குடியுரிமைக்கான இறுதி ஆதாரம் அல்ல பாஸ்போர்ட்..!! மத்திய அரசின் விளக்கம்..!!

இந்திய பாஸ்போர்ட்டை குடியுரிமை நிரூபணம் மற்றும் அரசு சலுகைகளுக்கான ஒரே, இறுதி ஆவணமாகப் பயன்படுத்த முடியாது என மத்திய வெளியுறவுத்துறை அமைச்சகம் (MEA) அதிகாரப்பூர்வமாக விளக்கம் அளித்துள்ளது. இந்த அறிவிப்பு பொதுமக்களிடையே நிலவும் குழப்பத்தைப் போக்கும் நோக்கில் வெளியிடப்பட்டுள்ளது. பாஸ்போர்ட் என்பது முக்கியமாக சர்வதேசப் பயணத்தை எளிதாக்குவதற்கும், வெளிநாடுகளில் இந்தியர்களின் அடையாளத்தை உறுதிப்படுத்துவதற்கும் உள்ள பயண ஆவணம் மட்டுமே என MEA வலியுறுத்தியுள்ளது.

பல்வேறு அரசு திட்டங்கள், மானியங்கள், சேவைகள் மற்றும் சலுகைகளுக்கு பாஸ்போர்ட்டை சமர்ப்பிக்க முயன்ற பொதுமக்களிடையே ஏற்பட்ட குழப்பத்தை இந்த விளக்கம் தீர்க்கும் என எதிர்பார்க்கப்படுகிறது. இந்திய குடியுரிமைச் சட்டம் 1955 மற்றும் அதன் பல்வேறு திருத்தங்களின்படி, குடியுரிமையை நிரூபிக்க பல்வேறு ஆவணங்கள் ஏற்றுக்கொள்ளப்படுகின்றன. ஆனால், எந்த ஒரு ஆவணத்தையும் தனித்து முழுமையான இறுதி சான்றாகக் கருத முடியாது என்பது அரசின் தெளிவான நிலைப்பாடாகும். 

பாஸ்போர்ட் வெளிநாட்டு அங்கீகாரத்திற்கு முக்கியமானதாக இருந்தாலும், உள்நாட்டு குடியுரிமை சம்பந்தப்பட்ட விஷயங்களில் அது முழுமையான ஆதாரமாகக் கருதப்படுவதில்லை. இதுகுறித்து கருத்து தெரிவித்த காங்கிரஸ் மூத்த தலைவர் மும்தாஜ் படேல், “இந்திய குடிமக்கள் தங்கள் குடியுரிமையை எந்த ஆவணத்தின் மூலம் நிரூபிப்பார்கள்?” என்று கேள்வி எழுப்பினார். 

இதையும் படிங்க: அமெரிக்காவிற்கு இந்தியா மீண்டும் சம்மன்.. மாலுமிகள் மீதான தாக்குதலுக்கு வெளியுறவு அமைச்சகம் கண்டனம்!

திரிணாமுல் காங்கிரஸ் எம்.பி. மஹுவா மொய்த்ரா தனது எக்ஸ் பக்கத்தில், “இந்திய குடியுரிமைக்கான ஒரே ஆதாரம் இந்துவாக இருப்பதும், பாஜக வாக்காளராக இருப்பதும்தான் என்ற நிலை உருவாகியுள்ளது போல் தெரிகிறது” என விமர்சித்தார். சமூக வலைதளங்களில் இந்த விவகாரம் பெரும் விவாதத்தை ஏற்படுத்தியுள்ளது. பாஸ்போர்ட், ஆதார் அட்டை, வாக்காளர் அடையாள அட்டை, ரேஷன் கார்டு, பிறப்புச் சான்றிதழ் உள்ளிட்ட பல ஆவணங்கள் இருந்தும், குடியுரிமையை முழுமையாக நிரூபிக்க எது உறுதியான ஆதாரம் என்பதில் மக்கள் குழப்பம் அடைந்துள்ளனர். சிலர் பெற்றோரின் குடியுரிமை ஆவணங்கள் அல்லது பிறப்புச் சான்றிதழை முக்கியமாகக் குறிப்பிடுகின்றனர். எனினும், அதிகாரப்பூர்வ தெளிவு இன்னும் தேவை என்கின்றனர்.

இந்த அறிவிப்பு குடியுரிமை சான்று தொடர்பான விழிப்புணர்வை நாடு முழுவதும் அதிகரிக்கும் எனக் கருதப்படுகிறது. தற்போது பல மாநிலங்களில் குடியுரிமை சரிபார்ப்பு நடவடிக்கைகள் தீவிரமடைந்துள்ள நிலையில், மத்திய அரசு விரைவில் முழுமையான வழிகாட்டுதல்களை வெளியிடும் என மக்கள் நம்பிக்கை வெளியிட்டுள்ளனர்.

இது குடியுரிமை தொடர்பான சட்டரீதியான புரிதலை வலுப்படுத்தும் என அரசியல் நோக்கர்கள் தெரிவிக்கின்றனர்.இந்த விளக்கம் இந்தியர்களின் உரிமைகளைப் பாதுகாக்கும் அதேவேளையில், ஆவணங்கள் சம்பந்தமான தவறான புரிதல்களைத் தவிர்க்க உதவும் என எதிர்பார்க்கப்படுகிறது. 

இதையும் படிங்க: NLC பங்கு விற்பனை முடிவை மறுபரிசீலனை செய்க..!! பிரதமர் மோடிக்கு முதல்வர் விஜய் கடிதம்..!!