புதுச்சேரி: அக்கவுண்டில் கிரெடிட்டான ரூ.5,000..!! குஷியில் துள்ளி குதிக்கும் குடும்பத் தலைவிகள்..!!

புதுச்சேரியில் வறுமைக்கோட்டிற்கு கீழ் வாழும் குடும்பத் தலைவிகளுக்கு மகிழ்ச்சி தரும் அறிவிப்பு ஒன்று வெளியாகியுள்ளது. தமிழக அரசு சமீபத்தில் மகளிர் உரிமைத் தொகை திட்டத்தின் கீழ் ரூ.1,000 மாதாந்திர உதவியுடன் கோடைக்கால சிறப்பு நிவாரணமாக சேர்த்து ரூ.5,000 வழங்கியதைத் தொடர்ந்து, புதுச்சேரி மக்களும் இதேபோன்ற உதவியை எதிர்பார்த்து கோரிக்கை வைத்தனர். 

இதற்கு முதலமைச்சர் என். ரங்கசாமி உடனடியாக நடவடிக்கை எடுத்து, ஆளுநர் கைலாஷ் நாதனுக்கு முறையான கோரிக்கையை முன்வைத்தார். அவரது கோரிக்கையை ஏற்றுக்கொண்ட ஆளுநர், இத்திட்டத்தை அமல்படுத்துவதற்கான ஒப்புதலை வழங்கியுள்ளார். புதுச்சேரியில் ஏற்கனவே நடைமுறையில் உள்ள மகளிர் நிதியுதவித் திட்டத்தின் கீழ், வறுமைக்கோட்டிற்கு கீழ் உள்ள குடும்பங்களின் பெண் தலைவர்களுக்கு (சிவப்பு நிற குடும்ப அட்டைதாரர்கள்) ஒவ்வொரு மாதமும் ரூ.2,500 உதவித்தொகை வழங்கப்பட்டு வருகிறது.

இதையும் படிங்க: புதுச்சேரி தேர்தல் களம்: 28 தொகுதிகளுக்கும் வேட்பாளர்களை அறிவித்தார் சீமான்!

இத்தொகை நேரடியாக பயனாளிகளின் வங்கிக் கணக்கில் DBT (Direct Benefit Transfer) முறையில் செலுத்தப்படுகிறது. இடைத்தரகர்கள் அல்லது எவ்வித தடங்கல்களும் இன்றி, பெண்கள் தங்கள் தேவைகளுக்காக இத்தொகையை சுதந்திரமாக பயன்படுத்த முடியும் என்பது இத்திட்டத்தின் சிறப்பம்சம்.

தற்போது, வரவிருக்கும் சட்டமன்றத் தேர்தல் மற்றும் குடும்பங்களின் கோடைக்கால செலவுகளை கருத்தில் கொண்டு, அடுத்த இரண்டு மாதங்களுக்கான உதவித்தொகையை ஒரே தவணையில் வழங்க முடிவு செய்யப்பட்டுள்ளது. அதாவது, மார்ச் மற்றும் ஏப்ரல் மாதங்களுக்கான ரூ.2,500 + ரூ.2,500 = மொத்தம் ரூ.5,000 ஒரேயடியாக பயனாளிகளின் வங்கிக் கணக்கில் வரவு வைக்கப்பட்டுள்ளது. இந்த அறிவிப்பு மூலம் சுமார் 63,000 குடும்பத் தலைவிகள் பயனடைவார்கள் என்று அதிகாரப்பூர்வமாக தெரிவிக்கப்பட்டுள்ளது.

இத்திட்டம் பெண்களின் பொருளாதார சுதந்திரத்தை வலுப்படுத்துவதோடு, குடும்பங்களின் அன்றாட செலவுகளை சமாளிக்கவும், குறிப்பாக கோடை வெயிலின் தாக்கத்தில் உள்ள வீடுகளுக்கு நிவாரணமாக அமையும் என எதிர்பார்க்கப்படுகிறது. தமிழக அரசின் முன்மாதிரியைப் பின்பற்றி புதுச்சேரி அரசு விரைவாக நடவடிக்கை எடுத்துள்ளது பாராட்டத்தக்கது. 

இதனால் பயனாளிகள் மத்தியில் மகிழ்ச்சி நிலவுவதாகவும், அரசின் மக்கள் நல அக்கறைக்கு நன்றி தெரிவிக்கும் கருத்துகள் பரவலாக வெளியாகி வருகின்றன. மேலும் பயனாளிகள் தங்கள் வங்கிக் கணக்கை சரிபார்த்துக்கொள்ள அறிவுறுத்தப்பட்டுள்ளது. 
 

இதையும் படிங்க: பெஸ்ட் புதுச்சேரி கனவு நனவாகிறது.....₹2,700 கோடி திட்டங்களை தொடங்கி வைத்த பிரதமர் மோடி!