பிரசந்த் போர் ஹெலிகாப்டரில் சீறிப்பாய்ந்த குடியரசு தலைவர் திரௌபதி முர்மு!

இந்திய முப்படைகளின் தலைமைத் தளபதியான குடியரசுத் தலைவர் திருமதி திரௌபதி முர்மு, இன்று ராஜஸ்தான் மாநிலம் ஜெய்சால்மர் விமானப்படைத் தளத்தில், இந்தியாவில் தயாரிக்கப்பட்ட இலகுரக போர் ஹெலிகாப்டரான 'பிரசந்த்' (LCH Prachand) மூலம் வான்வழிப் பயணம் (Sortie) மேற்கொண்டு புதிய வரலாறு படைத்துள்ளார். ஏற்கனவே சுகோய்-30 MKI மற்றும் ரஃபேல் போர் விமானங்களில் பறந்த அவர், தற்போது ஹெலிகாப்டரிலும் பறந்து பாதுகாப்புப் படைகளின் தன்னம்பிக்கையை அதிகரித்துள்ளார்.

இரண்டு 'பிரசந்த்' ஹெலிகாப்டர்கள் அணிவகுத்துச் சென்ற இந்த மிஷனில், முன்னணி ஹெலிகாப்டரில் குரூப் கேப்டன் நயன் சாந்திலால் பாவாவுடன் குடியரசுத் தலைவர் பயணித்தார். மற்றொரு ஹெலிகாப்டரில் விமானப்படைத் தளபதி ஏர் சீப் மார்ஷல் ஏ.பி. சிங் மற்றும் குரூப் கேப்டன் ஏ. மகேந்திரா ஆகியோர் பின்னால் சென்றனர். சுமார் 25 நிமிடங்கள் நீடித்த இந்தப் பயணத்தின் போது, காடிசர் ஏரி மற்றும் வரலாற்றுச் சிறப்புமிக்க ஜெய்சால்மர் கோட்டை ஆகியவற்றை வான்வழியாகக் கடந்த ஹெலிகாப்டர், அங்கு வைக்கப்பட்டிருந்த இலக்கு டாங்க் (Tank Target) ஒன்றின் மீது துல்லியமாகத் தாக்குதல் நடத்தும் ஒத்திகையைச் செய்து காட்டியது.

இதையும் படிங்க: ராஷ்டிரபதி பவனில் ராஜாஜி சிலை... குடியரசு தலைவர் திரௌபதி முர்மு திறந்து வைத்தார்!

பயணத்திற்குப் பிறகு பார்வையாளர் புத்தகத்தில் தனது அனுபவத்தை எழுதிய குடியரசுத் தலைவர், "இந்தியாவின் சுதேசித் தொழில்நுட்பத்தில் உருவான 'பிரசந்த்' ஹெலிகாப்டரில் பறந்தது எனக்கு ஒரு செழுமையான அனுபவம். இது நாட்டின் பாதுகாப்புத் திறன்கள் மீது எனக்குப் புதிய பெருமிதத்தை ஏற்படுத்தியுள்ளது" எனப் பாராட்டியுள்ளார். இந்த பயணத்தைத் தொடர்ந்து, இன்று மாலை ஜெய்சால்மரில் நடைபெறவுள்ள இந்திய விமானப்படையின் பிரம்மாண்டமான 'வாயு சக்தி' (Exercise Vayu Shakti) போர்ப்பயிற்சி ஒத்திகையையும் குடியரசுத் தலைவர் நேரில் கண்டு ரசிக்கவுள்ளார்.

பாதுகாப்புத் துறையில் இந்தியா 'ஆத்மநிர்பார்' (தற்சார்பு) அடைந்து வருவதைக் பறைசாற்றும் வகையில் குடியரசுத் தலைவரின் இந்தப் பயணம் அமைந்துள்ளது.

இதையும் படிங்க: ராமதாஸ் பேரனுடன் பாஜக ரகசிய பேரம்!! தேமுதிக நழுவியதால் எடப்பாடிக்கும் விருப்பம்! கூட்டணி பேச்சு தீவிரம்!