சித்தராமய்யாவும் இல்லை! சிவக்குமாரும் இல்லை! 3வது நபர் முதல்வராகும் வாய்ப்பு! கர்நாடக காங்கிரசில் சலசலப்பு!
கர்நாடகாவில் காங்கிரஸ் ஆட்சி அமைத்து இரண்டரை ஆண்டுகள் ஆனதை அடுத்து, முதல்வர் மாற்றத்தை வலியுறுத்தி சிவகுமார் ஆதரவாளர்கள் போர்க்கொடி உயர்த்தி உள்ளனர்.
by
பெங்களூரு: கர்நாடகாவில் காங்கிரஸ் ஆட்சி அமைத்து சரியாக இரண்டரை ஆண்டுகள் நிறைவடைந்த நிலையில், முதல்வர் பதவி மாற்றம் குறித்து உட்கட்சி பூசல் வெடித்துள்ளது. “2023 தேர்தலின்போதே சித்தராமையா 2.5 வருடமும், அதற்குப் பின் சிவகுமார் 2.5 வருடமும் முதல்வராக இருப்பது என்று ஒப்பந்தம் போட்டுக்கொண்டார்கள்” என்று சிவகுமார் ஆதரவாளர்கள் போர்க்கொடி தூக்கியுள்ளனர். இதனால், முதல்வர் சித்தராமையா மற்றும் துணை முதல்வர் டி.கே. சிவகுமார் இடையே மறைமுகப் போர் தீவிரமடைந்துள்ளது.
2023 சட்டமன்றத் தேர்தலில் காங்கிரஸ் 135 இடங்களை வென்றபோது, மாநிலத் தலைவராக இருந்த சிவகுமார் தான் முதல்வர் என்று எதிர்பார்க்கப்பட்டது. ஆனால், சோனியா காந்தி, ராகுல் காந்தி, மல்லிகார்ஜூன கார்கே ஆகியோருடன் நெருக்கமான உறவைப் பயன்படுத்தி சித்தராமையா முதல்வரானார்.
அப்போதே “2.5 + 2.5 ஒப்பந்தம்” இருப்பதாக பேச்சு அடிபட்டது. சிவகுமார் சமாதானம் அடைந்து கட்சி ஒற்றுமையைக் காத்தார். ஆனால், இப்போது இரண்டரை ஆண்டுகள் முடிந்ததும், சிவகுமார் ஆதரவாளர்கள் “ஒப்பந்தம் நிறைவேற்றப்பட வேண்டும்” என்று குரல் கொடுக்கத் தொடங்கியுள்ளனர்.
இதையும் படிங்க: “ஒருவேளை உணவு கூட இல்ல...” - கொழும்புவில் சிக்கித் தவிக்கும் தமிழர்கள்... அதிரடி ஆக்ஷனில் இறங்கிய முதல்வர் மு.க.ஸ்டாலின்...!
சிவகுமார் திடீரென பொது நிகழ்ச்சிகளிலும், ட்விட்டரிலும் சித்தராமையாவை சீண்டும் வகையில் பேசி வருகிறார். “தொண்டர்கள் ஆர்வமாக இருக்கலாம், நான் அவசரப்படவில்லை. கட்சித் தலைமை எடுக்கும் முடிவுக்கு கட்டுப்படுவேன்” என்று சிவகுமார் கூறியது பெரும் பரபரப்பை ஏற்படுத்தியது. அதேநேரம், “முதல்வர் பதவி குறித்த ஒப்பந்தம் பற்றி பொது வெளியில் பேசவில்லை” என்று அவர் சொன்னது, கட்சிக்குள் புயலை கிளப்பியது.
சித்தராமையா, பீகார் தேர்தல் தோல்வி குறித்த ஆலோசனைக் கூட்டம் என்று சொல்லி டில்லி பறந்தார். அங்கு கார்கே, ராகுல் உள்ளிட்ட மேலிடத் தலைவர்களைச் சந்தித்துப் பேசினார். அதே சமயம் சிவகுமாரும் டில்லி சென்று மத்திய அமைச்சர்களைச் சந்தித்து “விவசாயிகள் பிரச்னை” என்று சொல்லி திரும்பினார். இருவரும் டில்லியில் இருந்தபோதே முதல்வர் பதவி குறித்து மேலிடத்துடன் தனித்தனியே பேசியதாக தகவல்கள் வெளியாகின.
இந்நிலையில், பாஜக முன்னாள் முதல்வர் பசவராஜ் பொம்மை வெடிகுண்டு மாதிரி ஒரு கருத்தைத் தெரிவித்துள்ளார். “சித்தராமையாவும் சிவகுமாரும் தங்கள் நிலைப்பாட்டில் இருந்து இறங்கவே மாட்டேன் என்று இருக்கிறார்கள். இருவரும் டில்லிக்கு ஓடியிருக்கிறார்கள். இதைப் பார்த்தால், காங்கிரஸ் மேலிடத்துக்கு வேறு வழியில்லாமல், இவர்கள் இருவரும் இல்லாத மூன்றாவது நபரை முதல்வராக்கும் வாய்ப்பு உள்ளது. விரைவில் ஒரு கருப்பு குதிரை முதல்வராக வரலாம்” என்று பொம்மை கூறியது கர்நாடக அரசியலை பற்றி எரிய வைத்துள்ளது.
இப்போது அமைச்சர் ஜி. பரமேஸ்வரா, எம்.பி. டி.கே. சுரேஷ், பிரியங்க் கார்கே உள்ளிட்ட மூத்த தலைவர்களின் பெயர்கள் “மூன்றாவது வேட்பாளர்” என்று பேசப்படுகின்றன. சித்து ஆதரவாளர்களும் சிவா ஆதரவாளர்களும் இதைக் கேட்டு கொதித்துப் போயுள்ளனர். காங்கிரஸ் மேலிடம் இன்னும் எந்த முடிவும் எடுக்கவில்லை என்றாலும், உட்கட்சி பூசல் தீவிரமடைந்து, கர்நாடக ஆட்சி நிலையற்ற நிலைக்குத் தள்ளப்பட்டுள்ளது.
காங்கிரஸ் ஆட்சியின் 2.5 வருட முடிவில், “யார் முதல்வர்?” என்ற கேள்வி கர்நாடகாவை ஆட்டிப்படைத்து வருகிறது. டில்லி மேலிடம் என்ன முடிவெடுக்கப் போகிறது என்பதே இப்போதைய மில்லியன் டாலர் கேள்வி!
இதையும் படிங்க: அமெரிக்கா, சீனாவுக்கு பிறகு நாமதான்! ரஷ்யாவே நமக்கு அப்புறம்தான்! உலக அளவில் கெத்து காட்டும் இந்தியா!
