மருத்துவ கனவை நோக்கி 22.79 லட்சம் மாணவர்கள்! நாடு முழுவதும் நீட் தேர்வு தொடங்கியது!
இளநிலை மருத்துவப் படிப்புகளுக்கான (NEET UG) நுழைவுத் தேர்வு இன்று மதியம் 2:00 மணிக்குத் தொடங்கி, மாலை 5:20 மணி வரை நடைபெறுகிறது.
- Sun, 03 May 2026 14:26:20 IST
by
Thenmozhi Kumar
- #
இந்தியாவில் உள்ள மருத்துவக் கல்லூரிகளில் எம்பிபிஎஸ் (MBBS), பிடிஎஸ் (BDS) மற்றும் ஆயுஷ் உள்ளிட்ட இளநிலை மருத்துவப் படிப்புகளில் சேருவதற்கான 'நீட்' (NEET UG) நுழைவுத் தேர்வு இன்று நாடு முழுவதும் தொடங்கியுள்ளது. தேசியத் தேர்வு முகமை (NTA) நடத்தும் இந்தத் தேர்வு, லட்சக்கணக்கான மாணவர்களின் மருத்துவக் கனவை நனவாக்கும் ஒரு முக்கிய நுழைவாயிலாகக் கருதப்படுகிறது.
இந்த ஆண்டு நீட் தேர்வை எழுத விண்ணப்பித்த மாணவர்களின் எண்ணிக்கை கடந்த ஆண்டுகளை விடக் கணிசமாக உயர்ந்துள்ளது. நாடு முழுவதும் மொத்தம் 22,79,640 மாணவர்கள் இத்தேர்வை எழுதப் பதிவு செய்துள்ளனர். மாணவர்களின் வசதிக்காக இந்தியா முழுவதும் மற்றும் வெளிநாடுகளில் சில முக்கிய நகரங்கள் உட்பட மொத்தம் 552 நகரங்களில் தேர்வு மையங்கள் அமைக்கப்பட்டுள்ளன.
மதியம் 2:00 மணிக்குத் தொடங்கிய இந்தத் தேர்வு மாலை 5:20 மணி வரை நடைபெறும். முன்னதாக, மதியம் 1:30 மணிக்கே தேர்வு மையங்களின் கதவுகள் மூடப்பட்டு, மாணவர்கள் அனைவரும் இருக்கைகளில் அமர வைக்கப்பட்டனர்.
இதையும் படிங்க: மருத்துவ கனவுடன் இன்று களம் காணும் மாணவர்கள்! நாடு முழுவதும் நீட் தேர்வு இன்று தொடக்கம்!
தேர்வு முறைகேடுகளைத் தவிர்க்கவும், நேர்மையான முறையில் தேர்வை நடத்தவும் தேசியத் தேர்வு முகமை இந்த ஆண்டு கூடுதல் கட்டுப்பாடுகளை விதித்துள்ளது. மாணவர்கள் மெல்லிய மற்றும் தளர்வான ஆடைகளை மட்டுமே அணிய அனுமதிக்கப்பட்டுள்ளனர். பெரிய பொத்தான்கள் கொண்ட சட்டைகள் அல்லது முழுக்கை சட்டைகளுக்குத் தடை விதிக்கப்பட்டுள்ளது. மொபைல் போன்கள், ப்ளூடூத் கருவிகள், கால்குலேட்டர்கள் மற்றும் ஸ்மார்ட் வாட்ச் உள்ளிட்ட எந்தவொரு மின்னணு சாதனங்களும் தேர்வு அறைக்குள் அனுமதிக்கப்படவில்லை. தேர்வு மையங்களின் நுழைவாயிலில் மெட்டல் டிடெக்டர்கள் மூலம் மாணவர்கள் தீவிரப் பரிசோதனைக்கு உட்படுத்தப்பட்ட பின்னரே உள்ளே அனுமதிக்கப்பட்டனர்.
தமிழகத்தைப் பொறுத்தவரை சென்னை, மதுரை, கோவை, திருச்சி, சேலம் உள்ளிட்ட முக்கிய மாவட்டங்களில் ஆயிரக்கணக்கான மாணவர்கள் உற்சாகத்துடன் தேர்வில் பங்கேற்று வருகின்றனர். குறிப்பாகத் தமிழகத்தில் மட்டும் சுமார் 1.5 லட்சத்திற்கும் அதிகமான மாணவர்கள் தேர்வு எழுதுவதாகத் தகவல்கள் தெரிவிக்கின்றன. மாணவர்களுடன் வந்த பெற்றோர்கள் தேர்வு மையங்களுக்கு வெளியே காத்திருக்கின்றனர். அவர்களுக்காகச் சில இடங்களில் குடிநீர் மற்றும் நிழற்குடை வசதிகள் செய்யப்பட்டுள்ளன.
இதையும் படிங்க: திமுக கூட்டணி மகத்தான வெற்றி பெறும்! சூதாட்ட கும்பலின் வதந்திகளை நம்ப வேண்டாம் என திருமாவளவன் பேட்டி!
