அதிமுகவுக்கு விரித்த வலை! திமுகவுக்கு விழுந்த குட்டு!! அமலாக்கத்துறை எதுக்கு வரணும்? ஐகோர்ட் அதிரடி!

சொத்து குவிப்பு வழக்கு பதிவு செய்யப்பட்டுள்ளது என்பதற்காக மட்டும் சட்டவிரோத பணப்பரிமாற்றத் தடைச் சட்டத்தின் (PMLA) கீழ் அமலாக்கத் துறை தானாக வழக்குப் பதிவு செய்ய வேண்டிய கட்டாயம் இல்லை என்று சென்னை உயர் நீதிமன்றம் தெளிவுபடுத்தியுள்ளது.

தி.மு.க. எம்.பி. ஆர்.கிரிராஜன் தாக்கல் செய்த மனுவில், அ.தி.மு.க. முன்னாள் அமைச்சர்கள் சி.விஜயபாஸ்கர், வீரமணி, காமராஜ், வேலுமணி, தங்கமணி, கே.பி.அன்பழகன், எம்.ஆர்.விஜயபாஸ்கர், சேலம் மத்திய கூட்டுறவு வங்கி முன்னாள் தலைவர் இளங்கோவன், எம்.எல்.ஏ. சத்யா உள்ளிட்டோர் மீது சொத்து குவிப்பு வழக்கு உள்ளதால், அமலாக்கத் துறை PMLA சட்டத்தின் கீழ் வழக்குப் பதிவு செய்ய உத்தரவிட வேண்டும் என்று கோரியிருந்தார். இந்த மனுக்களை விசாரித்த தலைமை நீதிபதி எஸ்.ஏ.தர்மாதிகாரி மற்றும் நீதிபதி ஜி.அருள்முருகன் அடங்கிய அமர்வு, மனுக்களை தள்ளுபடி செய்து உத்தரவு பிறப்பித்தது.

நீதிமன்றம் தனது உத்தரவில், “சொத்து குவிப்பு வழக்கு இருப்பதால் மட்டும் அமலாக்கத் துறை PMLA சட்டத்தின் கீழ் வழக்குப் பதிவு செய்ய வேண்டிய கட்டாயம் இல்லை. சட்டவிரோத பணப்பரிமாற்றத்துக்கான ஆதாரங்கள் உள்ளன என்று அமலாக்கத் துறை அதிகாரிகள் திருப்தி அடைய வேண்டும். அத்தகைய ஆதாரங்களின் அடிப்படையில்தான் PMLA சட்டத்தின் கீழ் நடவடிக்கை எடுப்பது குறித்து முடிவு செய்ய வேண்டும்” என்று தெளிவுபடுத்தியது.

இதையும் படிங்க: மகளை பாலியல் வன்கொடுமை செய்து சீரழித்த தந்தை! தூக்கு தண்டனையை ஆயுள் தண்டனையாக மாற்றிய ஐகோர்ட்!

இந்தத் தீர்ப்பு, சொத்து குவிப்பு வழக்குகளில் அமலாக்கத் துறையின் பங்கு குறித்து முக்கியமான வழிகாட்டுதலை அளித்துள்ளது. தற்போது பல அ.தி.மு.க. முன்னாள் அமைச்சர்கள் மீது சொத்து குவிப்பு வழக்குகள் நிலுவையில் உள்ள நிலையில், இந்த உத்தரவு அவர்களுக்கு சற்று நிம்மதியை அளிக்கக்கூடும் என்று கருதப்படுகிறது.

எனினும், அமலாக்கத் துறை தனது விசாரணையின் அடிப்படையில் தேவையான நடவடிக்கைகளை எடுக்கும் என்றும் நீதிமன்றம் சுட்டிக்காட்டியுள்ளது. இந்த வழக்கு தொடர்பான முழு விவரங்களும் விரைவில் தெரியவரும் என்று எதிர்பார்க்கப்படுகிறது.

இதையும் படிங்க: ரூ.8,000 இல்லத்தரசி டோக்கன் விநியோகம்! தேர்தல் ஆணையம் புகார்! சென்னை ஐகோர்ட்டில் விசாரணை!