உக்ரைன் மீது ரஷ்யா பயங்கர தாக்குதல்! இந்தியர் உள்பட 12 பேர் பலி! 20-க்கும் மேற்பட்டோர் காயம்!

கீவ்: உக்ரைன் மீது ரஷியா நடத்திய தொடர் வான்வழி மற்றும் டிரோன் தாக்குதல்களில் இந்தியர் உள்பட 12 பேர் உயிரிழந்துள்ளதாக உக்ரைன் அதிபர் வோலோடிமிர் ஜெலன்ஸ்கி தெரிவித்துள்ளார். மேலும் 20-க்கும் மேற்பட்டோர் காயமடைந்துள்ளதாகவும் அவர் கூறியுள்ளார். இந்த சம்பவம் உக்ரைனில் மீண்டும் பதற்றத்தை அதிகரித்துள்ளது.

ரஷியா–உக்ரைன் இடையேயான போர் 2022-ம் ஆண்டு பிப்ரவரியில் தொடங்கியது. தொடர்ந்து 5-வது ஆண்டாக நீடித்து வரும் இந்த போரில் இரு தரப்பிலும் பெரும் உயிரிழப்புகள் ஏற்பட்டுள்ளன. ஏராளமான மக்கள் தங்கள் வீடுகளை விட்டு வெளியேறி பாதுகாப்பான இடங்களில் தஞ்சமடைந்துள்ளனர்.

உக்ரைனுக்கு அமெரிக்கா, இங்கிலாந்து, ஜெர்மனி உள்ளிட்ட மேற்கத்திய நாடுகள் ஆயுதங்கள் மற்றும் நிதியுதவிகளை வழங்கி வருகின்றன. மறுபுறம் ரஷியாவுக்கு நட்பு நாடான வடகொரியா ராணுவ தளவாடங்கள் மற்றும் வீரர்களை வழங்கி வருவதாக கூறப்படுகிறது.

இதையும் படிங்க: ரஷ்யா மீது 600+ ட்ரோன்கள் ஏவி உக்ரைன் நடத்திய மெகா தாக்குதல்! 6 பேர் பலி! 4 ஆண்டுகளாக ஓயாத போர்!!

இந்த நிலையில், உக்ரைனின் ஒடேசா மற்றும் அதைச் சுற்றியுள்ள பகுதிகளில் நேற்று மாலை முதல் ரஷியா தொடர்ந்து தாக்குதல்களை நடத்தியதாக அதிபர் ஜெலன்ஸ்கி தெரிவித்துள்ளார். வான்வழி வெடிகுண்டுகள் மற்றும் டிரோன்கள் மூலம் தாக்குதல் நடத்தப்பட்டதாக கூறப்படுகிறது.

இந்த தொடர் தாக்குதல்களில் கட்டிடங்கள் உள்ளிட்ட பல்வேறு பகுதிகள் சேதமடைந்ததாகவும், பொதுமக்கள் பலர் பாதிக்கப்பட்டதாகவும் தெரிவிக்கப்பட்டுள்ளது. தாக்குதலின் போது இந்தியர் ஒருவர் உட்பட மொத்தம் 12 பேர் உயிரிழந்ததாக ஜெலன்ஸ்கி வெளியிட்ட தகவலில் குறிப்பிடப்பட்டுள்ளது. மேலும் 20-க்கும் மேற்பட்டோர் காயமடைந்துள்ளனர்.

உக்ரைன் போருக்கு முடிவு காண அமெரிக்காவின் மத்தியஸ்தத்தில் பல்வேறு கட்ட பேச்சுவார்த்தை முயற்சிகள் மேற்கொள்ளப்பட்டு வருகின்றன. ஆனால், இதுவரை குறிப்பிடத்தக்க முன்னேற்றம் ஏற்படவில்லை என கூறப்படுகிறது. பேச்சுவார்த்தைகள் தொடரும் நிலையில், ரஷியா மற்றும் உக்ரைன் இடையே தாக்குதல்கள் நீடித்து வருகின்றன.

இதற்கிடையே, பொதுமக்கள் அதிகம் வசிக்கும் பகுதிகளில் நடத்தப்படும் தாக்குதல்கள் குறித்து உக்ரைன் தொடர்ந்து சர்வதேச நாடுகளிடம் கவலை தெரிவித்து வருகிறது. ரஷியாவும் தனது தாக்குதல்கள் ராணுவ இலக்குகளை குறிவைத்தே நடத்தப்படுவதாக பல்வேறு சந்தர்ப்பங்களில் தெரிவித்துள்ளது.

தற்போதைய தாக்குதலில் இந்தியர் ஒருவர் உயிரிழந்துள்ளதாக உக்ரைன் அதிபர் தரப்பில் தெரிவிக்கப்பட்டிருப்பது இந்தியாவிலும் கவனத்தை பெற்றுள்ளது. உயிரிழந்த இந்தியரின் அடையாளம் உள்ளிட்ட கூடுதல் விவரங்கள் உடனடியாக வெளியாகவில்லை.

5-வது ஆண்டை எட்டியுள்ள ரஷியா–உக்ரைன் போர் இன்னும் முடிவுக்கு வராத நிலையில், மீண்டும் தீவிரமடைந்துள்ள டிரோன் மற்றும் வான்வழி தாக்குதல்கள் சர்வதேச அளவில் கவலையை ஏற்படுத்தியுள்ளன. புதிய தாக்குதலால் உயிரிழப்பு மற்றும் சேதம் மேலும் அதிகரிக்குமா என்ற அச்சமும் ஏற்பட்டுள்ளது.

இதையும் படிங்க: ரஷ்யா மீது 600+ ட்ரோன்கள் ஏவி உக்ரைன் நடத்திய மெகா தாக்குதல்! 6 பேர் பலி! 4 ஆண்டுகளாக ஓயாத போர்!!