வெள்ளத்தில் சிக்கிய தமிழர்கள்.. மீட்பதில் சிக்கல்... அவசர உதவி எண்கள் அறிவிப்பு..!!

நேபாளத்தில் திடீரென ஏற்பட்ட கடும் வெள்ளப்பெருக்கு மற்றும் நிலச்சரிவுகளால் தமிழ்நாட்டைச் சேர்ந்த சுற்றுலாப் பயணிகள் பலர் சிக்கியுள்ளனர். வடக்கு எல்லையோர மாவட்டங்களில் ஆறுகள் பெருக்கெடுத்து ஓடியதால் சாலைகள், பாலங்கள் மற்றும் தொலைத்தொடர்பு வசதிகள் முற்றிலும் துண்டிக்கப்பட்டுள்ளன. இதனால் மீட்புப் பணிகள் பெரும் சவாலாக மாறியுள்ளன.

தஞ்சாவூர் மாவட்டம் கும்பகோணம் உள்ளிட்ட பகுதிகளிலிருந்து சுற்றுலா சென்ற குழுக்களில் சுமார் ஐம்பதுக்கும் மேற்பட்ட தமிழர்கள் தொடர்பை இழந்துள்ளதாக தகவல்கள் வெளியாகி உள்ளன. சிலர் பாதுகாப்பான இடங்களுக்கு மாற்றப்பட்டிருப்பதாகவும், சிலர் மருத்துவமனையில் சிகிச்சை பெற்று வருவதாகவும் அறியப்படுகிறது. ஆனால் பலரின் நிலை குறித்து இன்னும் தெளிவான தகவல் கிடைக்கவில்லை.

இந்த நிலையில் தமிழ்நாடு அரசு உடனடி நடவடிக்கைகளில் இறங்கியுள்ளது. மத்திய அரசு மற்றும் நேபாளத்தில் உள்ள இந்திய தூதரகத்துடன் நெருக்கமாக ஒருங்கிணைந்து செயல்பட்டு வருகிறது. சுற்றுலா நிறுவனங்கள் மூலம் பயணிகளின் விவரங்கள் சேகரிக்கப்பட்டு அவர்களின் இருப்பிடம் மற்றும் தேவைகள் கண்காணிக்கப்படுகின்றன. வெளிநாட்டுத் தமிழர் நலன் மற்றும் மறுவாழ்வு ஆணையம் தொடர்ந்து கண்காணித்து வருகிறது. பாதிக்கப்பட்டவர்களின் உறவினர்கள் தகவல்களைப் பகிர்ந்து கொள்ள அழைப்பு விடுக்கப்பட்டுள்ளது. அவ்வாறு வரும் விவரங்களின் அடிப்படையில் மீட்பு மற்றும் பாதுகாப்பான திரும்பல் பணிகள் துரிதப்படுத்தப்படும் என உறுதியளிக்கப்பட்டுள்ளது.

இதையும் படிங்க: நேபாள வெள்ள பேரழிவு..! சுற்றுலா சென்ற தமிழர்கள் எங்கே?.. துரித கதியில் மீட்பு பணிகள்..!

அவசர உதவி தேவைப்படுவோருக்காக இருபத்து நான்கு மணி நேர உதவி எண்கள் அறிவிக்கப்பட்டுள்ளன. இந்தியாவிலிருந்து தொடர்பு கொள்ள டோல் ஃப்ரீ எண் 1800 309 3793 செயல்படுகிறது. வெளிநாட்டிலிருந்து அழைக்க +91 8069009901 அல்லது 08069009901 எண்களைப் பயன்படுத்தலாம். மிஸ்டு கால் வசதிக்காக +91 8069009900 அல்லது 08069009900 எண்கள் உள்ளன. இந்த எண்கள் மூலம் பாதிக்கப்பட்டவர்கள் அல்லது அவர்களது குடும்பத்தினர் உடனடி உதவி பெறலாம்.நேபாளத்தில் வெள்ளம் காரணமாக ஏற்பட்டுள்ள தொடர்பு முறிவுகளால் மீட்புப் பணிகள் மெதுவாக நடைபெறுகின்றன.

இருப்பினும் தமிழ்நாடு அரசு அனைத்து சாத்தியமான வழிகளிலும் உதவிகளை ஒருங்கிணைத்து வருகிறது. பயணிகளின் பாதுகாப்பும் விரைவான திரும்பலும் முன்னுரிமை அளிக்கப்படுகின்றன. குடும்பத்தினர் அமைதியுடன் இருக்கவும், தேவையான விவரங்களை உதவி எண்கள் மூலம் தெரிவிக்கவும் அறிவுறுத்தப்பட்டுள்ளது. நிலவரத்தை தொடர்ந்து கண்காணித்து தேவையான நடவடிக்கைகள் எடுக்கப்படும் என அரசு உறுதி அளித்துள்ளது.

இதையும் படிங்க: குரங்கருவியில் திடீர் வெள்ளம்..! அவசர அவசரமாக வெளியேற்றப்பட்ட சுற்றுலா பயணிகள்..!!