ஏன் என் வீட்ல ரெய்டு நடக்கலை?! பயப்படுற ஆளு மாதிரி தெரியுதா?! சேட்டை காட்டிருவியா நீ? சீமான் ஆவேசம்!

நாம் தமிழர் கட்சி தலைமை ஒருங்கிணைப்பாளர் சீமான், தனது வீட்டில் வருமான வரித்துறை மற்றும் அமலாக்கத்துறை சோதனை ஏன் நடத்தவில்லை என்று கேள்வி எழுப்பியுள்ளார்.

புதுச்சேரியில் நிருபர்களை சந்தித்த சீமான், மத்திய அரசை கடுமையாக விமர்சித்தார். “மத்தியிலும் மாநிலத்திலும் ஒரே கூட்டணி ஆட்சியில் இருந்து தீர்த்த பிரச்னை என்ன? மாநிலங்கள் கொடுக்கும் நிதிதான் மத்திய அரசுக்கு வருமானம். அப்புறம் அவன் எனக்கு என்ன தருவான்? வட்டி கடை வைத்திருக்கிறானா அல்லது கந்துவட்டி கடை நடத்துகிறானா?” என்று கேள்வி எழுப்பினார்.

மேலும், “நான் முதல்வர் ஆனால் இப்படி எல்லாம் சேட்டை காட்டுவீர்களா? வரியை உனக்கு தந்துவிடுவேன் என்று நினைக்கிறீர்களா? லட்சம் லட்சமாக கொள்ளையடித்து வைத்திருக்கிறார்கள். வருமான வரித்துறைக்கும் அமலாக்கத்துறைக்கும் பயந்து கைகட்டி நிற்கிறார்கள். ஏன் என் வீட்டில் ஐடி ரெய்டு, அமலாக்கத்துறை ரெய்டு நடத்தவில்லை? காரணம், என் வீட்டில் ஏதும் இல்லை. நேர்மையாளனுக்கு மட்டும்தான் துணிவும் வீரமும் இருக்கும்” என்று ஆவேசமாகப் பேசினார்.

இதையும் படிங்க: உங்ககிட்ட கத்தி கத்தி சாகுறதுக்கு ஒரேடியா போயிடலாம்..! பரப்புரையில் சீமான் ஆதங்கம்..!!

“என்னை அடக்கு, ஒடுக்கு பார்ப்போம். அதிகபட்சம் வழக்கு போட்டு ஜெயிலில் போடுவீர்கள். பயப்படும் ஆள் மாதிரி தெரிகிறதா?” என்றும் சீமான் சவால் விடுத்தார்.

இதே நிகழ்ச்சியில், புதுச்சேரி மேட்டுப்பாளையம் பகுதியில் நாம் தமிழர் கட்சி வேட்பாளரை ஆதரித்து பிரசாரம் செய்தபோது, சிலர் “தவெக” என்று கோஷம் போட்டனர். இதனால் கோபமடைந்த சீமான், “நாதகவினர் அறிவார்ந்தவர்கள். தவெகவினர் கோமாளிகள், தற்குறிகள்” என்று ஒருமையில் திட்டினார். இதனால் அங்கு மோதல் ஏற்படும் சூழல் உருவானது. போலீசார் உடனடியாக தலையிட்டு சூழலை கட்டுக்குள் கொண்டு வந்தனர்.

சீமானின் இந்தக் கோப ஆவேசப் பேச்சு மற்றும் மத்திய அரசுக்கு எதிரான கடுமையான விமர்சனம் அரசியல் வட்டாரத்தில் பெரும் பரபரப்பை ஏற்படுத்தியுள்ளது. தேர்தல் களம் சூடுபிடித்துள்ள நேரத்தில் சீமானின் இந்தப் பேச்சு நாம் தமிழர் கட்சியின் தீவிர அணுகுமுறையை மீண்டும் வெளிப்படுத்தியுள்ளது.

இதையும் படிங்க: ஜனநாயக துரோகம் செய்த ஜனநாயகன்... விஜயை வெளுத்து வாங்கிய சீமான்...!