கட்சியின் தலைவராக AI நியமனம்..!! ஜப்பான் அரசியல் களத்தில் ஒரு புரட்சிகரமான மாற்றம்!

'சைசெய் நோ மிச்சி' (Path to Rebirth) என்ற சிறிய அரசியல் கட்சி, தனது தலைவராக செயற்கை நுண்ணறிவு (AI) ஒன்றை நியமிக்கும் என அறிவித்துள்ளது. இது உலக அரசியலில் முதல் முறையாக AI-ஐ தலைமை பொறுப்புக்கு கொண்டு வரும் முயற்சியாகும். கட்சியின் நிறுவனர் ஷின்ஜி இஷிமாரு தேர்தல் தோல்விக்குப் பின் பதவியை ராஜினாமா செய்ததால், இந்த முடிவு எடுக்கப்பட்டது.

கடந்த ஜனவரி மாதம் இஷிமாரு, மேற்கு ஜப்பானின் சிறிய நகரமான ஆக்கோடேத்தின் முன்னாள் மேயராக, இந்தக் கட்சியை தொடங்கினார். 2024ம் ஆண்டு டோக்கியோ ஆளுநர் தேர்தலில் ஆன்லைன் பிரச்சாரத்தின் வெற்றியால் இரண்டாம் இடத்தைப் பெற்று கவனத்தை ஈர்த்தாலும், இந்த ஆண்டு ஜூன் மாதத்தில் டோக்கியோ சட்டமன்றத் தேர்தலில் 42 பேர் உள்ளிட்ட அனைவரும் தோல்வியடைந்தனர். ஜூலை மாதத்தில் நாடாளுமன்ற மேல் அவைத் தேர்தலிலும் 10 பேர் தோற்றதால், இஷிமாரு ஆகஸ்ட் மாதம் தலைமையை விட்டுவிட்டார்.

இதையும் படிங்க: ஆளும் கட்சியில் பிளவு ஏற்பட வேண்டாம்.. ஜப்பான் பிரதமர் ஷிகெரு இஷிபா ராஜினாமா செய்ய முடிவு..!

இந்தத் தோல்விகளுக்கு பின், கட்சி உறுப்பினர்கள் AI-ஐ தலைவராகத் தேர்ந்தெடுத்தனர். கட்சியின் புதிய 'உதவியாளர்' என்று அழைக்கப்படும் 25 வயது கொண்ட கியோட்டோ பல்கலைக்கழக AI ஆராய்ச்சி மாணவர் கோகி ஒகுமுரா, செய்தியாளர் மாநாட்டில், "புதிய தலைவர் AI தான்" என்று அறிவித்தார்.

AI-ஐ 'AI பெங்குயின்' என்று பெயர் சூட்டி, பெங்குயின் அவதாரத்தில் வடிவமைக்கப்படும் எனக் கூறினார். ஜப்பானியர்களின் விலங்குகளிடம் உள்ள அன்பை முன்னிட்டு இந்தத் தேர்வு, என்றார். AI, கட்சி உறுப்பினர்களின் அரசியல் செயல்பாடுகளை கட்டுப்படுத்தாது; மாறாக, வளங்களை (உதாரணமாக நிதி, ஆதாரங்கள்) பகிர்ந்து கொடுக்கும் முடிவுகளை மட்டும் எடுக்கும், என்று ஒகுமுரா விளக்கினார். AI-இன் செயல்பாடு, செயல்படும் காலம், பயன்பாடு போன்ற விவரங்கள் இன்னும் முடிவு செய்யப்படவில்லை; விரைவில் roadmap வெளியிடப்படும்.

இந்தக் கட்சி, நிலையான கொள்கைத் தளத்தைக் கொண்டிருக்கவில்லை; உறுப்பினர்கள் தங்கள் சொந்த அஜெண்டாக்களை உருவாக்கலாம். இந்த முடிவு, ஜப்பானின் AI தொழில்நுட்பத்தில் உள்ள முன்னேற்றத்தை பிரதிபலிக்கிறது. அரசு, அதிகாரிகளின் பணிகளில் AI-ஐ பயன்படுத்தி வருகிறது – உதாரணமாக, ஆவணத் தயாரிப்பு, திருமணப் பொருத்தம், காலி வீடுகளைக் கண்டறிதல் போன்றவற்றில்.

ஆனால் அரசியல் தலைமையில் AI என்பது புதுமைக் கோட்பாடு. உலக அளவில் இது போன்ற முயற்சிகள் அதிகரிக்கின்றன. டென்மார்க்கின் 'சிந்தெடிக் பார்ட்டி' AI-ஐ அடிப்படையாகக் கொண்டு இயங்குகிறது; அல்பேனியாவில் ஏற்கனவே AI அமைச்சரை நியமித்துள்ளனர். ஜப்பானில் 'டீம் மிரை' போன்ற கட்சிகள் AI பொறியாளர்களால் நடத்தப்படுகின்றன.

இந்த AI தலைமை, தேர்தல் தோல்விகளுக்கு பின் கட்சியை மீட்டெடுக்கும் திட்டமா என விமர்சகர்கள் கேள்வி எழுப்புகின்றனர். சிலர் இதை சந்தேகத்துடன் பார்க்கின்றனர்: "AI அரசியல் முடிவுகளை எவ்வாறு புரிந்துகொள்ளும்?" என்று. மற்றவர்கள், இது ஜப்பானின் சுருங்கும் தொழிலாளர் சக்தியை சமநிலைப்படுத்தும் வழி என்று வரவேற்கின்றனர். இந்த முடிவு ஜப்பான் அரசியலை மாற்றுமா? அல்லது விளற்சியான முயற்சியா? என்பதை எதிர்காலம் தெரிவிக்கும். 

இதையும் படிங்க: ஜப்பானில் பிரதமர் மோடி.. முக்கிய ஒப்பந்தங்கள் இன்று கையெழுத்தானது..!!