இந்திய கேப்டன் ஸ்மிட் மச்சாரின் வீரத்தை பாராட்டி ரூ.1 கோடி வெகுமதி! பரிசை அறிவித்த நிறுவனம்!
ஸ்மிட் மச்சாரின் துணிச்சல் மற்றும் பொறுப்புணர்வை பாராட்டும் வகையில் அவருக்கும் அவரது குடும்பத்தினருக்கும் ரூ.1 கோடி நிதியுதவி வழங்குவதாக மேன்கைண்ட் பார்மா அறிவித்துள்ளது.
by
வானில் ஏற்பட்ட மிகப்பெரிய ஆபத்தான சூழ்நிலையில் துணிச்சலுடன் செயல்பட்டு பயணிகளின் உயிரைக் காப்பாற்றிய இந்திய விமானி கேப்டன் ஸ்மிட் மச்சாருக்கு ரூ.1 கோடி நிதியுதவி வழங்குவதாக மேன்கைண்ட் பார்மா நிறுவனம் அறிவித்துள்ளது. இந்த அறிவிப்பு தற்போது சமூக வலைதளங்களில் கவனம் பெற்றுள்ளது.
செப்டம்பர் 30-ம் தேதி துபாயில் இருந்து இஸ்ரேலின் டெல் அவிவ் நோக்கி ஃப்ளைதுபாய் விமானம் FZ1073 புறப்பட்டது. அந்த விமானத்தில் 174 பயணிகள் மற்றும் 8 பணியாளர்கள் இருந்தனர். விமானம் நடுவானில் சுமார் 33 ஆயிரம் அடி உயரத்தில் பறந்து கொண்டிருந்தபோது, காக்பிட் பகுதியில் கேப்டன் ஸ்மிட் மச்சாருக்கும் துணை விமானிக்கும் இடையே கடுமையான மோதல் ஏற்பட்டது.
ஓமன் நாட்டைச் சேர்ந்த துணை விமானி ஹமாம் அல்-ஹம்மாமி, கேப்டன் ஸ்மிட் மச்சாரை தாக்கியதாக விசாரணை அமைப்புகள் தெரிவிக்கின்றன. இந்த தாக்குதலில் படுகாயமடைந்த போதிலும், விமானத்தின் கட்டுப்பாட்டையும் பயணிகளின் பாதுகாப்பையும் கருத்தில் கொண்டு ஸ்மிட் மச்சார் தொடர்ந்து செயல்பட்டார்.
இதையும் படிங்க: இன்னொரு 9/11 நடக்காமல் தடுத்த இந்தியர்! சுமித் ஒரு ஹீரோ! இந்திய விமானியை பாராட்டிய மோடி!
விமானம் திடீரென ஆயிரக்கணக்கான அடி உயரத்தை இழந்த நிலையில், அவர் காக்பிட் கதவை திறக்க முடிந்தது. இதையடுத்து பயணிகள் மற்றும் விமான ஊழியர்கள் உதவியுடன் தாக்குதல் நடத்தியவரை கட்டுப்படுத்தினர். பின்னர் விமானம் சவுதி அரேபியாவின் தபூக் விமான நிலையத்தில் பாதுகாப்பாக தரையிறக்கப்பட்டது.
சம்பவத்தில் காயமடைந்த கேப்டன் ஸ்மிட் மச்சார் தற்போது அபுதாபியில் உள்ள மருத்துவமனையில் சிகிச்சை பெற்று வருகிறார். பிரதமர் நரேந்திர மோடியுடனான காணொலி உரையாடலிலும் அவர் தனது அனுபவத்தை பகிர்ந்திருந்தார். உயிருக்கு ஆபத்து ஏற்பட்ட நிலையிலும் பயணிகளை காப்பாற்ற வேண்டும் என்ற எண்ணத்தில் செயல்பட்டதாக அவர் தெரிவித்திருந்தார்.
இந்த நிலையில், ஸ்மிட் மச்சாரின் துணிச்சல் மற்றும் பொறுப்புணர்வை பாராட்டும் வகையில் அவருக்கும் அவரது குடும்பத்தினருக்கும் ரூ.1 கோடி நிதியுதவி வழங்குவதாக மேன்கைண்ட் பார்மா அறிவித்துள்ளது. இத்தொகை நன்றியின் அடையாளமாக வழங்கப்படுவதாக நிறுவனம் தெரிவித்துள்ளது.
இந்த சம்பவம் தொடர்பாக ஐக்கிய அரபு எமிரேட்ஸ் உள்ளிட்ட அதிகாரிகள் தொடர்ந்து விசாரணை நடத்தி வருகின்றனர். விமானப் பாதுகாப்பு தொடர்பான பல்வேறு கேள்விகளும் எழுந்துள்ள நிலையில், இந்திய கேப்டன் ஸ்மிட் மச்சாரின் துணிச்சலான செயலுக்கு பல்வேறு தரப்பினரும் பாராட்டு தெரிவித்து வருகின்றனர்.
இதையும் படிங்க: இன்னொரு 9/11 நடக்காமல் தடுத்த இந்தியர்! சுமித் ஒரு ஹீரோ! இந்திய விமானியை பாராட்டிய மோடி!
