மேட்டூர் அணையை நாளை திறக்கிறார் முதல்வர் விஜய்! 10 ஆயிரத்தை கடந்த நீர்வரத்து! டெல்டா விவசாயிகளுக்கு குட்நியூஸ்!

காவிரி டெல்டா பாசனத்திற்காக மேட்டூர் அணை நாளை திறக்கப்பட உள்ள நிலையில், அணைக்கு வரும் நீரின் அளவு தொடர்ந்து அதிகரித்து வருவது விவசாயிகள் மத்தியில் நம்பிக்கையை ஏற்படுத்தியுள்ளது. தற்போது மேட்டூர் அணையின் நீர்வரத்து வினாடிக்கு 10,485 கனஅடியாக உயர்ந்துள்ளது.

கர்நாடக மாநிலத்தில் காவிரி நீர்பிடிப்பு பகுதிகளில் தொடர்ந்து கனமழை பெய்து வருகிறது. இதன் காரணமாக கபினி மற்றும் கே.ஆர்.எஸ். உள்ளிட்ட முக்கிய அணைகளுக்கு நீர்வரத்து அதிகரித்து, அவற்றின் நீர்மட்டமும் வேகமாக உயர்ந்து வருகிறது. அணைகளின் பாதுகாப்பு மற்றும் நீர்மட்டத்தை கட்டுப்படுத்தும் நடவடிக்கையாக உபரி நீர் காவிரியில் திறந்துவிடப்பட்டு வருகிறது.

கடந்த சில நாட்களாக உபரி நீர் வெளியேற்றம் குறைக்கப்பட்டிருந்த நிலையில், மீண்டும் அதன் அளவு அதிகரிக்கப்பட்டுள்ளது. இதன் தாக்கமாக மேட்டூர் அணைக்கும் வரும் நீரின் அளவு படிப்படியாக உயரத் தொடங்கியுள்ளது. சில நாட்களுக்கு முன்பு வினாடிக்கு 9,035 கனஅடியாக இருந்த நீர்வரத்து தற்போது 10,485 கனஅடியாக அதிகரித்துள்ளது.

இதையும் படிங்க: ஒகேனக்கல்லில் 8,000 கனஅடியாக அதிகரித்த காவிரி நீர்வரத்து! பரிசல் இயக்கத்துக்கு தடை!

இதனால் மேட்டூர் அணையின் நீர் இருப்பும் கணிசமான நிலையில் உள்ளது. அணையின் தற்போதைய நீர்மட்டம் 90.47 அடியாகவும், நீர் இருப்பு 53.70 டி.எம்.சி.யாகவும் உள்ளது. குடிநீர் தேவைக்காக அணையில் இருந்து வினாடிக்கு 2,000 கனஅடி தண்ணீர் வெளியேற்றப்பட்டு வருகிறது.

இதற்கிடையே காவிரி டெல்டா மாவட்டங்களின் பாசன தேவைக்காக மேட்டூர் அணையை நாளை திறக்க முதல்வர் விஜய் உள்ளார். அணை திறக்கப்பட உள்ள நேரத்தில் கர்நாடக காவிரி நீர்பிடிப்பு பகுதிகளில் மழை தொடர்ந்து பெய்து வருவதுடன், மேட்டூருக்கான நீர்வரத்தும் அதிகரித்து வருவது முக்கியத்துவம் பெற்றுள்ளது.

மேட்டூர் அணையில் இருந்து பாசனத்திற்கான தண்ணீர் திறக்கப்படுவதால் டெல்டா மாவட்டங்களில் குறுவை உள்ளிட்ட சாகுபடி பணிகள் தீவிரமடையும் என எதிர்பார்க்கப்படுகிறது. இருப்பினும், காவிரி நீர்வரத்து தொடர்ந்து இதே அளவில் இருக்கும் என்பதற்கு உத்தரவாதம் இல்லை. கர்நாடக நீர்பிடிப்பு பகுதிகளில் மழையின் தீவிரம் மற்றும் அங்குள்ள அணைகளில் இருந்து திறக்கப்படும் நீரின் அளவைப் பொறுத்தே மேட்டூருக்கான நீர்வரத்து அடுத்தடுத்த நாட்களில் மாறக்கூடும்.

இதனால், மேட்டூர் அணை திறப்பு மற்றும் தற்போதைய நீர்வரத்து டெல்டா விவசாயிகளுக்கு சாதகமான தொடக்கமாக பார்க்கப்பட்டாலும், தொடர்ந்து கிடைக்கும் நீர்வரத்தே சாகுபடி காலத்தில் முக்கியமானதாக இருக்கும்.

இதையும் படிங்க: தமிழக விவசாயிகளுக்கு குட் நியூஸ்! காவிரி நீர்ப்பிடிப்பு பகுதிகளில் கொட்டும் கனமழை... 5 மாவட்டங்களுக்கு வானிலை அலர்ட்!