தமிழ்நாட்டில் செமிகண்டக்டர் மையம்.. டெண்டர் கோரியது டிட்கோ..!!

தமிழ்நாட்டில் தொழில் வளர்ச்சியில் முதலிடத்துக்கு எடுத்துச்செல்லும் நோக்குடன் செயல்பட்டு வரும் முதல்வர் ஸ்டாலின் தலைமையிலான திமுக அரசு பல்வேறு தொழில் நிறுவனங்களை அமைப்பதில் தீவிர ஆர்வம் காட்டி வருகிறது. இதனால், தமிழ்நாடு தொழில் வளர்ச்சியில் முன்னணியில் உள்ளதுடன், பல லட்சம் பேருக்கு வேலை வாய்ப்புகளையும் வழங்கி வருகிறது.

இந்நிலையில் தமிழ்நாட்டின் தொழில்துறை வளர்ச்சியை மேம்படுத்தும் நோக்கில், தமிழ்நாடு தொழில்துறை வளர்ச்சி கழகம் (TIDCO) ரூ.100 கோடி மதிப்புள்ள செமிகண்டக்டர் வடிவமைப்பு மற்றும் சோதனை மையத்தை (Centre of Excellence - CoE) அமைக்க டெண்டர்களை கோரியுள்ளது. இந்த மையம், தமிழ்நாட்டை உலகளாவிய செமிகண்டக்டர் தொழில்நுட்ப மையமாக மாற்றும் முக்கிய இலக்கை நோக்கி முக்கிய படியாக அமையும். இது தமிழ்நாடு செமிகண்டக்டர் மிஷன் 2030 (TNSM 2030) திட்டத்தின் ஒரு பகுதியாக, ரூ.500 கோடி ஒதுக்கீட்டுடன் செயல்படுத்தப்படுகிறது.

இதையும் படிங்க: ராமநாதபுரத்தில் பிரம்மாண்ட AIRPORT… இடம் ரெடியாம்! எங்க தெரியுமா?

TIDCO, தமிழ்நாடு அரசின் முதன்மை தொழில்துறை மேம்பாட்டு அமைப்பாக 1965ஆம் ஆண்டு நிறுவப்பட்டது. இந்நிறுவனம், மாநிலத்தில் சமநிலையான தொழில்துறை வளர்ச்சியை ஊக்குவிப்பதில் முக்கிய பங்கு வகிக்கிறது. இந்த புதிய CoE, செமிகண்டக்டர் தொழில்நுட்பத்தில் ஆராய்ச்சி மற்றும் வளர்ச்சி (R&D), வடிவமைப்பு, சோதனை வசதிகளை வழங்கும். இது சர்வதேச சோதனை மையங்களை சார்ந்திருக்கும் தேவையை குறைத்து, உற்பத்தி செலவுகளை குறைக்க உதவும். 

குறிப்பாக, தமிழ்நாட்டின் உள்ளூர் ஸ்டார்ட்அப்கள் மற்றும் MSMEக்களுக்கு பயனளிக்கும் இந்த மையம், எலக்ட்ரானிக்ஸ் காரிடாரில் உள்ள தொழில்களை வலுப்படுத்தும். டெண்டர் விவரங்களின்படி, குறைந்தது ரூ.100 கோடி மதிப்புள்ள R&D அல்லது சோதனை வசதிகளை செயல்படுத்திய அனுபவம் உள்ள நிறுவனங்கள் மட்டுமே விண்ணப்பிக்கலாம். கடந்த மூன்று ஆண்டுகளில் சராசரியாக ரூ.50 கோடி ஆண்டு விற்பனை வருவாய் (turnover) கொண்டிருக்க வேண்டும்.

செமிகண்டக்டர் துறையில் வலுவான நிபுணத்துவம் உள்ள நிறுவனங்களுக்கு முன்னுரிமை அளிக்கப்படும். TIDCO, திட்ட செலவின் 40% வரை (ரூ.75 கோடி வரை) மானியமாக வழங்கும். மையத்தை நிர்வகிக்க ஸ்பெஷல் பர்பஸ் வெஹிகல்ஸ் (SPV) உருவாக்கப்பட்டு, TIDCO அதில் குறைந்தது 20% பங்கு வைத்திருக்கும். இது தனியார்-அரசு கூட்டு முயற்சியாக (PPP) செயல்படும். இந்த திட்டம், தமிழ்நாட்டை இந்தியாவின் செமிகண்டக்டர் தலைமை மாநிலமாக மாற்றும். ஏற்கனவே, மாநிலத்தில் 35 லட்சம் MSMEக்கள் செயல்பட்டு, 2.47 கோடி வேலை வாய்ப்புகளை உருவாக்கியுள்ளன. 

செமிகண்டக்டர் துறையில் புதிய வாய்ப்புகள் உருவாகி, ஆயிரக்கணக்கான வேலைகள் உருவாகும் என எதிர்பார்க்கப்படுகிறது. முதலமைச்சர் மு.க. ஸ்டாலின் தலைமையில், தொழில் அமைச்சர் டி.ஆர்.பி. ராஜா இந்த திட்டத்தை அறிவித்துள்ளார். IIT-மெட்ராஸ் போன்ற நிறுவனங்களுடன் ஒத்துழைப்பு அதிகரிக்கப்பட்டு, திறன் பயிற்சி திட்டங்களும் அறிமுகம் செய்யப்படும். இதன் மூலம், தமிழ்நாடு உலக அளவில் செமிகண்டக்டர் டிசைன் தலைமை பெறும்.

இதையும் படிங்க: பயங்கரவாதத்துக்கு எதிர்ப்பு!! இந்தியாவுடன் துணை நிற்கும் சிங்கப்பூர்!! கையெழுத்தான 5 முக்கிய ஒப்பந்தங்கள்!