யு.பி.ஐ. பரிவர்த்தனைகளுக்கு புதிய கட்டணம்..?? மத்திய அரசு ஆலோசனை..!!

இந்தியாவின் டிஜிட்டல் புரட்சியின் அடையாளமாக உருவெடுத்துள்ள யுனிஃபைட் பேமெண்ட்ஸ் இன்டர்ஃபேஸ் (UPI) சேவை, சிறிய பெட்டிக்கடைகளில் இருந்து பெரிய ஷாப்பிங் மால்கள் வரை அனைத்து வணிக நிறுவனங்களிலும் இன்று இன்றியமையாத அங்கமாக மாறியுள்ளது. 2016-ம் ஆண்டு தேசிய கொடுப்பனவு கழகம் (NPCI) அறிமுகப்படுத்திய இந்த தொழில்நுட்பம், பணப் பரிவர்த்தனைகளை எளிதாக்கி, இந்தியர்களின் அன்றாட வாழ்க்கையை முழுமையாக மாற்றியமைத்துள்ளது. 

எந்தவித கூடுதல் கட்டணமும் இன்றி, 24 மணி நேரமும் ஒரு வங்கிக் கணக்கிலிருந்து மற்றொரு கணக்கிற்கு உடனடியாகப் பணம் அனுப்பும் வசதி, UPI-யை மக்களிடையே மிகவும் பிரபலமாக்கியது. இந்தியாவைத் தாண்டி உலக அளவில் அங்கீகாரம் பெற்றுள்ள இந்த முறை, சிங்கப்பூர், ஐக்கிய அரபு அமீரகம், பிரான்ஸ் உள்ளிட்ட பல நாடுகளில் அதிகாரபூர்வமாக அமல்படுத்தப்பட்டுள்ளது. இது இந்திய டிஜிட்டல் பொருளாதாரத்தின் வலிமையை உலகுக்கு நிரூபிக்கும் சான்றாக அமைந்துள்ளது.

இந்நிலையில், UPI பரிவர்த்தனைகளுக்கு புதிய கட்டண முறையை அறிமுகப்படுத்த மத்திய அரசு தீவிரமாகப் பரிசீலித்து வருவதாகத் தகவல்கள் வெளியாகியுள்ளன. ரிசர்வ் வங்கி மற்றும் NPCI வட்டாரங்கள் தெரிவித்தபடி, கூகுள் பே, போன் பே, பேடிஎம் உள்ளிட்ட UPI செயலிகள் மூலம் நடைபெறும் வணிகப் பரிவர்த்தனைகளுக்கு 0.05 சதவீதம் முதல் 0.07 சதவீதம் (5 முதல் 7 அடிப்படை புள்ளிகள்) வரை வணிகர் கட்டணம் (Merchant Discount Rate - MDR) வசூலிக்க திட்டமிடப்பட்டுள்ளது.

இதையும் படிங்க: "நீட் விவகாரத்தில் மத்திய அரசு பாராமுகமாக இருந்தால் பெரும் விளைவுகளைச் சந்திக்கும்!" - திமுக எம்.பி. ஆ.ராசா எச்சரிக்கை!

உதாரணமாக, ஒரு கடையில் ரூ.10,000 மதிப்புள்ள பரிவர்த்தனை நடைபெற்றால், அதிகபட்சமாக ரூ.5 முதல் ரூ.7 வரை மட்டுமே கட்டணமாக வசூலிக்கப்படும். இந்தக் கட்டணம் சாதாரண மக்களுக்கு அல்லது தனிநபர் இடையிலான (P2P) பரிவர்த்தனைகளுக்கு பொருந்தாது. QR கோடு மூலம் கடைகளில் நடைபெறும் வணிக ரீதியான பெரிய அளவிலான பரிவர்த்தனைகளுக்கு மட்டுமே இது பொருந்தும் என்று தெரிவிக்கப்பட்டுள்ளது.

தற்போது UPI பரிவர்த்தனைகள் முற்றிலும் இலவசமாகவே வழங்கப்பட்டு வருகின்றன. இதற்கான உள்கட்டமைப்பு, தொழில்நுட்ப பராமரிப்பு மற்றும் செயல்பாட்டுச் செலவுகளை வங்கிகளும், பேமெண்ட் ஆப் நிறுவனங்களுமே ஏற்று வருகின்றன. இந்தப் புதிய கட்டண முறை, டிஜிட்டல் உள்கட்டமைப்பை மேலும் வலுப்படுத்தவும், வங்கிகளின் நீண்டகால செலவுகளை சமாளிக்கவும் உதவும் என்று நிதி அமைச்சகம் கருதுகிறது. மேலும், அதிகரித்து வரும் பரிவர்த்தனை அளவை கருத்தில் கொண்டு தரமான சேவையை தொடர்ந்து உறுதி செய்ய இந்த நடவடிக்கை எடுக்கப்படுவதாகக் கூறப்படுகிறது.

UPI-யின் வளர்ச்சி அசுர வேகத்தில் உள்ளது. 2016-ல் தொடங்கிய இந்த சேவை, இன்று பல லட்சம் கோடி ரூபாய் பரிவர்த்தனைகளை மாதந்தோறும் கையாள்கிறது. இந்தப் புதிய மாற்றம் அமலுக்கு வந்தால், டிஜிட்டல் பணப் பரிவர்த்தனை அமைப்பு இன்னும் உறுதியான அடித்தளத்தைப் பெறும் என எதிர்பார்க்கப்படுகிறது. விரைவில் இது குறித்த அதிகாரபூர்வ அறிவிப்பு வெளியாகும் என்று தகவல்கள் தெரிவிக்கின்றன.

இதையும் படிங்க: தலைமை செயலாளர் சாய்குமார் பணிக்காலம் நீட்டிப்பு: தமிழக அரசின் கோரிக்கையை ஏற்றது மத்திய அரசு!