ஹலோ மோடி ஜி!! பிரதமர் மோடியிடம் போனில் பேசிய இஸ்ரேல் பிரதமர்! வலுப்பெறும் உறவுகள்!

புதுடெல்லி, டிசம்பர் 11: இஸ்ரேல் பிரதமர் பெஞ்சமின் நெதன்யாகு நேற்று மாலை (டிசம்பர் 10) இந்தியப் பிரதமர் நரேந்திர மோடியை தொலைபேசியில் தொடர்பு கொண்டு சுமார் 20 நிமிடங்கள் உரையாடினார். பயங்கரவாதத்துக்கு எதிரான போரில் இரு நாடுகளும் ஒருமித்த  குரலில் நிற்பதை இந்த உரையாடல் மீண்டும் உறுதிப்படுத்தியுள்ளது.

பிரதமர் அலுவலகம் வெளியிட்டுள்ள அறிக்கையின்படி, பயங்கரவாத அமைப்புகள் யாராக இருந்தாலும் சரி, எங்கு இயங்கினாலும் சரி, அவர்களுக்கு எதிராக கடுமையான நடவடிக்கை எடுக்கப்பட வேண்டும் என்றும், இதில் எந்தவித சமரசமும் கூடாது என்றும் இரு தலைவர்களும் ஒருமித்த கருத்து தெரிவித்தனர். «பயங்கரவாதத்துக்கு எதிராக பூஜ்ஜிய சகிப்புத்தன்மை» (Zero Tolerance Policy) என்ற கொள்கையை மீண்டும் வலியுறுத்தினர்.

பாதுகாப்புத் துறை, உயர்தொழில்நுட்பம், செயற்கை நுண்ணறிவு, விவசாயத் தொழில்நுட்பம், நீர்மேலாண்மை உள்ளிட்ட பல்வேறு துறைகளில் இந்தியாவுக்கும் இஸ்ரேலுக்கும் இடையிலான ஒத்துழைப்பை அடுத்த கட்டத்துக்கு எடுத்துச் செல்ல இரு தலைவர்களும் உறுதி அளித்தனர். குறிப்பாக, ‘மேக் இன் இந்தியா’ மற்றும் ‘மேக் ஃபார் தி வேர்ல்டு’ திட்டங்களுடன் இஸ்ரேலின் தொழில்நுட்பங்களை இணைத்து புதிய திட்டங்களைத் தொடங்குவது குறித்தும் ஆலோசிக்கப்பட்டது.

இதையும் படிங்க: அதிகாலையிலேயே பயங்கரம்... அலறிய ஐயப்ப பக்தர்கள்... 3 பேர் துடிதுடித்து பலி...!

காசா பகுதியில் போர் நிறுத்தத்தை நிரந்தரமாக்குவதற்கான அமைதித் திட்டத்தை விரைவாக நடைமுறைப்படுத்த வேண்டும் என்றும், பிணைக் கைதிகளை விடுவிப்பது, மனிதாபிமான உதவிகளை உடனடியாக அனுப்புவது உள்ளிட்ட நடவடிக்கைகளுக்கு இந்தியா தொடர்ந்து ஆதரவளிக்கும் என்றும் பிரதமர் மோடி உறுதியாகத் தெரிவித்தார்.

மேற்கு ஆசியப் பிராந்தியத்தில் தற்போது நிலவும் பதற்றத்தைத் தணிக்க வேண்டியதன் அவசியம் குறித்தும் விரிவாகப் பேசப்பட்டது. பிராந்தியத்தில் நீடித்த அமைதியும் செழிப்பும் ஏற்பட வேண்டும் என்ற இலக்கில் இந்தியாவும் இஸ்ரேலும் ஒன்றாக இயங்கும் என்றும் இரு தலைவர்களும் உறுதியளித்தனர்.

கடந்த சில ஆண்டுகளில் இந்தியா - இஸ்ரேல் உறவு அனைத்துத் துறைகளிலும் புதிய உச்சத்தை எட்டியிருப்பதாகவும், எதிர்காலத்தில் இந்த நட்பு இன்னும் ஆழமாகும் என்றும் அரசுத் தரப்பு வட்டாரங்கள் தெரிவிக்கின்றன.

இதையும் படிங்க: அதிமுகவினர் கவனத்திற்கு..! ELECTION- ல போட்டியிடனுமா? விருப்ப மனுக்கள் தொடர்பாக இபிஎஸ் முக்கிய அறிவிப்பு...!