ஓணம் பண்டிகை எதிரொலி: கேரளா செல்லும் ரயில்களில் அலைமோதும் கூட்டம்! சிறப்பு ரயில்களும் ‘ஹவுஸ்புல்’

கேரளாவில் நாளை ஓணம் பண்டிகை கொண்டாடப்பட உள்ள நிலையில், கேரளா செல்லும் ரயில்களில் பயணிகள் கூட்டம் கணிசமாக அதிகரித்துள்ளது. குறிப்பாக ஈரோடு, திருப்பூர், கோவை, போத்தனூர் வழியாக கேரளாவை நோக்கிச் செல்லும் ரயில்களில் வழக்கத்தை விட அதிகமான பயணிகள் காணப்பட்டனர்.

ஓணம் பண்டிகையை சொந்த ஊரில் கொண்டாடுவதற்காக ஏராளமானோர் பயணம் மேற்கொண்டு வருவதால் ரயில் நிலையங்களிலும் பரபரப்பு நிலவுகிறது.

புதுடில்லி–திருவனந்தபுரம் கேரளா எக்ஸ்பிரஸ், காரைக்கால்–எர்ணாகுளம் டீ கார்டன் எக்ஸ்பிரஸ், பெங்களூரு–எர்ணாகுளம் இன்டர்சிட்டி, பெங்களூரு–கன்னியாகுமரி ஐலண்ட் எக்ஸ்பிரஸ், சென்னை–திருவனந்தபுரம் ரயில், தன்பாத்–ஆலப்புழா எக்ஸ்பிரஸ், யஷ்வந்த்பூர்–கண்ணூர் ரயில், கொல்லம் மெயில், சென்னை–கோட்டயம் ரயில், திருவனந்தபுரம்–ஹைதராபாத் சபரி எக்ஸ்பிரஸ், திப்ரூகர்–கன்னியாகுமரி விவேக் எக்ஸ்பிரஸ் உள்ளிட்ட பல்வேறு ரயில்களில் நேற்று பயணிகள் எண்ணிக்கை அதிகமாக இருந்தது.

இதையும் படிங்க: ஓணம் வந்தல்லோ!! விமான டிக்கெட் விர்ர்ர்ர்!! ரெயில், பஸ் Full! பயணிகளுக்கு அதிர்ச்சி!

ஓணம் பண்டிகையையொட்டி பயணிகளின் கூடுதல் தேவையை சமாளிக்கும் வகையில் ஈரோடு, திருப்பூர், கோவை, போத்தனூர் வழித்தடத்தில் 31 சிறப்பு ரயில்கள் அறிவிக்கப்பட்டுள்ளன.

ஆனால் பண்டிகை நெருங்கியுள்ளதால், இந்த சிறப்பு ரயில்களிலும் முன்பதிவு டிக்கெட்டுகளுக்கான தேவை அதிகரித்துள்ளது. பல ரயில்களில் முன்பதிவு செய்யப்பட்ட இருக்கைகள் முழுமையாக நிரம்பி ‘ஹவுஸ்புல்’ நிலையை எட்டியுள்ளன.

முன்பதிவு பெட்டிகளில் இடம் கிடைப்பது சிரமமாகியுள்ள நிலையில், முன்பதிவு இல்லாத பெட்டிகளிலும் வழக்கத்தைவிட அதிகமான பயணிகள் பயணம் செய்தனர். இதனால் முக்கிய ரயில் நிலையங்களில் பயணிகள் கூட்டம் அதிகரித்ததுடன், ரயில்களில் இடம்பிடிப்பதிலும் பயணிகளிடையே கடும் போட்டி ஏற்பட்டுள்ளது.

ஓணம் பண்டிகைக்காக கேரளாவுக்கு செல்லும் பயணிகள் கடைசி நேரத்தில் டிக்கெட் கிடைக்கும் என்ற நம்பிக்கையில் பயணம் திட்டமிடாமல் செல்வதை தவிர்க்க வேண்டும் என ரயில் பயணிகள் அறிவுறுத்துகின்றனர். ஏற்கனவே முன்பதிவு செய்யப்பட்ட ரயில்களில் இடங்கள் நிரம்பியுள்ளதால், பயணிகள் தங்களது பயண நேரம் மற்றும் மாற்று ரயில் வசதிகளை முன்கூட்டியே சரிபார்ப்பது அவசியமாகியுள்ளது.

பண்டிகை முடிந்து கேரளாவில் இருந்து தமிழகம் திரும்பும் நாட்களிலும் இதேபோன்ற கூட்ட நெரிசல் ஏற்பட வாய்ப்புள்ளதால், அந்த நாட்களிலும் ரயில் நிலையங்களில் பயணிகள் கூட்டம் அதிகரிக்கலாம் என எதிர்பார்க்கப்படுகிறது.

இதையும் படிங்க: ஓணம் வந்தல்லோ!! விமான டிக்கெட் விர்ர்ர்ர்!! ரெயில், பஸ் Full! பயணிகளுக்கு அதிர்ச்சி!