மத்தியப் பிரதேசத்தில் மழைநீரில் மறைந்திருந்த ஆபத்து! வடிகாலில் பாய்ந்த கார்! 3 குழந்தைகள் உட்பட 8 பேர் பலி!

போபால்: மத்தியப் பிரதேசத்தில் வெள்ளம் பெருக்கெடுத்து ஓடிய வடிகாலில் கார் விழுந்த பயங்கர விபத்தில் 3 குழந்தைகள், 2 பெண்கள் உட்பட 8 பேர் உயிரிழந்த சம்பவம் பெரும் சோகத்தை ஏற்படுத்தியுள்ளது.

மத்தியப் பிரதேசத்தின் அகர் மால்வா மாவட்டத்தில் இந்த அதிர்ச்சி சம்பவம் நடைபெற்றுள்ளது. நல்கேடா நகரில் உள்ள புகழ்பெற்ற பாகுளமுகி கோவிலுக்கு அருகே இன்று (செப். 19) அதிகாலை இந்த விபத்து நிகழ்ந்ததாக போலீசார் தெரிவித்துள்ளனர்.

ஒடிசா மாநிலத்தில் இருந்து பக்தர்கள் சிலர் காரில் பாகுளமுகி கோவிலுக்கு வந்துள்ளனர். அப்போது அப்பகுதியில் கனமழை பெய்து கொண்டிருந்ததாக கூறப்படுகிறது. இதனால் சாலையோரத்தில் உள்ள வடிகாலில் மழைநீர் அதிகளவில் பெருக்கெடுத்து ஓடியுள்ளது. இந்த நிலையில், டிரைவரின் கவனக்குறைவால் கார் கட்டுப்பாட்டை இழந்து வெள்ளம் சூழ்ந்திருந்த வடிகாலுக்குள் விழுந்ததாக முதற்கட்ட தகவல்கள் தெரிவிக்கின்றன.

இதையும் படிங்க: மகனைப் பார்க்க ஆஸ்திரேலியா சென்ற ஆந்திர பெண்! ஒரே விபத்தில் மாமியார், மருமகள் பலி!

கார் தண்ணீரில் சிக்கியதை அறிந்த உள்ளூர் மக்கள் உடனடியாக மீட்பு பணியில் ஈடுபட்டனர். தகவல் அறிந்து அங்கு விரைந்து சென்ற போலீசாரும், பொதுமக்களுடன் இணைந்து மீட்பு நடவடிக்கைகளை மேற்கொண்டனர். நீண்ட முயற்சிக்குப் பிறகு காரில் இருந்தவர்களை மீட்கும் பணி நடைபெற்றது.

இந்த விபத்தில் 3 குழந்தைகள், 2 பெண்கள் உள்பட மொத்தம் 8 பேர் உயிரிழந்தனர். அவர்களின் உடல்களை மீட்ட போலீசார், பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். விபத்து குறித்து வழக்குப்பதிவு செய்து விசாரணை நடைபெற்று வருகிறது.

கனமழை பெய்யும் நேரங்களில் சாலையில் தேங்கியுள்ள தண்ணீர் மற்றும் வெள்ளம் பெருக்கெடுத்து ஓடும் பகுதிகளில் வாகனங்களை இயக்குவது ஆபத்தை ஏற்படுத்தக்கூடும். குறிப்பாக இரவு மற்றும் அதிகாலை நேரங்களில் வெளிச்சம் குறைவாக இருப்பதால் சாலையின் நிலை, வடிகால் அல்லது வெள்ளப்பாதை போன்றவற்றை ஓட்டுநர்கள் எளிதில் கவனிக்க முடியாத சூழல் ஏற்படலாம்.

சிறிய கவனக்குறைவும் உயிரிழப்பை ஏற்படுத்தும் என்பதையே இந்த சம்பவம் மீண்டும் உணர்த்தியுள்ளது. கனமழை மற்றும் வெள்ளம் தொடர்பான எச்சரிக்கைகள் இருக்கும் நேரங்களில் தேவையற்ற இரவு பயணங்களை தவிர்ப்பதும், வெள்ளநீர் தேங்கியுள்ள சாலைகளில் கூடுதல் கவனத்துடன் வாகனம் இயக்குவதும் அவசியமாகிறது.

இதையும் படிங்க: துணை குடியரசுத் தலைவர் நிகழ்ச்சியில் ஏன் பங்கேற்கவில்லை? அமைச்சர் விஸ்வநாதன் விளக்கம்!