இந்தியாவின் மிக நீண்ட கால அரசாங்க தலைவராக பிரதமர் மோடி புதிய சாதனை!

இந்திய அரசியல் வரலாற்றில் ஒரு மகத்தான மைல்கல்லைப் பிரதமர் நரேந்திர மோடி இன்று எட்டியுள்ளார். ஒரு மாநிலத்தின் முதலமைச்சராகவும், நாட்டின் பிரதமராகவும் ஒட்டுமொத்தமாக அதிக நாட்கள் பதவி வகித்த தலைவர் என்ற பெருமையை அவர் பெற்றுள்ளார். பிரதமர் மோடி தனது நிர்வாகப் பயணத்தை அக்டோபர் 7, 2001 அன்று குஜராத் முதலமைச்சராகத் தொடங்கினார். அங்கு 13 ஆண்டுகளுக்கும் மேலாக (மே 21, 2014 வரை) பணியாற்றிய அவர், பின்னர் மே 26, 2014 அன்று இந்தியாவின் பிரதமராகப் பொறுப்பேற்றார். இன்றுடன் (மார்ச் 22, 2026) அவர் அரசாங்கத் தலைவராக மொத்தம் 8,931 நாட்களைப் பூர்த்தி செய்துள்ளார்.

இதற்கு முன்னதாக, சிக்கிம் மாநில முன்னாள் முதல்வர் பவன்குமார் சாம்லிங் அவர்கள் மொத்தம் 8,930 நாட்கள் (1994 முதல் 2019 வரை) அரசாங்கத் தலைவராகப் பதவி வகித்ததே சாதனையாக இருந்தது. இன்று அந்தச் சாதனையைப் பிரதமர் மோடி முறியடித்துள்ளார். மேற்கு வங்க முன்னாள் முதல்வர் ஜோதிபாசு (8,539 நாட்கள்) இந்தப் பட்டியலில் மூன்றாவது இடத்தில் உள்ளார்.

பிரதமர் மோடி, ஒரு மாநிலத்தின் முதலமைச்சராகவும், நாட்டின் பிரதமராகவும் நிர்வாகத் தலைவராகப் பணியாற்றிய மொத்த நாட்களின் எண்ணிக்கை இன்று 8,931-ஐ எட்டியுள்ளது. குஜராத் முதல்வராக அக்டோபர் 7, 2001 முதல் மே 22, 2014 வரையும், இந்தியப் பிரதமராக: மே 26, 2014 முதல் இன்று வரை பணியாற்றுகிறார்.

இதையும் படிங்க: சிலிண்டர் தட்டுப்பாட்டில் மத்திய அரசு தலையிட வேண்டும்! துணை முதல்வர் உதயநிதி ஸ்டாலின் வலியுறுத்தல்!

இந்திய ஜனநாயகத்தில் ஒரு தலைவர் இவ்வளவு நீண்ட காலம் மக்களின் நம்பிக்கையைப் பெற்று, ஒரு மாநிலத்தையும் ஒரு பெரும் தேசத்தையும் வழிநடத்துவது இதுவே முதல்முறையாகும். ஜவஹர்லால் நேரு (6,130 நாட்கள் பிரதமராக மட்டும்) போன்ற தலைவர்களை விட நிர்வாகத் தலைவராக அதிக காலம் பணியாற்றிய பெருமை இப்போது மோடியைச் சேரும்.

இந்தச் சாதனைக்காக உள்துறை அமைச்சர் அமித் ஷா, பாதுகாப்புத் துறை அமைச்சர் ராஜ்நாத் சிங் உள்ளிட்ட பல தலைவர்கள் பிரதமருக்கு வாழ்த்துகளைத் தெரிவித்துள்ளனர். மக்களின் அசைக்க முடியாத நம்பிக்கை மற்றும் இடைவிடாத சேவையின் அடையாளமே இந்த மைல்கல் என்று அமித் ஷா தனது எக்ஸ் (X) தளத்தில் பதிவிட்டுள்ளார்.

சுதந்திரத்திற்குப் பிறகு பிறந்த முதல் பிரதமர், மூன்று முறை தொடர்ந்து மக்களவைத் தேர்தலில் வெற்றி பெற்ற தலைவர் எனப் பல சாதனைகளைத் தன்வசம் வைத்துள்ள மோடி, தற்போது இந்த நீண்ட காலத் தலைமைச் சாதனையைத் தனது மகுடத்தில் சூடியுள்ளார்.

இதையும் படிங்க: அமித் ஷா பெயரை வைக்க சொன்னாலும் எடப்பாடி வைப்பார் - உதயநிதி ஸ்டாலின் கடும் தாக்கு!