ஹார்முஸ் ஜலசந்தி எங்கள் உத்தரவுக்குத்தான் திறக்கும்! அமெரிக்கா அதிபர் டிரம்புக்கு ஈரான் நேரடி பதிலடி

அமெரிக்கா–ஈரான் இடையிலான மோதல் தொடர்ந்து பதற்றமான சூழலை ஏற்படுத்தி வரும் நிலையில், சர்வதேச அளவில் முக்கியத்துவம் வாய்ந்த ஹார்முஸ் ஜலசந்தி தொடர்பாக இரு நாடுகளுக்கும் இடையே புதிய சர்ச்சை உருவாகியுள்ளது.

உலகின் முக்கியமான கடல்வழி எரிபொருள் போக்குவரத்து பாதைகளில் ஒன்றாக ஹார்முஸ் ஜலசந்தி உள்ளது. குறிப்பாக வளைகுடா நாடுகளில் இருந்து சர்வதேச சந்தைக்கு கச்சா எண்ணெய் மற்றும் எரிபொருட்கள் கொண்டு செல்லப்படும் முக்கிய கடல்வழியாக இது செயல்படுகிறது. இதனால் ஹார்முஸ் பகுதியில் ஏற்படும் எந்தவொரு பதற்றமும் சர்வதேச எண்ணெய் சந்தையிலும் தாக்கத்தை ஏற்படுத்தக்கூடும்.

இந்த சூழலில், ஹார்முஸ் பகுதியை கைப்பற்றுவது தொடர்பாக அமெரிக்க அதிபர் டொனால்டு டிரம்ப் தெரிவித்து வரும் கருத்துகளுக்கு ஈரான் கடும் எதிர்ப்பு தெரிவித்துள்ளது.

இதையும் படிங்க: ஹார்முஸ் நீரிணை இனி அமெரிக்காவுக்கு சொந்தம்! ஈரானை வீழ்த்தியதும் அடுத்த அதிரடி! ட்ரம்ப் சூசகம்!

இதுகுறித்து ஈரான் துணை வெளியுறவு அமைச்சர் கசெம் கரிபாபாதி கூறுகையில், ஹார்முஸ் ஜலசந்தி ஈரானின் கட்டுப்பாட்டில் இருப்பதாக தெரிவித்துள்ளார். மேலும், அதன் செயல்பாடுகள் தொடர்பான முடிவுகள் ஈரானின் உத்தரவின் அடிப்படையிலேயே இருக்கும் என்றும் அவர் குறிப்பிட்டுள்ளார்.

“ஹார்முஸ் ஈரானிடம் உள்ளது. அது ஈரானிடமே தொடர்ந்து இருக்கும். ஈரானின் உத்தரவுக்கு மட்டுமே அது திறக்கப்படும் அல்லது மூடப்படும்” என்று அவர் தெரிவித்துள்ளார்.

மேலும், அமெரிக்கா தனது தோல்வியை ஒப்புக்கொள்ளும் வரை ஹார்முஸ் ஜலசந்தி தொடர்பான முடக்கம் தொடரும் என்றும் கரிபாபாதி எச்சரித்துள்ளார்.

இந்த கருத்து அமெரிக்கா–ஈரான் இடையிலான ஏற்கனவே நீடித்து வரும் பதற்றத்தை மேலும் அதிகரிக்கும் வகையில் அமைந்துள்ளது. குறிப்பாக உலகளாவிய எரிபொருள் விநியோகத்தில் ஹார்முஸ் ஜலசந்தி வகிக்கும் முக்கிய பங்கு காரணமாக, அங்கு நீடிக்கும் எந்தவொரு தடையும் சர்வதேச சந்தைகளில் தாக்கத்தை ஏற்படுத்தும் என்ற கவலை எழுந்துள்ளது.

இரு நாடுகளும் தங்களது நிலைப்பாட்டில் உறுதியாக இருப்பதால், ஹார்முஸ் ஜலசந்தி விவகாரம் அடுத்தகட்டத்தில் எந்த திசையில் செல்கிறது என்பதை உலக நாடுகள் உன்னிப்பாக கவனித்து வருகின்றன.

இதையும் படிங்க: நிபந்தனைகள் நிறைவேறும் வரை ஹார்முஸ் ஜலசந்தியை திறக்க மாட்டோம்! அமெரிக்காவுக்கு ஈரான் சவால்!