ரஷ்ய மொழியில் மொழிபெயர்க்கப்பட்ட திருக்குறள்! அதிபர் புதினுக்கு அன்பளிப்பாக வழங்கி பிரதமர் மோடி பெருமிதம்!

இந்தியாவில் நடைபெற்று வரும் பிரிக்ஸ் (BRICS) உச்சி மாநாட்டில் பங்கேற்பதற்காக வந்துள்ள ரஷ்ய அதிபர் விளாடிமிர் புதினுக்கு, அய்யன் திருவள்ளுவரின் உலகப் பொதுமறையான திருக்குறளின் ரஷ்ய மொழிபெயர்ப்புப் புத்தகத்தைப் பிரதமர் நரேந்திர மோடி அன்பளிப்பாக வழங்கினார். எல்லைகளையும் மொழிகளையும் கடந்து வாழும் மாபெரும் மெய்யியல் ஆளுமையான திருவள்ளுவரின் நிலையான வாழ்வியல் விழுமியங்களை வெளிப்படுத்தும் விதமாக இந்த அரிய பரிசை அதிபர் புதினுக்கு வழங்கியதாகப் பிரதமர் மோடி நெகிழ்ச்சியுடன் குறிப்பிட்டுள்ளார்.

உச்சி மாநாட்டின் இடையே இருநாட்டுத் தலைவர்களும் சந்தித்துப் பேச்சுவார்த்தை நடத்திய தருணத்தில் இச்சிறப்புப் பரிசு வழங்கப்பட்டது. இது தொடர்பாகத் தனது சமூக வலைதளப் பக்கத்தில் பதிவிட்டுள்ள பிரதமர் நரேந்திர மோடி, மாபெரும் திருவள்ளுவரின் காலத்தால் அழியாத வாழ்வியல் ஞானத்தை மொழிகளையும் எல்லைகளையும் கடந்து எடுத்துச் செல்லும் திருக்குறளின் ரஷ்ய மொழிபெயர்ப்பு நூலை அதிபர் புதினுக்கு வழங்கினேன் என்று பெருமிதத்துடன் தெரிவித்துள்ளார். உலகத் தலைவர்களைச் சந்திக்கும் தருணங்களிலெல்லாம் தமிழ் மொழியின் தொன்மையையும் திருக்குறளின் மேன்மையையும் பிரதமர் தொடர்ந்து சர்வதேச அளவில் முன்னிறுத்தி வருவது குறிப்பிடத்தக்கது.

இதையும் படிங்க: இந்தியா - இத்தாலி நட்பு மிக வலிமை! பிரதமர் மோடிக்கு இத்தாலி பிரதமர் ஜார்ஜியா மெலோனி நெகிழ்ச்சி நன்றி!

ரஷ்ய மொழியில் மொழிபெயர்க்கப்பட்டுள்ள திருக்குறளை அதிபர் விளாடிமிர் புதின் மகிழ்ச்சியுடன் பெற்றுக்கொண்டார். அரசு நிர்வாகம், நட்புறவு, அறநெறி மற்றும் உலகளாவிய மனிதநேயக் கருத்துகளைக் கொண்டுள்ள திருக்குறளை ரஷ்ய அதிபருக்குப் பரிசளித்த நிகழ்வு சர்வதேசத் தலைவர்களின் கவனத்தைப் பெற்றுள்ளதுடன், உலகத் தமிழர்களிடையேயும் பெரும் வரவேற்பைப் பெற்றுள்ளது.

இதையும் படிங்க: பிரதமர் மோடிக்கு உஸ்பெகிஸ்தான் நாட்டின் மிக உயரிய 'ஒலிய் தராஜலி துஸ்ட்லிக்' விருது வழங்கி கவுரவம்!