ஈரான் போர் குறித்து விவாதிக்க வேண்டும்! எதிர்க்கட்சிகளின் அமளியால் முடங்கியது பார்லி.,!! ஒத்திவைப்பு!

புதுடில்லி, மார்ச் 9: ஈரான்-இஸ்ரேல்-அமெரிக்கா போர் எதிரொலியாக வளைகுடா நாடுகளில் சிக்கியுள்ள இந்தியர்களின் நிலை குறித்து விவாதிக்க வலியுறுத்தி எதிர்க்கட்சி உறுப்பினர்கள் மக்களவையில் தொடர் அமளியில் ஈடுபட்டதால், இன்று நாடாளுமன்ற பட்ஜெட் கூட்டத் தொடரின் இரண்டாம் கட்ட அமர்வு நாள் முழுவதும் ஒத்திவைக்கப்பட்டது.

பாராளுமன்ற பட்ஜெட் கூட்டத் தொடரின் முதல் கட்ட அமர்வு கடந்த பிப்ரவரி 13-ஆம் தேதியுடன் நிறைவடைந்தது. இரண்டாம் கட்ட அமர்வு இன்று காலை தொடங்கியது. மக்களவை கூடியதும், அஜித் பவார் உள்ளிட்ட ஐந்து உறுப்பினர்களின் மறைவுக்கு இரங்கல் தெரிவிக்கப்பட்டு, நண்பகல் 12 மணி வரை ஒத்திவைக்கப்பட்டது.

அவை மீண்டும் கூடியபோது, வெளியுறவு அமைச்சர் எஸ். ஜெய்சங்கர் ஈரான் போர் நிலவரம் குறித்து விளக்கம் அளித்தார். அப்போதே, வளைகுடா நாடுகளில் தவித்து வரும் இந்தியர்களை மீட்க வேண்டும், போர் நிலவரம் குறித்து விரிவான விவாதம் நடத்த வேண்டும் என்று எதிர்க்கட்சி எம்பிக்கள் கோரிக்கை வைத்தனர். 

இதையும் படிங்க: கடும் அமளியால் லோக்சபா ஒத்திவைப்பு! இன்னைக்குமா இப்பிடி?! பட்ஜெட் கூட்டத்தொடர் முதல் அமர்வு நிறைவு!

காங்கிரஸ், திரிணமூல் காங்கிரஸ், சமாஜ்வாடி கட்சி, ஆர்ஜேடி உள்ளிட்ட எதிர்க்கட்சி உறுப்பினர்கள் கையில் பதாகைகள் ஏந்தியபடி மையப் பகுதிக்கு வந்து முழக்கமிட்டனர். “இந்தியர்களை மீட்க வேண்டும்”, “வளைகுடா இந்தியர்களுக்கு பாதுகாப்பு” என்று கோஷமிட்டனர்.

இதனால் அவை நடவடிக்கை பிற்பகல் 3 மணி வரை ஒத்திவைக்கப்பட்டது. மீண்டும் அவை கூடியபோதும் எதிர்க்கட்சி உறுப்பினர்கள் தொடர் அமளியில் ஈடுபட்டனர். சபாநாயகர் ஒம்பிர்லா மீண்டும் மீண்டும் ஒழுங்கு கேட்டும் அமளி தொடர்ந்ததால், இறுதியாக மக்களவை நாள் முழுவதும் ஒத்திவைக்கப்பட்டது.

முன்னதாக காலையில் நாடாளுமன்ற வளாகத்தில் எதிர்க்கட்சி எம்பிக்கள் போராட்டத்தில் ஈடுபட்டனர். வளைகுடா நாடுகளில் சுமார் ஒரு கோடி இந்தியர்கள் வேலை செய்து வரும் நிலையில், போர் காரணமாக அவர்களின் உயிர், வேலைவாய்ப்பு ஆபத்தில் உள்ளதாகவும், அரசு உடனடியாக மீட்பு நடவடிக்கை எடுக்க வேண்டும் என்றும் கோரிக்கை வலுத்தது.

இந்த அமளி தொடர்பாக சபாநாயகர் ஒம்பிர்லா, “விவாதத்துக்கு தயாராக இருக்கிறோம், ஆனால் ஒழுங்கு தேவை” என்று கூறினார். ஆனால் எதிர்க்கட்சிகள் விவாதத்துக்கு அனுமதி இல்லாமல் அமளியில் ஈடுபட்டதால் அவை நடவடிக்கை முடங்கியது. இதனால் பட்ஜெட் கூட்டத் தொடரின் இரண்டாம் கட்டம் தொடக்கத்திலேயே சர்ச்சையில் சிக்கியுள்ளது.

ஈரான் போர் காரணமாக வளைகுடா நாடுகளில் இந்தியர்களின் நிலை குறித்து நாடு முழுவதும் கவலை நிலவுகிறது. அரசு உடனடியாக விளக்கம் அளித்து நடவடிக்கை எடுக்க வேண்டும் என்ற எதிர்பார்ப்பு அதிகரித்துள்ளது.

இதையும் படிங்க: ஒரு புறம் குண்டு மழை!!மறுபக்கம் அமில மழை!! நரக வேதனை அனுபவிக்கும் ஈரான் மக்கள்!!