந்து வாபி - சூரத், வாபி - அகமதாபாத், தானே - அகமதாபாத் என விரிவுபடுத்தப்பட்டு, இறுதியாக மும்பை - அகமதாபாத் இடையேயான முழுப் பாதையும் பயன்பாட்டிற்கு வரும் என அவர் விளக்கினார்.

இதையும் படிங்க: “விண்ணைப் பிளந்த வாணவேடிக்கை!” - 2026 புத்தாண்டை உற்சாகத்துடன் வரவேற்ற தமிழக மக்கள்!

மும்பை - அகமதாபாத் இடையேயான 508 கி.மீ தூரத்தை இந்தப் புல்லட் ரயில் வெறும் 1 மணி நேரம் 58 நிமிடங்களில் கடக்கும் வகையில் வடிவமைக்கப்பட்டுள்ளது. மணிக்கு 320 கி.மீ வேகத்தில் சீறிப்பாயும் இந்த ரயில்கள், இந்தியாவின் மிக முக்கிய வர்த்தக நகரங்களை இணைப்பதன் மூலம் பொருளாதார வளர்ச்சியைத் துரிதப்படுத்தும் என அமைச்சர் குறிப்பிட்டார். இத்திட்டத்தில் மொத்தம் 12 ரயில் நிலையங்கள் அமையவுள்ளன; அவற்றுள் குஜராத் பகுதியில் மட்டும் 352 கி.மீ பாதையும், மகாராஷ்டிராவில் 156 கி.மீ பாதையும் அமைய உள்ளது. தற்போது வரை 320 கி.மீ தூரத்திற்கு மேம்பாலப் பணிகள் நிறைவடைந்துள்ளதாகத் தரவுகள் தெரிவிக்கின்றன.

இத்திட்டத்தின் முழுமையான நிறைவு 2029-ஆம் ஆண்டிற்குள் இருக்கும் என எதிர்பார்க்கப்பட்டாலும், 2027 ஆகஸ்ட் 15-ஆம் தேதியை ஒரு குறியீட்டு இலக்காகக் கொண்டு பணிகள் முடுக்கிவிடப்பட்டுள்ளன. மேலும், புல்லட் ரயில் சேவையைத் தொடர்ந்து வந்தே பாரத் ஸ்லீப்பர் ரயில்களும் இந்த மாதமே அறிமுகப்படுத்தப்பட உள்ளதாக அமைச்சர் கூடுதல் தகவலைப் பகிர்ந்து கொண்டார். இந்தியப் பொறியாளர்களின் திறமைக்கும், ஜப்பானியத் தொழில்நுட்பத்திற்கும் சான்றாக அமையவுள்ள இந்தப் புல்லட் ரயில் திட்டம், 2026-ன் தொடக்கத்திலேயே இந்திய மக்களுக்கு ஒரு மிகப்பெரிய நம்பிக்கையை அளித்துள்ளது.

இதையும் படிங்க: GDP-ல் ஜப்பானை முந்தி உலகின் 4வது பெரிய பொருளாதார நாடு..!! மாஸ் காட்டும் இந்தியா..!!