இடி, மின்னலுடன் புரட்டி எடுக்கப்போகும் பேய் மழை! வெப்ப அலையில் இருந்து தப்பிய வட இந்தியா!

வட இந்திய மாநிலங்களை கடந்த சில நாட்களாக கொளுத்திய தீவிர வெப்ப அலைக்குப் பிறகு, இப்போது பெரும் மழைக்கான எச்சரிக்கை விடுக்கப்பட்டுள்ளது. இந்திய வானிலை ஆய்வு மையம் வெளியிட்டுள்ள செய்தியில், வடக்கு மற்றும் மத்திய இந்தியா முழுவதும் பிரம்மாண்ட மேகக்கூட்டங்கள் திரண்டு வருவதாக தெரிவிக்கப்பட்டுள்ளது.

இந்தியாவின் மேம்பட்ட வானிலை கண்காணிப்பு செயற்கைக்கோள் INSAT-3DS எடுத்த படங்களில், பாகிஸ்தான் மற்றும் வடமேற்கு இந்தியாவிலிருந்து தொடங்கி பஞ்சாப், அரியானா, டெல்லி, உத்தரப்பிரதேசம், மத்திய இந்தியா வழியாக வங்காள விரிகுடா வரை சுமார் 2,000 முதல் 2,500 கிலோமீட்டர் நீளத்திற்கு அடர்த்தியான மேகக்கூட்டம் தொடர்ச்சியாக திரண்டு காணப்படுகிறது. இந்த மாபெரும் மேக அமைப்பு வளிமண்டலத்தில் ஏற்பட்டுள்ள மாற்றத்தால் உருவாகியுள்ளது.

இதனால் அரியானா, டெல்லி, ராஜஸ்தான், உத்தரப்பிரதேசம் உள்ளிட்ட பகுதிகளில் இடி, மின்னல் மற்றும் பலத்த சூறைக்காற்றுடன் கனமழை பெய்ய வாய்ப்புள்ளதாக வானிலை ஆய்வு மையம் எச்சரிக்கை விடுத்துள்ளது. இமாச்சலப் பிரதேசம், உத்தரகாண்ட், ஜம்மு காஷ்மீர் போன்ற மலைப் பகுதிகளில் மிதமான முதல் கனமழை பெய்யக்கூடும் என அறிவிக்கப்பட்டுள்ளது.

இதையும் படிங்க: இடி, மின்னலுடன் கொட்டித்தீர்த்த மழை!! நெல்லையில் 168 மி.மீட்டரில் கனமழை பதிவு!

கடந்த சில நாட்களாக வட இந்தியாவில் வெப்ப அலை தீவிரமாக இருந்த நிலையில், மக்கள் பெரும் அவதிக்கு உள்ளாகினர். பல இடங்களில் வெப்பநிலை 45 டிகிரிக்கு மேல் பதிவானது. இந்த சூழலில் வரவிருக்கும் மழை மக்களுக்கு நிம்மதியை அளிக்கும் என்றாலும், இடி மின்னல் மற்றும் பலத்த காற்று ஆபத்தை ஏற்படுத்தக்கூடும். எனவே மக்கள் பாதுகாப்புடன் இருக்க வேண்டும் என அதிகாரிகள் அறிவுறுத்தியுள்ளனர்.

வானிலை மையம் தொடர்ந்து கண்காணித்து வருவதாகவும், அடுத்த 48 மணி நேரத்தில் வானிலை மேலும் மாறக்கூடும் என எச்சரிக்கை விடுத்துள்ளது. விவசாயிகள் மழை நீரை சரியாக பயன்படுத்திக் கொள்ளவும், மின்சாரம் மற்றும் போக்குவரத்து தொடர்பான எச்சரிக்கைகளை பின்பற்றவும் அறிவுறுத்தப்பட்டுள்ளது.

வட இந்தியாவில் திடீர் வானிலை மாற்றம் ஏற்படுவது அரசியல், பொருளாதாரம் உள்ளிட்ட பல துறைகளிலும் தாக்கத்தை ஏற்படுத்தும் என எதிர்பார்க்கப்படுகிறது. மக்கள் உடல் நலத்தை கவனித்துக் கொள்ளுமாறு மருத்துவர்களும் அறிவுறுத்தியுள்ளனர்.

இதையும் படிங்க: அடுத்த 6 நாட்களுக்கு இடி, மின்னலுடன் மழை! லிஸ்ட்ல உங்க ஊரும் இருக்கா? வானிலை மையம் அப்டேட்!