ஹோர்முஸ் நீரிணையைக் கடக்க ரூ. 18.5 கோடி கட்டணம்! கப்பல்களை நிறுத்தி சுங்கக்கட்டணம் வசூலிக்கும் ஈரான்!!
ஹோர்முஸ் நீரிணையைக் கடக்கும் கப்பல்களுக்கு சுங்கக் கட்டணமாக ரூ. 18.5 கோடி வசூலிக்கப்படும் என்று ஈரான் நிபந்தனை விதித்துள்ளது.
by
அமெரிக்கா - ஈரான் இடையேயான போர் 40 நாட்களுக்கு மேல் நீடித்த நிலையில், பாகிஸ்தான் மத்தியஸ்தத்தின் மூலம் இரு வாரங்களுக்கு போர் நிறுத்த ஒப்பந்தம் ஏற்பட்டுள்ளது. அமெரிக்க அதிபர் டொனால்ட் டிரம்ப் இதை அறிவித்தார். ஈரான் தரப்பில் இருந்து வந்த 10 அம்ச முன்மொழிவுகளில் பெரும்பாலானவை ஏற்றுக்கொள்ளப்பட்டுள்ளதாகவும், முழு ஒப்பந்தத்தை இறுதி செய்ய இரு வாரங்கள் தேவைப்படும் என்றும் டிரம்ப் தெரிவித்தார்.
இந்த இடைக்கால ஒப்பந்தத்தில் ஈரான் விதித்துள்ள முக்கிய நிபந்தனை பெரும் பரபரப்பை ஏற்படுத்தியுள்ளது. உலக எண்ணெய் வர்த்தகத்தில் ஐந்தில் ஒரு பங்கு எண்ணெய் செல்லும் 34 கிலோமீட்டர் அகலமுள்ள ஹோர்முஸ் நீரிணையைக் கடக்கும் சரக்குக் கப்பல்களுக்கு சுங்கக் கட்டணமாக 2 மில்லியன் அமெரிக்க டாலர் (இந்திய மதிப்பில் சுமார் ரூ.18.5 கோடி) வசூலிக்க ஈரான் முடிவு செய்துள்ளது. ஓமன் மற்றும் ஈரான் எல்லைக்குட்பட்ட இந்த நீரிணையில் சுங்கக் கட்டணத்தை இரு நாடுகளும் பகிர்ந்துகொள்ளும் என்றும் தெரிவிக்கப்பட்டுள்ளது.
போரால் பாதிக்கப்பட்ட ஈரானின் உள்கட்டமைப்பை சரிசெய்ய இந்த வருமானம் பயன்படுத்தப்படும் என ஈரான் விளக்கம் அளித்துள்ளது. ஹோர்முஸ் நீரிணையை ஈரான் மூடியதால் சர்வதேச அளவில் எரிபொருள் பற்றாக்குறை ஏற்பட்டு, எண்ணெய் விலை உயர்ந்தது. டிரம்ப், “இந்த நீரிணையை திறக்காவிட்டால் ஈரானின் நாகரீகமே அழிந்துவிடும்” என எச்சரித்திருந்தார். இதையடுத்து ஈரான் இரு வாரங்களுக்கு நீரிணையை திறக்க ஒப்புக்கொண்டது.
இதையும் படிங்க: ஏப்., 7ல் போர் நிறுத்தம்!! பேச்சுவார்த்தைக்கு சம்மதம்!! அமெரிக்க, இஸ்ரேல் போரில் இறங்கி வரும் ஈரான்!!
வரும் வெள்ளிக்கிழமை இஸ்லாமாபாத்தில் அமெரிக்கா மற்றும் ஈரான் பேச்சுவார்த்தை நடத்த உள்ளன. ஹோர்முஸ் சுங்கக் கட்டண விவகாரம் உள்ளிட்ட நிபந்தனைகள் அங்கு விரிவாக விவாதிக்கப்படும். பாகிஸ்தான் பிரதமர் ஷெபாஸ் ஷரீப் மற்றும் இராணுவத் தலைவர் அசிம் முனீர் ஆகியோரின் மத்தியஸ்தம் இந்த ஒப்பந்தத்துக்கு முக்கியப் பங்கு வகித்தது.
உலகப் பொருளாதாரத்துக்கு மிக முக்கியமான ஹோர்முஸ் நீரிணை மூடல், எண்ணெய் விலை உயர்வு, உலகளாவிய வர்த்தகப் பாதிப்பு உள்ளிட்டவற்றை ஏற்படுத்தியிருந்தது. இப்போது இரு வார இடைக்கால ஒப்பந்தம் ஏற்பட்டாலும், முழு அமைதி ஏற்பட இன்னும் பல சவால்கள் உள்ளன. சுங்கக் கட்டணம் உலக நாடுகளுக்கு புதிய சுமையை ஏற்படுத்தும் என பொருளாதார வல்லுநர்கள் கருதுகின்றனர்.
இந்த ஒப்பந்தம் தற்காலிகமானது என்பதால், அடுத்த இரு வாரங்களில் நடைபெறும் பேச்சுவார்த்தையின் முடிவுகள் மீது உலக நாடுகளின் கவனம் திரும்பியுள்ளது. எண்ணெய் சந்தை ஏற்கனவே ஏற்ற இறக்கத்தை சந்தித்து வரும் நிலையில், ஹோர்முஸ் நீரிணை தொடர்பான முடிவுகள் உலகப் பொருளாதாரத்தை பெரிதும் பாதிக்கும்.
இதையும் படிங்க: இஸ்ரேல் மீது ஏவுகணை மழை! ட்ரம்பை கேலி செய்யும் ஈரான்! அப்போ பேச்சுவார்த்தை சும்மாதானா?
