”இந்த ரேட் ரொம்ப ஜாஸ்தி...” - அமெரிக்காவை வாண்டடாக வம்பிழுத்த ஈரான்... டிரம்பிற்கு நக்கல் பதிலடி...!

உலகளவில் கச்சா எண்ணெய் போக்குவரத்துக்கு மிக முக்கியமான வழித்தடமாகக் கருதப்படும் ஹோர்முஸ் நீரிணை தொடர்பாக அமெரிக்கா மற்றும் ஈரான் இடையே மீண்டும் வார்த்தைப் போர் வெடித்துள்ளது.

ஈரான் - அமெரிக்கா இடையிலான பதற்றம் அதிகரித்துள்ள நிலையில், ஹோர்முஸ் நீரிணை வழியாக கப்பல் போக்குவரத்து பாதிக்கப்பட்டுள்ளதாக கூறப்படுகிறது. உலகின் பெரும்பாலான வளைகுடா நாடுகளிலிருந்து ஏற்றுமதி செய்யப்படும் கச்சா எண்ணெய் இந்த நீரிணை வழியாகவே சர்வதேச சந்தைகளுக்கு செல்கிறது. இதனால், இந்த பாதையை விரைவாக வழக்கமான நிலைக்கு கொண்டு வர வேண்டும் என்று பல நாடுகளும் வலியுறுத்தி வருகின்றன.

இந்த சூழலில், அமெரிக்க அதிபர் டொனால்ட் டிரம்ப்,ஹோர்முஸ் நீரிணை வழியாக செல்லும் கப்பல்களுக்கு பாதுகாப்பு வழங்கப்படுவதாகவும், அதற்காக 20 சதவீத கட்டணம் வசூலிக்கப்படும் என்றும் தெரிவித்ததாக தகவல்கள் வெளியாகின. மேலும், ஈரான் கப்பல்களைத் தவிர மற்ற நாடுகளின் கப்பல்கள் வழக்கம்போல் பயணிக்கலாம் என்றும் அவர் கூறியதாக தெரிவிக்கப்பட்டது.

இதையும் படிங்க: ஹார்முஸ் ஜலசந்தி மூடப்படுமா? அதிரடி காட்டும் அதிபர் டிரம்ப் ... மத்திய கிழக்கில் போர் பதற்றம் உச்சம்!

ஆனால், இந்த 20 சதவீத கட்டணம் மிகவும் அதிகம் என்றும், இது சர்வதேச கப்பல் போக்குவரத்து செலவுகளுடன் ஒப்பிடும்போது நடைமுறைக்கு சாத்தியமற்றது என்றும் பல கப்பல் நிறுவனங்கள் எதிர்ப்பு தெரிவித்ததாக கூறப்படுகிறது.

இதற்கு பதிலளித்துள்ள ஈரான் வெளியுறவுத்துறை அமைச்சர் அப்பாஸ் அராக்சி, கிண்டலான தொனியில் கருத்து தெரிவித்துள்ளார்.ஹோர்முஸ் நீரிணையின் பாதுகாப்பை உறுதி செய்வதில் உண்மையான பொறுப்பு ஈரானுக்கே இருப்பதாகவும், அந்தப் பகுதியில் பாதுகாப்பு தொடர்பான எந்த நடவடிக்கையும் ஈரானின் பங்களிப்பின்றி சாத்தியமில்லை என்றும் அவர் குறிப்பிட்டார்.

மேலும், பாதுகாப்புக்காக கட்டணம் வசூலிக்க வேண்டிய நிலை ஏற்பட்டாலும், அது நியாயமான அளவில்தான் இருக்கும் என்றும், அந்தப் பகுதியின் பாதுகாப்பில் ஈரானே முக்கிய பங்காற்றி வருவதாகவும் அப்பாஸ் அராக்சி தெரிவித்துள்ளார்.

ஹோர்முஸ் நீரிணையை மையமாகக் கொண்டு அமெரிக்கா மற்றும் ஈரான் இடையே நடைபெற்று வரும் இந்த கருத்து மோதல், சர்வதேச கடல் போக்குவரத்து மற்றும் உலக எண்ணெய் சந்தையில் மீண்டும் பரபரப்பை ஏற்படுத்தியுள்ளது.

இதையும் படிங்க: கமேனி நினைவேந்தலில் மொஜ்தபா பங்கேற்பு?! பல வார மவுனத்திற்கு முடிவு? உலகம் முழுவதும் எதிர்பார்ப்பு!