திரிணாமுல் அரசு எல்லை மீறிவிட்டது! குடியரசு தலைவர் முர்மு அவமதிக்கப்பட்டதாக பிரதமர் மோடி ஆவேசம்!

மேற்கு வங்காளத்திற்கு பயணம் மேற்கொண்ட இந்தியக் குடியரசுத் தலைவர் திரௌபதி முர்மு அவர்களுக்கு அம்மாநில அரசு உரியப் பாதுகாப்பு மற்றும் மரபுரீதியான வரவேற்பு (Protocol) அளிக்கத் தவறியதாகக் குற்றச்சாட்டுகள் எழுந்துள்ளன. இது தொடர்பாகப் பிரதமர் நரேந்திர மோடி தனது சமூக வலைதளப் பக்கத்தில் மேற்கு வங்கத்தின் திரிணாமுல் காங்கிரஸ் (TMC) அரசை மிகக் கடுமையாகச் சாடியுள்ளார்.

சிலிகுரியில் நடைபெற்ற 9-வது சர்வதேச சந்தாலி (Santal) மாநாட்டில் பங்கேற்கக் குடியரசுத் தலைவர் சென்றிருந்தார். ஆனால், இந்த மாநாட்டிற்காக முதலில் ஒதுக்கப்பட்ட இடமான பிதான்நகரில் (Bidhannagar) இருந்து, கடைசி நேரத்தில் கோசைன்பூர் (Gosainpur) என்ற சிறிய இடத்திற்கு அம்மாநில நிர்வாகம் மாற்றியது. இது பழங்குடியின மக்கள் அதிக அளவில் பங்கேற்பதைத் தடுக்கும் முயற்சி எனப் பிரதமர் குற்றம் சாட்டியுள்ளார்.

நாட்டின் முதல் குடிமகன் ஒரு மாநிலத்திற்கு வரும்போது, அம்மாநில முதலமைச்சர் அல்லது அமைச்சர்கள் நேரில் வந்து வரவேற்பது மரபு. ஆனால், முதலமைச்சர் மம்தா பானர்ஜி மற்றும் அவரது அமைச்சர்கள் எவரும் குடியரசுத் தலைவரைச் சந்திக்க வரவில்லை. இது ஒரு நாட்டின் குடியரசுத் தலைவருக்கு இழைக்கப்பட்ட மிகப்பெரிய அவமானம் எனப் பிரதமர் மோடி தெரிவித்துள்ளார்.

இதையும் படிங்க: சென்னை உயர் நீதிமன்றத்தின் புதிய தலைமை நீதிபதி சுஷ்ருத் அரவிந்த் தர்மதிகாரி! குடியரசுத் தலைவர் நியமனம்!

இது வெட்கக்கேடானது மற்றும் முன்னெப்போதும் இல்லாத ஒன்று. பழங்குடியின சமூகத்தைச் சேர்ந்த குடியரசுத் தலைவர் திரௌபதி முர்மு அவர்கள் வெளிப்படுத்திய வேதனையும் மன உளைச்சலும் இந்திய மக்களின் மனங்களில் ஆழமான சோகத்தை ஏற்படுத்தியுள்ளது. திரிணாமுல் அரசு அனைத்து எல்லைகளையும் மீறிவிட்டது எனப் பிரதமர் மோடி பதிவிட்டுள்ளார்.

குடியரசுத் தலைவர் பதவி என்பது அரசியலுக்கு அப்பாற்பட்டது. அதன் புனிதத்தன்மை எப்போதும் மதிக்கப்பட வேண்டும். சந்தாலி கலாச்சாரம் போன்ற மிக முக்கியமான விஷயத்தை மேற்கு வங்க அரசு இவ்வளவு அலட்சியமாக நடத்துவது துரதிர்ஷ்டவசமானது என்றும் அவர் குறிப்பிட்டுள்ளார்.

குடியரசுத் தலைவர் அவர்களே தனது உரையில், மம்தா பானர்ஜி எனது தங்கை போன்றவர்; அவர் ஏன் கோபமாக இருக்கிறார் எனத் தெரியவில்லை என்று நெகிழ்ச்சியுடன் குறிப்பிட்ட நிலையில், இந்த விவகாரம் தற்போது தேசிய அளவில் பெரும் விவாதத்தை ஏற்படுத்தியுள்ளது.
 

இதையும் படிங்க: ராஷ்டிரபதி பவனில் ராஜாஜி சிலை... குடியரசு தலைவர் திரௌபதி முர்மு திறந்து வைத்தார்!