காங்., தலைவர் கார்கேவுக்கு அவமரியாதை? கொந்தளித்த ராகுல் காந்தி! வழக்குபதிவு செய்ய கோரிக்கை!

புதுடெல்லி: காங்கிரஸ் தலைவர் மல்லிகார்ஜுன கார்கே பொதுக்கூட்டத்தில் பேசிய இடத்தில் நடைபெற்றதாக கூறப்படும் ‘சுத்திகரிப்பு’ சடங்கு விவகாரம், தேசிய அரசியலில் புதிய சர்ச்சையை ஏற்படுத்தியுள்ளது. இந்த சம்பவத்துக்கு எதிராக மக்களவை எதிர்க்கட்சித் தலைவர் ராகுல் காந்தி கடும் கண்டனம் தெரிவித்துள்ளார்.

உத்தரகாண்ட் மாநிலம் ஹல்த்வானியில் உள்ள ராம்லீலா மைதானத்தில் கடந்த 8-ம் தேதி காங்கிரஸ் சார்பில் பொதுக்கூட்டம் நடைபெற்றது. இதில் காங்கிரஸ் தலைவர் மல்லிகார்ஜுன கார்கே கலந்து கொண்டு உரையாற்றினார். பொதுக்கூட்டம் முடிந்த இரண்டு நாட்களுக்குப் பிறகு, அதே இடத்தில் ஸ்ரீராமசேனா அமைப்பைச் சேர்ந்தவர்கள் புனிதப்படுத்தும் சடங்குகளை நடத்தியதாக கூறப்படுகிறது.

இந்த சம்பவத்தை குறிப்பிட்டு டெல்லியில் செய்தியாளர்களிடம் பேசிய ராகுல் காந்தி, மல்லிகார்ஜுன கார்கேவை அவமதிக்கும் நோக்கத்துடன் இந்த நடவடிக்கை மேற்கொள்ளப்பட்டதாக குற்றம்சாட்டினார். ஒருவரை அவமதிக்கும் வகையில் இதுபோன்ற சடங்கு நடத்துவது ஏற்றுக்கொள்ள முடியாதது என்றும் அவர் தெரிவித்தார்.

இதையும் படிங்க: அதானியுடன் கர்நாடக முதல்வர் சிவகுமார் சந்திப்பு! ராகுலிடம் அனுமதி வாங்கினாரா? கொந்தளித்த பாஜக!

மேலும், இந்த விவகாரத்தில் கார்கேவுக்கு நீதி கிடைப்பதை உறுதி செய்வது மத்திய மற்றும் மாநில அரசுகளின் பொறுப்பு என்றும் ராகுல் காந்தி கூறினார். சம்பவம் தொடர்பாக போதுமான நடவடிக்கை எடுக்கப்படவில்லை என்றும் அவர் குற்றம்சாட்டினார்.

சம்பவம் நடந்து பல நாட்கள் கடந்துவிட்டதாகக் குறிப்பிட்ட ராகுல் காந்தி, இதுவரை வழக்குப்பதிவு செய்யப்படாதது ஏன் என்றும் கேள்வி எழுப்பினார். இந்த விவகாரத்தில் பிரதமர் நரேந்திர மோடி தலையிட்டு, சம்பவம் தொடர்பாக வழக்குப்பதிவு செய்து நடவடிக்கை எடுக்க உத்தரவிட வேண்டும் என்றும் அவர் வலியுறுத்தினார்.

இதற்கிடையே, பொதுக்கூட்டம் நடைபெற்ற இடத்தில் நடந்ததாக கூறப்படும் சடங்கு தொடர்பான விவகாரம் உத்தரகாண்ட் அரசியலிலும் பரபரப்பை ஏற்படுத்தியுள்ளது. ஒரு அரசியல் தலைவரின் பொதுக்கூட்ட இடத்தை பின்னர் வேறு அமைப்பினர் சடங்குக்குப் பயன்படுத்திய விவகாரத்தை காங்கிரஸ் கடுமையாக எதிர்த்து வருகிறது.

இந்த சம்பவம் தொடர்பாக காவல்துறை மற்றும் மாநில அரசு தரப்பில் எத்தகைய நடவடிக்கை எடுக்கப்படுகிறது என்பதே அடுத்தகட்ட முக்கிய எதிர்பார்ப்பாக உள்ளது. ராகுல் காந்தியின் தற்போதைய கோரிக்கையால், ஹல்த்வானி சம்பவம் தேசிய அரசியல் விவாதத்திலும் மீண்டும் கவனம் பெற்றுள்ளது.

இதையும் படிங்க: ராகுல் நிகழ்ச்சியை பிரபலப்படுத்த ரூ.25 ஆயிரம்!! இன்புளூயன்சர்களுக்கு பணம் கொடுத்ததா காங்.,? பாஜக புகார்!