காஷ்மீரில் மீண்டும் ரத்த வெள்ளம்… புலம்பெயர் தொழிலாளர்கள் மீது பயங்கரவாதிகள் துப்பாக்கிச்சூடு; 2 பேர் பலி!
குல்காம் பகுதியில் பயங்கரவாதத் தாக்குதலில் காயங்களால் மேலும் ஒரு புலம்பெயர் தொழிலாளி உயிரிழந்ததை அடுத்து, பலி எண்ணிக்கை இரண்டாக உயர்ந்துள்ளது.
ஜம்மு-காஷ்மீரின் குல்காம் மாவட்டத்தில் புலம்பெயர் தொழிலாளர்களை குறிவைத்து நடத்தப்பட்ட பயங்கரவாதத் தாக்குதலில் காயமடைந்த மேலும் ஒரு தொழிலாளி சிகிச்சை பலனின்றி உயிரிழந்ததை அடுத்து, பலி எண்ணிக்கை இரண்டாக உயர்ந்துள்ளது. இந்தச் சம்பவம் காஷ்மீரில் பணியாற்றி வரும் வெளிமாநிலத் தொழிலாளர்களிடையே மீண்டும் அச்சத்தை ஏற்படுத்தியுள்ளது.
குல்காம் மாவட்டத்தின் கேலம் பகுதியில் உள்ள ஒரு செங்கல் சூளையில் நேற்று இரவு வெளிமாநிலத் தொழிலாளர்கள் வழக்கம்போல் பணியில் ஈடுபட்டிருந்தபோது, ஆயுதம் ஏந்திய பயங்கரவாதிகள் திடீரென அங்கு நுழைந்து துப்பாக்கிச்சூடு நடத்தினர்.
இந்த தாக்குதலில் சத்தீஸ்கர் மாநிலத்தைச் சேர்ந்த தீபக் ராத்ரே மற்றும் பூபேந்தர் ஆகியோர் படுகாயமடைந்தனர். தீபக் ராத்ரே சம்பவ இடத்திலேயே உயிரிழந்த நிலையில், படுகாயமடைந்த பூபேந்தர் முதலில் அனந்தநாக் அரசு மருத்துவமனையிலும், பின்னர் ஸ்ரீநகரில் உள்ள மருத்துவமனையிலும் அனுமதிக்கப்பட்டார். இருப்பினும், இன்று காலை சிகிச்சை பலனின்றி அவரும் உயிரிழந்ததாக அதிகாரிகள் தெரிவித்தனர்.
இதையும் படிங்க: ஜம்மு-காஷ்மீரில் கனமழை கொடூரம்… 11 பேர் பலி; முதல்வருடன் அமித் ஷா அவசர ஆலோசனை!
தாக்குதல் நடைபெற்ற உடனேயே ஜம்மு-காஷ்மீர் காவல்துறை, இந்திய ராணுவம் மற்றும் மத்திய ரிசர்வ் போலீஸ் படையினர் சம்பவ இடத்தை முற்றுகையிட்டு பாதுகாப்பை பலப்படுத்தினர். தப்பியோடிய பயங்கரவாதிகளை பிடிக்க கேலம் மற்றும் அதைச் சுற்றியுள்ள பகுதிகளில் தீவிர தேடுதல் வேட்டை நடைபெற்று வருகிறது. மாவட்ட எல்லைகளில் கூடுதல் சோதனைச் சாவடிகள் அமைக்கப்பட்டு, வாகனங்கள் மற்றும் சந்தேக நபர்கள் தீவிரமாக கண்காணிக்கப்பட்டு வருகின்றனர்.
இந்த தாக்குதலை ஜம்மு-காஷ்மீர் துணைநிலை ஆளுநர் மனோஜ் சின்ஹா கடுமையாகக் கண்டித்துள்ளார். உயிரிழந்த தொழிலாளர்களின் குடும்பத்தினருக்கு ஆழ்ந்த இரங்கல் தெரிவித்த அவர், தாக்குதலில் ஈடுபட்டவர்களை விரைவாக கண்டறிந்து சட்டத்தின் முன் நிறுத்த பாதுகாப்புப் படைகளுக்கு உத்தரவிட்டுள்ளதாக கூறினார். முன்னாள் முதலமைச்சர் மெஹ்பூபா முஃப்தி உள்ளிட்ட பல்வேறு அரசியல் தலைவர்களும் இந்த தாக்குதலை கண்டித்துள்ளனர்.
கடந்த சில ஆண்டுகளாக ஜம்மு-காஷ்மீரில் வெளிமாநிலத் தொழிலாளர்கள், சிறுபான்மையினர் மற்றும் பாதுகாப்புப் படையினரை குறிவைத்து இலக்கு வைத்து தாக்குதல்கள் நடைபெற்று வரும் நிலையில், இந்தச் சம்பவம் மீண்டும் பாதுகாப்பு குறித்த கவலையை அதிகரித்துள்ளது. தொழிலாளர்கள் பாதுகாப்பை வலுப்படுத்த வேண்டும் என்ற கோரிக்கையும் வலுத்து வருகிறது.
இதையும் படிங்க: அமர்நாத், வைஷ்ணவ தேவி யாத்திரைக்கு திடீர் தடை..! லட்சக்கணக்கான பக்தர்களுக்கு காத்திருந்த அதிர்ச்சி!
